စစ်ကောင်စီ၏ ဒါဆိုင်းတပ်စခန်းကလက်နက်အများအပြား သိမ်းဆည်းရမိ

စစ်ကောင်စီ၏ ဒါဆိုင်းတပ်စခန်းကလက်နက်အများအပြား သိမ်းဆည်းရမိ

****************

ထွယ်

မတ် ၁၅၊ ၂၀၂၄။

ကချင်ပြည်နယ်၊ မိုးမောက်မြို့နယ် ဒါဆိုင်း (Da Sai) ကျေးရွာတွင်တပ်စွဲထားသည့် စစ်ကောင်စီခြေလျင်တပ်ရင်း ခလရ – ၂၃၇ ကို KIA ပူးပေါင်းအဖွဲ့က တိုက်ခိုက်သိမ်းပိုက်ပြီးနောက် လက်နက်အများအပြား သိမ်းဆည်းရမိခဲ့သည်ဟု ကချင်လွတ်လပ်ရေးတပ်မတော် – KIA ရှေ့တန်းရဲဘော်များထံက သိရသည်။

၎င်းက “လက်နက်တွေတော့ ကားအကြီး ၁၀ စီးကျော်ရတယ်။ လက်နက်တွေက စုံနေတာပဲ။ ဘာလက်နက်တွေမှန်းတောင် မသိဘူး။ လက်နက်သေး (သေနတ်) တွေက ၁၄၀ ကျော်ရှိပြီ။ ရှာလေ တွေ့လေပဲ။ ဒါတောင် အကုန်မရှာနိုင်သေးဘူး” ဟုပြောသည်။

စစ်ကောင်စီ၏ အဆိုပါတပ်ရင်းကို ယမန်နေ့နံနက် ၇ နာရီခွဲခန့်တွင် KIA နှင့် ပူးပေါင်းတပ်ဖွဲ့ဝင်များက ဝင်ရောက်တိုက်ခိုက်သိမ်းပိုက်နိုင်ခဲ့ခြင်းဖြစ်သည်။

စစ်ကောင်စီတပ်သည် အဆိုပါ တပ်စခန်း လက်လွှတ်ရပြီးနောက် လေကြောင်းဖြင့် ပြင်းပြင်းထန်ထန်တိုက်ခိုက်ခဲ့သည်ဟု ရှေ့တန်းရဲဘော်များထံက သိရသည်။

စစ်ကောင်စီ ခလရ – ၂၃၇ တပ်ရင်းသည် KIA ၏ တပ်မ ဟာ ၃ နယ်မြေတွင် တည်ရှိပြီး KIA ၏ တပ်ရင်း ၁၅၊ တပ်ရင်း ၁၉ နှင့် တပ်ရင်း ၂၅ ရှိ တပ်ဖွဲ့ဝင်များက ပူး ပေါင်းတိုက်ခိုက်ခဲ့ခြင်းဖြစ်သည်ဟု သိရသည်။

စစ်ကောင်စီ၏ အဆိုပါတပ်ရင်းတွင် အင်အား ၂၀၀ ကျော်ခန့်ရှိပြီး KIA နှင့် ပူးပေါင်းတပ်တို့က မတ်လ ၇ ရက်ကတည်းက တိုက်ခိုက်‌ခဲ့ခြင်းဖြစ်ကာ တစ်ပတ်ခန့်အကြာ မတ်လ ၁၄ ရက်၌ အပြီးတိုင်တိုက်ခိုက်သိမ်းပိုက်နိုင်ခဲ့ခြင်း ဖြစ်သည်။

ဒါဆိုင်း (Da Sai) ကျေးရွာသည် မိုးမောက်မြို့နယ်၊ မြို့သစ်ကျေးရွာအုပ်စုတွင်ပါဝင်ပြီး မြစ်ကြီးနား – ဗန်းမော်လမ်းမပေါ်၌တည်ရှိသည့်ကျေးရွာဖြစ်ကာ မိုးမောက်မြို့ နယ်ရှိ ဒေသခံအချို့လည်း တိုက်ပွဲတိမ်းရှောင်လျက်ရှိသည်ဟု မိုးမောက်မြို့ဒေသခံများထံက သိရသည်။

ယခုနှစ် မတ်လ ၇ ရက်ကစတင်၍ ကချင်ပြည်နယ်တွင် KIA ပူးပေါင်းတပ်နှင့် စစ်ကောင်စီတပ်များအကြား တိုက်ပွဲပြင်းထန်နေပြီး တစ်ပတ်အတွင်း စစ်ကောင်စီ၏ စခန်းအကြီးများနှင့် ကာကင်းများ အပါအဝင် စုစုပေါင်း ၂၀ ခန့် တိုက်ခိုက်သိမ်းဆည်းရမိခဲ့သည်ဟု ရှေ့တန်းရဲဘော်များထံက သိရသည်။

လက်ရှိမှာတော့ ကချင်ပြည်နယ်တွင် တိုက်ပွဲများဆက် လက်ပြင်းထန်နေပြီး KIA ၏ တပ်မဟာ ၁ နယ်မြေ ဆွမ်ပရာဘွမ်မြို့နယ်တွင်တပ်စွဲထားသည့် စစ်ကောင်စီ၏ ခလရ – ၄၆ တပ်ရင်းကို KIA နှင့် ပူးပေါင်းတပ်ဖွဲ့ဝင်များ ဆက်လက်တိုက်ခိုက်နေဆဲဖြစ်သည်ဟုလည်း သိရသည်။

Video – Credit (ဒါဆိုင်းကျေးရွာတွင် တပ်စွဲထားသည့် စစ်ကောင်စီ၏ ခလရ – ၂၃၇ တပ်ရင်းကသိမ်းဆည်းရမိသည့် လက်နက်များ)

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3759

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8345