ပြစ်မှုကျူးလွန်မထားပါက ဖမ်းဆီးထားသည့် ထားဝယ်နည်းပညာတက္ကသိုလ် ကျောင်းအုပ်ကြီးအပါအဝင် ၃ ဦး အားလွတ်ပေးရန် DDMSC တောင်းဆို
*****************************
သံလွင်ခက်
မတ် ၁၊ ၂၀၂၄။
ပြစ်မှုကျူးလွန်ထားခြင်းမရှိပါက ဖမ်းဆီးထားသည့် ထားဝယ်နည်းပညာတက္ကသိုလ် ကျောင်းအုပ်ကြီး(ဒု-ပါမောက္ခ ချုပ် ဒေါက်တာကျော်အောင်)၊ အင်္ဂလိပ်စာဌာန ဌာနမှူး ဒေါ်စုစုလတ် နှင့် မြိုပြအင်ဂျင်နီယာဌာန ဌာနမှူး ဒေါက်တာနန္ဒာလွင်တို့အား ပြန်လည်လွတ်ပေးရန် ထားဝယ်အခြေစိုက်တော်လှန်ရေးတပ်ဖွဲ့တစ်ဖွဲ့ဖြစ်သည့် ဗထူး တပ်မတော်အား ထားဝယ်ခရိုင် ဒီမိုကရေစီအရေးလှုပ်ရှားမှုသပိတ်ကော်မတီ – DDMSC ကတောင်းဆိုလိုက်သည်။
ဖေဖော်ဝါရီ ၂၈ ရက်တွင် တနင်္သာရီတိုင်း၊ ထားဝယ်ခရိုင်၊ ထားဝယ်မြို့နယ်၊ မောင်မယ်ရှင်ကျေးရွာ၊ နည်းပညာ တက္ကသိုလ် ( ထားဝယ် )အနီး ဘုရားမဲစစ်ဆေးရေးဂိတ်နှင့်ကပ်လျှက် ဘုရားမဲဘုန်းကြီးကျောင်းအတွင်း တပ်စွဲနေထိုင်သော ကာကင်းစခန်းနှင့် ဘုရားမဲစစ်ဆေးရေးဂိတ်အား ဗထူးတပ်မတော်က ဝင်ရောက်တိုက်ခိုက်ခဲ့သည်။
ထို့နောက် နည်းပညာတက္ကသိုလ် ( ထားဝယ် ) က Non – CDM ဒု-ပါမောက္ခချုပ် ဒေါက်တာကျော်အောင်၊ ဌာနမှူး ဒေါ်စုစုလတ်နှင့် ဌာနမှူး ဒေါ်နန္ဒာလွင်တို့ ၃ ဦးအား ဗထူးတပ်မတော်တပ်ဖွဲ့ဝင်များက ဖမ်းဆီးထိန်းသိမ်းခဲ့ခြင်းဖြစ်သည်။
ဗထူးတပ်မတော်က ဖမ်းဆီးထားသည့် ထားဝယ်နည်းပညာသက္ကသိုလ် Non CDM ဝန်ထမ်း ၃ ဦးသည် ပြည်သူလူထုအပေါ် လူ့အခွင့်အရေးချိုးဖောက်မှုများ၊ အကြမ်းဖက်မှုများ၊ ရာဇဝတ်ပြစ်မှုများကျူးလွန်ထားခြင်း တစုံတရာမရှိပါက လက်နက်ကိုင်တပ်ဖွဲ့များ လေးစားလိုက်နာရမည့် နိုင်ငံတကာလူသားချင်းစာနာမှု စံနှုန်းတန်ဖိုးများအရ ချက်ချင်းပြန်လည်လွတ်ပေးစေလိုသည်ဟု အချက် ၇ ချက်ပါ တောင်းဆိုချက်ဖြင့် ဖေဖော်ဝါရီ ၂၉ ရက်ညပိုင်း တွင် DDMSC ကတိုက်တွန်းတောင်းဆိုခဲ့ခြင်းဖြစ်သည်။
