သံလွင်ခက်/မတ် ၂၆။
မကွေးတိုင်း၊ ချောက်မြို့နယ်အတွင်း ဂွေးချိုတိုက်နယ်ရဲစခန်းနှင့် စစ်ကော်မရှင်ယာဉ်တန်းကို တော်လှန်ရေးမဟာမိတ်ပူးပေါင်းတပ်ဖွဲ့များက ဒရုန်းဖြင့် ဗုံးကြဲတိုက်ခိုက်ရာ အရာရှိ ၄ ဦးအပါအဝင် စုစုပေါင်း ၁၀ ဦး သေဆုံးခဲ့ကြောင်း ချောက်မြို့နယ် ပကဖ ထံမှ သိရသည်။
ပြီးခဲ့သည့် မတ်လ ၁၆ ရက် နံနက် ၈ နာရီခန့်တွင် ဂွေးချိုတိုက်နယ်ရဲစခန်း၌ စစ်ကော်မရှင်လက်အောက်ခံ အရာရှိများ အစည်းအဝေးပြုလုပ်ရန် ပြင်ဆင်နေစဉ် တော်လှန်ရေးတပ်ဖွဲ့များက ဒရုန်းဖြင့် ဗုံးသီး ၄ လုံး ကြဲချတိုက်ခိုက်ခဲ့ခြင်းဖြစ်သည်။
ထို့ပြင် အဆိုပါ အစည်းဝေးသို့ လာသည့် ဂွေးပင်စခန်းမှူးနှင့် စစ်ကော်မရှင်တပ်သားများ လိုက်ပါလာသည့် ယာဉ်တန်းကိုလည်း အမှတ် (၃) ပြည်ထောင်စုလမ်းမကြီးပေါ်တွင် မဟာမိတ် ၅ ဖွဲ့က ပူးပေါင်းကာ ကြားဖြတ်တိုက်ခိုက်ခဲ့သည်။
ယင်းသို့ တိုက်ခိုက်ခံရမှုကြောင့် ချောက်မြို့နှင့် ကျိုက်ထိုမြို့နယ်ဘက်မှ စစ်ကူလာသည့် စစ်ကော်မရှင်ယာဉ်တန်းကိုလည်း တော်လှန်ရေးတပ်ဖွဲ့များက ဒရုန်းဖြင့် ထပ်မံဗုံးကြဲခဲ့တပ်သားအချို့ ထိခိုက်သေဆုံးနိုင်သည့်အပြင် လက်နက်ကြီးအချို့လည်း မီးလောင်ပျက်စီးခဲ့ကြောင်း ချောက်မြို့နယ် ပကဖ တာဝန်ခံ ကိုဘကွန်းက ပြောသည်။
ရုပ်သံ – ဂွေးချိုတိုက်နယ်ရဲစခန်းနှင့် စစ်ကော်မရှင်ယာဉ်တန်းကို တော်လှန်ရေး ပူးပေါင်းတပ်များ တိုက်ခိုက်နေစဉ်
သို့သော် အဆိုပါ စစ်ကော်မရှင်ယာဉ်တန်းပေါ်ရှိ ထိခိုက်သေဆုံးမှုအခြေအနေကို သံလွင်ခက်အနေဖြင့် သိခြားအတည်ပြုနိုင်ခြင်းမရှိပါ။
အဆိုပါ တိုက်ခိုက်မှုများနှင့်ပတ်သက်၍ ချောက်မြို့နယ် ပကဖ တာဝန်ခံ ကိုဘကွန်းက “ဂွေးပင်တိုက်နယ်ရဲစခန်းမှူး အစည်းအဝေးလာတဲ့အချိန် လမ်းမှာ ကြားဖြတ်တိုက်ခိုက်ခံရလို့ သူကတော့ လွတ်သွားတယ်။ ဒါပေမဲ့ စခန်းထဲမှာ အစည်းအဝေးတက်ဖို့ ရောက်နေတဲ့ အရာရှိ ၄ ဦးကတော့ ဗုံးဒဏ်ကြောင့် နေရာမှာတင် ပွဲချင်းပြီး သေဆုံးသွားတယ်” ဟု သံလွင်ခက်သို့ အတည်ပြုပြောကြားသည်။
အဆိုပါ စစ်ဆင်ရေးများအတွင်း စစ်ကော်မရှင်ဘက်မှ အရာရှိ ၄ ဦးနှင့် တပ်သား ၆ ဦး သေဆုံးခဲ့ပြီး တော်လှန်ရေးမဟာမိတ်တပ်ဖွဲ့များဘက်မှ အထိအခိုက်မရှိ ဆုတ်ခွာနိုင်ခဲ့သည်ဟု သိရသည်။
ယင်းစစ်ဆင်ရေးကို ချောက်မြို့နယ် ပကဖ နှင့် မကွေးခရိုင် ပကဖ တို့က ဦးဆောင်ကာ ချောက် ပကဖ လက်ရုံးစစ်ကြောင်း (Chauk Guerrilla Force)၊ မကွေးတိုင်း ပကဖ ရွေ့လျားစစ်ကြောင်း (Yenather Column)၊ မကွေးခရိုင် ပကဖ တပ်ခွဲ – ၁ (အာဠာဝက မြို့ပြပြောက်ကျားတပ်ဖွဲ့)၊ တပ်ခွဲ – ၅ (Chauk Special Attack Force) နှင့် တပ်ခွဲ – ၆ (သခင်ဖိုးလှကြီးအဖွဲ့) တို့က ပူးပေါင်းလုပ်ဆောင်ခဲ့ခြင်းဖြစ်သည်။
လက်ရှိတွင် စစ်ကော်မရှင်တပ်များက ချောက်မြို့နယ်အတွင်းသို့ စစ်ကြောင်းထိုး ဝင်ရောက်လာမှုများရှိနေသဖြင့် တော်လှန်ရေးအင်အားစုများက ဆက်လက်ခုခံကာကွယ်လျက်ရှိကြောင်း သိရသည်။
