တနင်္သာရီတိုင်းကို စစ်ကောင်စီက ရဟတ်ယာဉ် ၂ စင်းဖြင့်တိုက်ခိုက်၊ ဒေသခံများတိမ်းရှောင်နေရ

တနင်္သာရီတိုင်းကို စစ်ကောင်စီက ရဟတ်ယာဉ် ၂ စင်းဖြင့်တိုက်ခိုက်၊ ဒေသခံများတိမ်းရှောင်နေရ

***************************************

သဇင်

မတ်လ ၂၊ ၂၀၂၄။

တနင်္သာရီတိုင်း ၊ ထားဝယ်ခရိုင်၊ သရက်ချောင်းမြို့နယ် ၊ ရောင်းမော်ရွာကို စစ်ကောင်စီတပ်က Mi-2 ရဟတ်ယာဉ် ၂ စင်းဖြင့် လေကြောင်းတိုက်ခိုက်မှုပြုလုပ်နေသည်ဟု ဒေသခံများထံက ကနဦးသိရှိရသည်။

ယနေ့ မတ်လ ၂ ရက် နံနက် ၅ နာရီခွဲခန့်တွင် ရောင်းမော်ရွာထိပ်၌တပ်စွဲထားသည့် စစ်ကောင်စီတပ်နှင့် ပျူစောထီးအဖွဲ့ စခန်းချနေထိုင်သည့်နေရာများကို ပြည်သူ့ကာကွယ်ရေးတပ်ဖွဲ့က ဝင်ရောက်တိုက်ခိုက်ပြီးနောက် စစ်ကောင်စီက တိုက်ပွဲဖြစ်ပွားသည့်နေရာနှင့် အနီးပတ်ဝန်းကျင်ကို လေကြောင်းပစ်ကူသုံးကာ တိုက်ခိုက်ခဲ့ခြင်းဖြစ်သည်။

ယနေ့မနက် ၅ နာရီခွဲကနေ နေ့လယ် ၁၁ နာရီ အထိ Mi-2 ရဟတ်ယာဉ် ၂ စင်းဖြင့် ရောင်းမော်ရွာကို လေကြောင်းတိုက်ခိုက်မှုများပြုလုပ်ခဲ့သည့်အတွက် ဒေသခံများထိခိုက်သေဆုံးမှုရှိသည်ဟု စစ်ဘေးရှောင်အရေးကူညီ သူ ၁ ဦးက ပြောသည်။

“လက်ရှိမှာတော့ လေယာဉ်ကငြိမ်သွားပြီ။ ရောင်းမော်ရွာထဲမှာတော့ လေကြောင်းပစ်လို့ ပြည်သူထိခိုက်မှုတော့ များနေတယ်။ ရွာထဲမှာတော့ ပြည်သူအလောင်းတွေရှိနေတယ်လို့ပြောတယ် ။ အတိအကျတော့ မသိရသေးဘူး” ဟု ဆိုသည်။

ထို့ပြင် ရောင်းမော်ရွာအနီး ဆေးဖြတ်ကုန်းမှ ဆိုင်ကယ်ဖြင့် စစ်ရှောင်နေသည့် အသက် ၂၈ နှစ်အရွယ် အမျိုးသမီး ၁ ဦး၏ ဦးခေါင်းကျည်ထိမှန်ခဲ့ပြီး ယနေ့ နေ့လယ် ၁၁ နာရီခန့်တွင် သေဆုံးခဲ့သည်ဟု ၎င်းက ဆက်လက် ပြောဆို သည်။

လက်ရှိတွင် စစ်ကောင်စီတပ်သည် လေကြောင်းအပြင် မြေပြင်ကလည်း အင်အား ၂၀၀ ကျော်ဖြင့် ပြင်ကွက်သား ကျေးရွာ၊ ရောင်းမော်ကျေးရွာအတွင်းဝင်ရောက်စီးနင်းထားပြီး ရောင်းမော်ရွာဘုန်းကြီးကျောင်းအတွင်း စစ်ဘေး ရှောင်တချို့ တိမ်းရှောင်နေသည်ဟု သရက်ချောင်းဒေသခံ ၁ ဦးက ဆိုသည်။

“ရောင်းမော်ရွာမှာတော့ အခုလက်ရှိသိရသေးတာတော့ အိမ် ၃ လုံးတော့ပျက်စီးမှုရှိတယ်။ စစ်ဘေးရှောင်တွေ တော့ ရောင်းမော်ဘုန်းကြီးကျောင်းမှာ အခုလက်ရှိ ရှောင်နေရတယ်”ဟုဆိုသည်။

ထိုကဲ့သို့ အခြေအနေများကြောင့် ရောင်းမော်ရွာအပြင် အနီးပတ်ဝန်းကျင်ရှိ ရှမ်းမတွင်း၊ ပြင်ကွက်သား၊ ဆေးဖြတ် ကုန်း၊ ကျောက်လှေကားနှင့် ကင်းရှေ့ရွာကဒေသခံများ နေရပ်စွန့်ခွာထွက်ပြေးတိမ်းရှောင်နေကြသည်။

ပြီးခဲ့သည့် ဖေဖော်ဝါရီလ ၁၇ ရက်ကနေ ၂၃ ရက်အတွင်း ဝကုန်းနှင့် ကျောက်မဲတောင်ရွာကြားတွင်  ကရင်အမျိုး သားလွတ်မြောက်ရေးတပ်မတော် – KNLA အပါအဝင် ပြည်သူ့ကာကွယ်ရေးပူးပေါင်းတပ်နှင့် စစ်ကောင်စီတပ် များကြားဖြစ်ပွားခဲ့သည့် နှစ်ဖက်ထိတွေ့တိုက်ပွဲများအတွင်း စစ်ကောင်စီတပ်၏ လေကြောင်းပစ်ခတ်မှုကြောင့် ရွာပေါင်း၁၂ ရွာက ဒေသခံ ၇,၀၀၀ထောင်ကျော် စစ်ဘေးတိမ်းရှောင်နေကြရသည်။

Video – ရောင်းမော်ရွာအတွင်း လေကြောင်းတိုက်ခိုက်မှု ရုပ်သံ။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3608

YouTube – > https://youtu.be/eEaLA1Cu5r0

Website – > https://thanlwinkhet.net/?p=8072