ဖားကန့်မြို့နယ်တွင် KIA နှင့် စစ်ကောင်စီတပ် ဆက်လက်တိုက်ပွဲပြင်းထန်နေ

ဖားကန့်မြို့နယ်တွင် KIA နှင့် စစ်ကောင်စီတပ် ဆက်လက်တိုက်ပွဲပြင်းထန်နေ

************************

ထွယ်။

ဖေဖော်ဝါရီ ၂၇ ၊ ၂၀၂၄။

ကချင်ပြည်နယ်၊ ဖားကန့်မြို့နယ်၊ တာမခန်ကျေးရွာတွင် စစ်ကောင်စီတပ်နှင့် ကချင်လွတ်မြောက်ရေးတပ်မတော် –  KIA ပူးပေါင်းတပ်တို့အကြား ယနေ့ ဖေဖော်ဝါရီ ၂၇ ရက် ညနေပိုင်းအထိ ဆက်လက်တိုက်ပွဲပြင်းထန်နေသည်ဟု ကာကွယ်ရေးတပ်ဖွဲ့များထံက သိရသည်။

တာမခန်ကျေးရွာတွင် တပ်စွဲထားသည့် စစ်ကောင်စီ၏ နယ်မြေရဲစခန်းနှင့် စစ်တပ်ကုန်းကို ယမန်နေ့ ညနေ ၄ နာရီ ခွဲခန့်ကတည်းက ကချင်လွတ်မြောက်ရေးတပ်မတော် – KIA၊ ကချင်ပြည်သူ့ကာကွယ်ရေးတပ် KPDF ပူးပေါင်းတပ်များက ဝင်ရောက်တိုက်ခိုက်နေခြင်းဖြစ်သည်။

KIA ၊ KPDF ပူးပေါင်းတပ်များက တာမခန်နယ်မြေရဲစခန်းကို  တိုက်ခိုက်သိမ်းပိုက်ပြီးနောက် ကျန်ရှိနေသည့် စစ် ကောင်စီ၏ တပ်မ – ၃၃ လက်အောက်ခံ ခြေမြန်တပ်ရင်း ခမရ – ၁၁၉ တပ်ရင်းကို ယနေ့တွင် ဆက်လက် တိုက်ခိုက်လျက်ရှိသည်။

တာမခန်နယ်မြေရဲစခန်းကို လက်လွှတ်လိုက်ရပြီးနောက် စစ်ကောင်စီတပ်သည် ယမန်နေ့ညနေ ၅ နာရီခွဲခန့် က တည်းက လေကြောင်းဖြင့် ပစ်ခတ်တိုက်ခိုက်နေပြီး ယနေ့လည်း လေကြောင်းဖြင့် ဆက်တိုက် တိုက်ခိုက်လျက်ရှိ သည်။

ယနေ့နံနက် ၁၀ နာရီခန့်တွင် ၎င်းတို့၏ တိုက်လေယာဉ် ၁ စီး လက်နက်ကြီး ထိမှန်ခဲ့သည်ဟုလည်း KIA ရှေ့တန်း ရဲဘော် ၁ ဦးက သံလွင်ခက်ကိုပြောသည်။

တိုက်ပွဲအတွင်း နှစ်ဖက်ထိခိုက်ကျဆုံးမှုရှိသည်ဟု ကာကွယ်ရေးတပ်ဖွဲ့ဝင်များနှင့် နီးစပ်သူများထံက သိရသော် လည်း ထိခိုက်သေဆုံးမှုများနှင့်ပတ်သက်၍ သံလွင်ခက်သတင်းဌာနအနေဖြင့် ဆက်လက်အတည်ပြုစုံစမ်းနေဆဲ ဖြစ်သည်။

လေကြောင်းဖြင့် တိုက်ခိုက်မှုများအပြင် ဖားကန့်မြို့ရှိ စစ်ကောင်စီဗျူဟာကုန်းကလည်း တာမခန်ကျေးရွာဘက်သို့ လက်နက်ကြီးပစ်ခတ်လျက်ရှိသည်ဟု ဖားကန့်ဒေသခံ အမျိုးသား ၁ ဦးက ပြောသည်။

