မိုးကောင်းတံတား ပျက်စီးခဲ့သည့်အတွက် ကုန်တင်ကားရာချီပိတ်မိနေ

မိုးကောင်းတံတား ပျက်စီးခဲ့သည့်အတွက် ကုန်တင်ကားရာချီပိတ်မိနေ

*************************

နန်းဆုပန်ခန့်။

ဖေဖော်ဝါရီ ၂၈၊ ၂၀၂၄။

မွန်ပြည်နယ်၊ သထုံမြို့နယ်၊ မော်လမြိုင် – သထုံ – ရန်ကုန် ပြည်ထောင်စုကားလမ်းမပေါ်ရှိ မိုးကောင်းတံတား ယနေ့ ဖေဖော်ဝါရီ ၂၈ ရက် မနက်အစောပိုင်းတွင် မိုင်းခွဲဖျက်ဆီးခံခဲ့ရသည်ဟု ဒေသခံများထံက သိရသည်။

တံတားမိုင်းခွဲဖျက်ဆီးခံခဲ့ရသည့်အတွက် အိမ်စီးကားများသည် ရွာထဲလမ်းမှ ဖြတ်သန်းသွားလာရသော်လည်း သံလွင်ခက်က ဆက်သွယ်မေးမြန်းသည့် ညနေ ၆နာရီထိ ကုန်တင်ယာဉ်များ ဖြတ်သန်းသွားလာ၍မရသေးဘဲ ရာနှင့်ချီပိတ်မိနေသည် ဟု ဒေသခံအမျိုးသား ၁ ဦးက ပြော သည်။

၎င်းက “ ပိတ်မိတာအများကြီးပဲ။ အရှည်ကြီးပဲ။ ဟိုဘက်ဒီဘက်ဆိုတော့ ၃၀၀လောက်တော့ရှိမယ်ထင်တာပဲ။ ရွာထဲကလမ်းကျတော့ မှန်လုံတို့၊ ၁၂ ဘီးတို့၊ ၁၀ ဘီးတို့ သွားလို့မရဘူးလေ။ ရွာထဲလမ်းကတော့ ကျဥ်းတဲ့အခါကျတော့ ကားသေးပဲသွားလို့ရတာ” ဟု ဆိုသည်။

ပေါက်ကွဲမှုကြောင့် တံတား ၁ စင်းလုံးပြိုကျပျက်စီးသွားသည့်အပြင် လူနေအိမ် ၁ လုံးလည်းပျက်စီးသွားခဲ့သည်ဟု ဒေသခံအမျိုးသား ၁ ဦးကဆိုသည်။

၎င်းက “ ကြီးကြီးမားမားထိခိုက်တာတော့မရှိပါဘူး။

လူထိတာက ခဲတို့ ဘာတို့နဲ့ ရှပ်သွားတာအဲ့လောက်ပဲ။ တံတားရဲ့ ညာဘက်၊ အောက်ဘက်ခြမ်းမှာရှိတဲ့   သစ်သား ၂ ထပ်အိမ် ၁ လုံးကတော့ မိုင်းစမှန်လို့ ကြီးကြီးမားမားပျက်စီးသွားတယ်။ ကျန်တဲ့အိမ်တွေကတော့ ခဲစမှန်လို့ ပြတင်းပေါက်မှန်ကွဲတာတို့ အဲ့လောက်ပဲ “ ဟု ဆိုသည်။

မိုးကောင်းတံတားသည် ဆောက်လုပ်မပြီးသေးဘဲ မိုင်းခွဲခံခဲ့ရခြင်းဖြစ်ပြီး မည်သည့်အဖွဲ့က လုပ်ဆောင်သည်ကိုတော့ ထုတ်ပြန်ထားခြင်းမရှိပေ။

လက်ရှိအချိန်တွင် ပျက်စီးခဲ့သည့်တံတားကို ပြန်လည်ပြုပြင်မှုများ လုပ်ဆောင်နေသည်ဟု ဒေသခံများထံကသိရပြီး ဘတ်ဟိုးများဖြင့်တူးပြီး ပြန်လည်မြေဖို့နေပြီဖြစ်သည်။

ပြီးခဲ့သည့် ၂၀၂၃ ခုနှစ် ဇွန်လ ၂၉ ရက်တွင်လည်း ရန်ကုန် – မော်လမြိုင်ကားလမ်းပေါ်မှာရှိ ကျုံအိတ်တံတား မိုင်းခွဲဖျက်ဆီးခံခဲ့ရသည်။

ဓါတ်ပုံ – မိုးကောင်းလူမှုကူညီကယ်ဆယ်ရေးအသင်း

ပုံစာ -မိုးကောင်းတံတား ၁ စင်းလုံး ပြိုကျပျက်ဆီး မှုနှင့် တံတားဘေးနေအိမ် ၁ လုံး ပျက်စီးနေသည့် မြင်ကွင်း။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3559

YouTube – > https://youtu.be/eEaLA1Cu5r0

Website – > https://thanlwinkhet.net/?p=7990