တနင်္သာရီတိုင်းကဒေသခံများ လေကြောင်းတိုက်ခိုက်ခံနေရ

တနင်္သာရီတိုင်းကဒေသခံများ လေကြောင်းတိုက်ခိုက်ခံနေရ

********************

သဇင်

မတ် ၆၊ ၂၀၂၄။

တနင်္သာရီတိုင်း၊ ထားဝယ်ခရိုင် သရက်ချောင်းမြို့နယ်တွင် ယခုလအတွင်း လေကြောင်းတိုက်ခိုက်မှုကြောင့် သရက်ချောင်းမြို့နယ် တောင်ပျောက်တိုက်နယ်ရှိဒေသခံထောင်ချီ နေရပ်စွန့်ခွာတိမ်းရှောင်နေကြရသည်ဟု စစ် ရှောင်အရေးကူညီသူများထံက သိရသည်။

ယခု မတ်လ ၂ ရက်နှင့် မတ်လ ၄ ရက်တွင် သရက်ချောင်းမြို့နယ် ရောင်းမော်ရွာနှင့် စုံစင်ဖျားရွာကို စစ် ကောင်စီက လေကြောင်းဖြင့်တိုက်ခိုက်ခဲ့သည့်အတွက် အရပ်သားတချို့ထိခိုက်သေဆုံးခဲ့သည်။

မတ်လ ၄ ရက်တွင် သရက်ချောင်းမြို့ စုံစင်ဖျားရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီက Mi – 2 ရဟတ် ယာဉ် ၁ စင်းဖြင့် ဗုံး ၁ ၄လုံးကြဲချတိုက်ခိုက်ခဲ့သည်။

လေကြောင်းတိုက်ခိုက်မှုကြောင့် ခရီးသည်တင်မော်တော်ယာဥ်များအားလုံး အဝေးပြေးလမ်း၌ရပ်ထားစဉ် ထားဝယ်မှ မြိတ်ဘက်သို့ဆင်းလာသည့် ခရီးသည်တင်မော်တော်ယာဥ် ၁ စီးကအမျိုးသမီး ၁ ဦး ဗုံးစထိမှန်ကာ သေဆုံးခဲ့သည်ဟု ဒေသခံအမျိုးသား ၁ ဦးကဆိုသည်။

၎င်းက “ရဟတ်ယာဉ်က ၁ စင်းပဲ။ ရပ်ထားတဲ့ယာဉ်တန်းကိုပစ်သွားတာ။ သက်ကြီးပိုင်း ခရီးသည်အမျိုးသမီး ၁ ဦး ဆုံးသွားတယ်။ သားအဖ၂ ယောက်မှာ ကလေးက ခြေသလုံးကိုထိတယ်။ အဖေက နှာခါင်းရိုးထိသွားတယ်။ ရွှေမန္တလေး ခရီးသည်တင်ကား ၁ စီးလည်း ပျက်စီးသွားတယ်”ဟုဆိုသည်။

ယင်းအပြင် အသက် ၁၀ နှစ်အရွယ်ကလေးငယ်အပါအဝင် ဒဏ်ရာရရှိသူ ၅ ဦးထက်မနည်းရှိခဲ့သည်ဟု ၎င်းက ဆက်ပြောသည်။

ထို့နည်းတူ မတ်လ၂ရက်နေ့တွင်လည်း သရက်ချောင်းမြို့နယ် ရောင်းမော်ရွာကို စစ်ကောင်စီတပ်က Mi-2 ရဟတ်ယာဉ် ၂ စီးစင်းဖြင့် ဗုံးအလုံးရေ ၂၀ ကျော် ကြဲချတိုက်ခိုက်ခဲ့သည်။

အဆိုပါဖြစ်စဉ်တွင် စစ်ဘေးတိမ်းရှောင်နေသည့်အမျိုးသမီး ၁ ဦး ဗုံးစထိမှန်သေဆုံးခဲ့ပြီး နေအိမ် ၃ လုံးထိခိုက် ပျက်စီးခဲ့ကာ ထိခိုက်ဒဏ်ရာရရှိသူများလည်းရှိခဲ့သည်ဟု ဒေသခံများ၏ပြောပြချက်အရ သိရသည်။

ထိုသို့လေကြောင်းတိုက်ခိုက်မှုများကြောင့်  သရက်ချောင်းမြို့နယ် တောင်ပျောက်တိုက်နယ်ရှိ ရောင်းမော်ရွာ၊ ဆေး ဖြတ်ကုန်း၊ ကင်းရှေ့ စသည့်ရွာများကဒေသခံများ ထွက်ပြေးတိမ်းရှောင်နေကြရသည်ဟု စစ်ရှောင်အရေးကူညီသူ  ၁ ဦးကဆိုသည်။

“ရွာ ၃ ရွာပေါင်းရင် အိမ်ခြေက ၃၀၀ ကျော်၊ ရွာလုံးကျွတ်ပဲ။ လေကြောင်းရန်ကြောက်လို့ ရွာထဲဘယ်သူမှ မနေတော့ဘူးလေ။ ဘေးပတ်ဝန်းကျင်ရွာတွေလည်း ရွှေ့တဲ့သူကရွှေ့နေကြပြီ”ဟုဆိုသည်။

ယခုမတ်လအတွင်း ထားဝယ်မြို့နယ် အရှေ့တောဒေသနှင့် သရက်ချောင်းမြို့နယ်တွင် နှစ်ဖက်ထိတွေ့တိုက်ပွဲများ အပြင် စစ်ကောင်စီတပ်၏လေကြောင်းတိုက်ခိုက်မှုများကြောင့် ဒေသခံထောင်ချီ အိုးအိမ်စွန့်ခွာထွက်ပြေးနေကြရ သည်။

ဓာတ်ပုံ – ပေးပို့။

ပုံစာ – လေကြောင်းတိုက်ခိုက်မှုကြောင့် ထွက်ပြေးတိမ်းရှောင်နေရသည့် ရောင်းမော်ရွာကပြည်သူများ။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3630

YouTube – > https://youtu.be/M_6Wem4Ju9k?si=hD_KqRB2lEvj95D8

Website – > https://thanlwinkhet.net/?p=8122