ဒုက္ခသည်စခန်းက မူဆလင်(ရိုဟင်ဂျာ)များအား စစ်ကောင်စီက စစ်သင်တန်းတက်ခိုင်း
**************************************
ယမင်းဖူးပွင့်အောင်
ဖေဖော်ဝါရီ ၂၈၊ ၂၀၂၄။
ရခိုင်ပြည်နယ်အတွင်းရှိ မူဆလင် (ရိုဟင်ဂျာ) ဒုက္ခသည်စခန်းများရှိ မူဆလင်(ရိုဟင်ဂျာ)များအား စစ်ကောင်စီက စစ်သင်တန်းတက်ရန် စာရင်းကောက်ခံနေသလို ဖမ်းဆီးမှုများလည်းရှိနေသည်ဟု ဒေသခံများထံက သိရသည်။
ကျောက်တစ်လုံးမြို့နယ် မူဆလင်ဒုက္ခသည်စခန်းရှိ ဒုက္ခသည်များကို စစ်သင်တန်းတက်ရန် ဖိအားပေးမှုများရှိနေ သလို ဖမ်းဆီးမှုများလည်းရှိနေသည်ဟု ရိုဟင်ဂျာလွတ်မြောက်ရေးညွန့်ပေါင်းအဖွဲ့ ပူးတွဲတည်ထောင်သူ ဦးနေ ဆန်းလွင် က ပြောသည်။
“ကျောက်တစ်လုံးဒုက္ခသည်စခန်းက ဒုက္ခသည်တွေကို စစ်သင်တန်းတက်ဖို့ ဖိအားပေးတယ်။ အားလုံးက တညီ တညွတ်တည်းနဲ့ မတက်နိုင်ဘူးလို့ငြင်းတော့ ဖမ်းသွားတာပါ” ဟုဆိုသည်။
မြန်မာအစိုးရအဆက်ဆက်က မူဆလင်(ရိုဟင်ဂျာ)များကို နိုင်ငံသားအဖြစ် လုံးဝသတ်မှတ်ခဲ့ခြင်းမရှိသည့်အတွက် တရားဥပဒေကြောင်းအရဆိုလျှင်လည်း နိုင်ငံမဲ့နေသူများကို စစ်မှုထမ်းရန်စာရင်းကောက်ခံခွင့်၊ တပ်သားစု ဆောင်းခွင့်မရှိသော်လည်း စစ်ကောင်စီသည် အဆိုပါဥပဒေကိုချိုးဖောက်ကာ လုပ်ဆောင်နေခြင်းသာ ဖြစ်သည်။
ဘူးသီးတောင်မြို့နယ်နှင့် စစ်တွေမြို့နယ်များတွင်လည်း အလားတူဖြစ်ရပ်မျိုးကြုံတွေ့နေရပြီး မြို့ ၂ မြို့တွင် အနည်းဆုံး ဒုက္ခသည် ၆၀၀ ထက်မနည်းဖမ်းဆီးခံခဲ့ရကာ စစ်ကောင်စီက လူမျိုးရေးပြဿနာဖန်တီးနေခြင်းလည်း ဖြစ်နိုင်သည်ဟု ၎င်းက ဆက်ပြောသည်။
“မဖြစ်မနေ ဝင်ကိုဝင်ရမယ်။ စာရင်းပေးပါဆိုပြီး တောင်းတယ်။ စာရင်းမရရင် တွေ့သမျှလူငယ်တွေကို ကားပေါ် တင် ဖမ်းသွားတာမျိုးတွေ ဖြစ်နေတာပါ။ လူသားဒိုင်းအနေနဲ့ သုံးချင်တာလည်း ပါသလို၊ စစ်ရေးအကြပ်အတည်း ရောက်နေတဲ့အချိန်မှာ လူမျိုးစု ၂ စုကြား ပြဿနာတည်ပေးဖို့ ကြိုးစားနေတာလို့လည်း ယူဆရတယ်။ တကယ်လို့ ပြဿနာတစုံတရာဖြစ်လာရင် စစ်ကောင်စီက အနေချောင်မယ်လို့ စဥ်းစားနေပုံရတယ်” ဟုပြောသည်။