ဖမ်းဆီးခံထားရသူ ၃ ဦးသည် အာဏာသိမ်းစစ်ကောင်စီ၏ စစ်ရေးလှုပ်ရှားမှုများတွင် ပါဝင်ပတ်သက်ခြင်း၊ CDM ဝန်ထမ်း/ကျောင်းသားများအပါအဝင် ပြည်သူများအပေါ် ပြစ်မှုကျူးလွန်ခြင်း၊ ခြိမ်းခြောက်ခြင်းမျိုး မရှိဟု ထား ဝယ်ခရိုင် ဒီမိုကရေစီအရေး လှုပ်ရှားမှုသပိတ်ကော်မတီ၏ ထုတ်ပြန်ချက်တွင်ဖော်ပြထားသည်။
DDMSC အဖွဲ့ဝင် ၁ ဦးက ” ဖမ်းခံလိုက်ရတဲ့ Non CDM ဆရာ၊ ဆရာမ ၃ ယောက်ထဲမှာ အရင်ထဲကရှိတဲ့ စည်ပင် ဌာနမှူး ဒေါက်တာနန္ဒာလွင်ပေါ့ဗျာ။ ကျန်တဲ့ ၂ ယောက်ကတော့ အာဏာသိမ်းပြီးကာလမှ အသစ်ရောက်လာတာ ဖြစ်မယ်။ ဒေါက်တာနန္ဒာလွင်နဲ့ပတ်သက်ပြီး ကျွန်တော်တို့လည်း မေးမြန်းစုံစမ်းတာတွေလုပ်တယ်။ မေးမြန်းတဲ့ အခါကျတော့ လူ့အခွင့်အရေးချိုးဖောက်တာတွေ၊ အကြမ်းဖက်မှုတွေမှာ ပါဝင်ပတ်သက်တာမျိုးတွေမရှိဘူး။ ကျွန်တော်တို့သိရသလောက်ဆိုရင်။ အဲဒါကြောင့်ပဲ ကျွန်တော်တို့အနေနဲ့ တောင်းဆိုတာပေါ့။ သက်ဆိုင်ရာ လက် နက်ကိုင်တပ်ဖွဲ့ကို လိုအပ်တဲ့စစ်ဆေးမေးမြန်းမှုတွေလုပ်ပြီးတော့ ပြန်လွတ်ဖို့ အဲဒါတာတွေ တောင်းဆိုတာဖြစ် တယ် ” ဟုဆိုသည်။
အကြမ်းမဖက်အာဏာဖီဆန်ရေးလှုပ်ရှားမှု – CDM သည် အတင်းအဓမ္မဖိအားပေး ပါဝင်စေခိုင်း၍ရသည့် လှုပ်ရှားမှု မျိုးမဟုတ်ဘဲ မိမိသဘောဆန္ဒအရပါဝင်လိုသူများသာ ပါဝင်လှုပ်ရှားနိုင်သည့်လှုပ်ရှားမှုဖြစ်ပြီး CDM လှုပ်ရှားမှုတွင် မပါဝင်ဘဲ Non CDM ဝန်ထမ်းအဖြစ် ဆက်လက်ရပ်တည်နေခြင်းသည် နိုင်ငံသား ၁ ဦးအနေဖြင့် ရွေးချယ်ခွင့်ရှိ သည့် အခြေခံအခွင့်အရေးဖြစ်သည်ဟု ထုတ်ပြန်ချက်တွင်ဖော်ပြထားသည်။
လက်ရှိတွင် ဖမ်းဆီးထိန်းသိမ်းထားသည့် ဒု-ပါမောက္ခချုပ် ဒေါက်တာကျော်အောင်၊ ဌာနမှူး ဒေါ်စုစုလတ်နှင့် ဌာနမှူး ဒေါ်နန္ဒာလွင်တို့ ၃ ဦးအား စစ်ဆေးမှုများလုပ်ဆောင်နေဆဲဖြစ်သည်ဟု ဗထူးတပ်မတော်က တာဝန်ရှိသူ ၁ ဦး က သံလွင်ခက်သတင်းဌာနကို ပြောသည်။
၎င်းက ” ဒီထိန်းသိမ်းထားတာနဲ့ပက်သက်ပြီး ကျွန်တော်တို့အနေနဲ့က လက်ရှိ စစ်ဆေးဆောင်ရွက်နေဆဲဖြစ်တယ်။ အဲလောက်ပဲ ပြောလို့ရဦးမယ် ” ဟုဆိုသည်။