၎င်းက “လက်ရှိအချိန်အထိ ဖားကန့်ဗျူဟာကုန်းကနေ ၁၅ မိနစ် ၁ ခါလောက် လက်နက်ကြီးသံကြားတုန်းပဲ”  ဟု ပြောသည်။

စစ်ကောင်စီတပ်ကပစ်ခတ်လိုက်သည့် လက်နက်ကြီးကြောင့် ယမန်နေ့တွင် တာမခန်ကျေးရွာအနီးရှိရွာက အမျိုးသား ၁ ဦး ခြေထောက်ထိမှန်ခဲ့သည်ဟု လူမှုကယ်ဆယ်ရေးအဖွဲ့ဝင် ၁ ဦးက သံလွင်ခက်ကို ပြောသည်။

“ကျွန်တော်တို့ မိတ်ဆွေပါပဲ။ လက်နက်ကြီးပစ်တော့ ခြေထောက်ထိတာ။ တစ်ဖက်တော့ ကျိုးသွားတယ်။ တစ်ဖက် တော့ မကျိုးဘူး။ ထိသွားတာ” ဟု ပြောသည်။

အဆိုပါ အမျိုးသားသည် အသက် ၅၀ ကျော်အရွယ်ရှိပြီဖြစ်ပြီး ကချင်လွတ်မြောက်ရေးတပ်မတော် – KIA ၏ ဆေး တပ်ဖွဲ့ဝင်များက ကုသပေးလျက်ရှိသောကြောင့် အသက်အန္တရာယ် မစိုးရိမ်ရဟု ၎င်းက ဆက်ပြောသည်။

ထို့ပြင် လက်နက်ကြီးထိမှန်မှုကြောင့် ယမန်နေ့ညတွင် တာမခန်ကျေးရွာရှိ နေအိမ် ၁ လုံး မီးလောင်ပျက်စီးခဲ့သည် ဟုလည်း ဒေသခံများထံက သိရသည်။

တာမခန်ကျေးရွာတွင်ဖြစ်ပွားသည့် တိုက်ပွဲကြောင့် တာမခန်ကျေးရွာဒေသခံများသည် ဖားကန့်မြို့အပါအဝင် ဆိုင်း တောင်ကျေးရွာနှင့် ဆယ်ဇင်းကျေးရွာဘက်သို့ တိုက်ပွဲတိမ်းရှောင်နေကြရသည်ဟု တာမခန်ကျေးရွာဒေသခံ အမျိုး သမီး ၁ ဦးက သံလွင်ခက်ကို ပြောသည်။

၎င်းက “ဒေသခံတွေ ရှောင်ကြပြီ။ မနေ့ကတော့ သတင်းကြားတာနဲ့ ရှောင်ကြတဲ့သူရှိတယ်။ တချို့ကျတော့လည်း မနေ့က ပိတ်မိနေပြီး တိုက်ပွဲနားချိန် ဒီနေ့မနက်မှ အကုန်ပြေးကုန်ကြတာ။ တာမခန်မှာ ဘယ်သူမှ မရှိတော့ဘူး” ဟု ပြောသည်။

ယခုနှစ် ဇန်နဝါရီ ၃ ရက်တွင်လည်း KIA ဌာနချုပ်ရှိရာ လိုင်ဇာမြို့အထက် နာဖော့ဒေသသို့ ရိက္ခာလာပို့သည်ဟု ယူဆရသည့် စစ်ကောင်စီတပ်၏ ရဟတ်ယာဉ်တစ်စီးကို KIA က ပစ်ချနိုင်ခဲ့ပြီး KIA ၊KPDF ပူးပေါင်းတပ်ဖွဲ့ဝင် များသည် ဖားကန့်မြို့နယ်ရှိ ဝှေခါစစ်တပ်ကုန်း၊ နန့်တိန်းစစ်တပ်ကုန်းများကို ဇန်နဝါရီလနှင့် ဖေဖော်ဝါရီပထမ အပတ်က သိမ်းပိုက်ထားနိုင်ခဲ့သည်။

ပုံစာ – KIA တပ်ဖွဲ့ဝင်များ။ ( ပုံ – အဟောင်း )

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3550

YouTube – > https://youtu.be/eEaLA1Cu5r0

Website – > https://thanlwinkhet.net/?p=7966