စစ်ကောင်စီ၏ဖမ်းဆီးခြင်းကို ရှောင်လွှဲနိုင်ရန် ဒုက္ခသည်များက လုံခြုံသည့်နေရာတွင် ခိုလှုံခွင့်ရဖို့လိုအပ်သော် လည်း မူဆလင်(ရိုဟင်ဂျာ)များတွင် လုံခြုံသည့်နေရာလည်းမရှိသလို ကာကွယ်ပေးမည့် လက်နက်ကိုင်အဖွဲ့ အစည်းလည်း မရှိဟု မူဆလင် (ရိုဟင်ဂျာ) အရေး ကူညီဆောင်ရွက်ပေးနေသူများက ဆိုကြသည်။
နိုင်ငံတကာတွင်ရှိသော မူဆလင် (ရိုဟင်ဂျာ) ၂၆ ဖွဲ့ကလည်း ကုလသမဂ္ဂလုံခြုံရေးကောင်စီသည် မူဆလင်(ရိုဟင် ဂျာ)များအား လူမျိုးတုံးသတ်ဖြတ်မှုက ကာကွယ်ပေးနိုင်ရန် နိုင်ငံတကာတရားရုံး – ICJ က ချမှတ်ထားသည့် အစီ အမံများကို လျစ်လျူရှုထားပြီး မြန်မာစစ်တပ်၏ ပြဿနာကိုဖြေရှင်းရန် တာဝန်ပျက်ကွက်နေပြီဖြစ်သည်ဟု ယနေ့ တွင်ထုတ်ပြန်သည်။
အနိမ့်ဆုံးအအနေဖြင့်တော့ ဗြိတိန်အစိုးရသည် ကုလသမဂ္ဂလုံခြုံရေးကောင်စီ အရေးပေါ်အစည်းအဝေးတစ်ရပ်ကို ဦးဆောင်ခေါ်ယူပြီး လက်တွေ့အရေးယူဆောင်ရွက်ခြင်းမရှိသည့်အပေါ် ဆွေးနွေးသင့်သည်ဟု တိုက်တွန်းထား သည်။
အမျိုးသား ညီညွတ်ရေးအစိုးရ – NUG ၊ လူ့အခွင့်အရေးဝန်ကြီးဌာန ဒုတိယဝန်ကြီး ဦးအောင်ကျော်မိုးကလည်း
“နိုင်ငံရေးအရလိုအပ်နေတဲ့ အခင်းအကျင်းတွေပေါ်လာတိုင်း အမျိုးသားအကျိုးစီးပွားနဲ့ ရေရှည်ကို ဦးစားပေးဖို့ လိုပါတယ်။ ဒီအချိန်ကာလနဲ့ ဒီအရွေ့မှာ မူဆလင်(ရိုဟင်ဂျာ) တွေရဲ့ အလွှာအသီးသီး၊ နယ်ပယ်အသီးသီးက အသိ ပညာရှင်၊ အတတ်ပညာရှင်၊ နိုင်ငံရေးသမား၊ အမျိုးသမီးတွေ၊ လူငယ်တွေ ၊ တက်ကြွလှုပ်ရှားသူများနဲ့ ဒီမိုကရေစီ အရေး၊ ဖယ်ဒရယ်ပြည်ထောင်စုအရေး ဆောင်ရွက်နေကြသူများ စတဲ့ နယ်ပယ်အသီးသီးကလူတွေက မတူတာ တွေဘေးဖယ်ပြီး စည်းလုံးညီညွတ်ဖို့အကောင်းဆုံးအချိန်ဖြစ်ပါတယ်”ဟု သူ၏ လူမှုကွန်ရက်စာမျက်နှာတွင် ရေး သားထားသည်။
ရခိုင်ပြည်နယ်အစိုးရအဖွဲ့ ပြောရေးဆိုခွင့်ရှိသူကမူ ရခိုင်ပြည်နယ်ရှိ မူဆလင်(ရိုဟင်ဂျာ)များအား ပြည်သူ့ စစ်မှုထမ်းဥပဒေအရ စစ်မှုထမ်းရန် SAC က စုဆောင်းနေသည်ဟူသော သတင်းများမှာ လုံးဝမှန်ကန်မှုမရှိဘဲ လုပ်ကြံဖန်တီးထားခြင်း ဖြစ်သည်ဟု ယနေ့ထုတ် မြန်မာ့အလင်းသတင်းစာတွင် ထည့်သွင်းပြောကြားထားသည်။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3558
YouTube – > https://youtu.be/eEaLA1Cu5r0
Website – > https://thanlwinkhet.net/?p=7986