အမျိုးသားညီညွတ်ရေးအတိုင်ပင်ခံကောင်စီ- NUCC ကထုတ်ပြန်ထားသည့် နိုင်ငံ့ဝန်ထမ်း CDM မူဝါဒတွင်လည်း CDM ဝန်ထမ်းများအပါအဝင် ပြည်သူလူထုအပေါ် လူ့အခွင့်အရေးချိုးဖောက်မှုများ၊ အကြမ်းဖက်မှုများ၊ ရာဇဝတ်မှု များကျူးလွန်သည့် Non – CDM ဝန်ထမ်းများကိုသာ ဥပဒေအတိုင်းအရေးယူမည်ဟု ပါရှိသည်။
ထို့ကြောင့် ကာကွယ်ရေးတပ်ဖွဲ့များအနေဖြင့်လည်း တော်လှန်ရေးဦးဆောင်အဖွဲ့များကလက်ခံထားသည့် စံ သတ်မှတ်ချက်များနှင့် အညီ ဆောင်ရွက်စေချင်သည်ဟု DDMSC အဖွဲ့ဝင် ၁ ဦးက ဆိုသည်။
၎င်းက ” NUCC ရဲ့ CDM ပေါ်လစီအရဆိုရင် အကြမ်းဖက်မှုတွေမှာ ပါဝင်ပတ်သက်တဲ့ဟာမျိုး ရာဇဝတ်မှုကျုးလွန် ထားတဲ့ဟာမျိုး ပြီးတော့ လူ့အခွင့်အရေးချိုးဖောက်တဲ့ဟာမျိုးတှေတွေ မရှိဘူးဆိုရင် Non – CDM ဆိုတဲ့ အကြောင်းပြချက်တစ်ခုထဲနဲ့တော့ သူတို့ကို ဖမ်းဆီးအရေးယူခွင့်မရှိဘူးလို့ နားလည်တယ်။ ပြီးတော့ NUCC ဆိုတာကလည်း ကျွန်တော်တို့တော်လှန်ရေးရဲ့ တပ်ပေါင်းစုတစ်ခုလည်းဖြစ်တယ်။ အဲတော့ ဖြစ်စေချင်တာက တော့ တော်လှန်ရေးအစိုးရကိုယ်တိုင်လက်ခံထားတဲ့ စံသတ်မှတ်ချက်တွေနဲ့အညီ လိုက်လုပ်စေချင်တယ်” ဟုဆို သည်။
အကြမ်းမဖက်အာဏာဖီဆန်ရေးလှုပ်ရှားမှု CDM တွင် ပါဝင်နေသည့် ပြည်သူ့ဝန်ထမ်းများအပေါ် လေးစားဂုဏ်ယူ ပြီး CDM လှုပ်ရှားမှုတွင်မပါဝင်သေးသည့် Non – CDM ဝန်ထမ်းများကိုလည်း CDM လှုပ်ရှားမှုတွင် ပါဝင်လာကြရန် ခြိမ်းခြောက်ဖိအားပေးခြင်းမျိုးမဟုတ်ဘဲ မိမိသဘောဆန္ဒအလျောက်ပါဝင်လာကြရန် အခွင့်အလမ်းများဖန်တီးပြီး စည်းရုံးတိုက်တွန်းကြစေလိုသည်ဟု DDMSC ကတိုက်တွန်းထားသည်။
ပုံစာ – နည်းပညာတက္ကသိုလ် ( ထားဝယ် )
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3594
YouTube – > https://youtu.be/eEaLA1Cu5r0
Website – > https://thanlwinkhet.net/?p=8046
