ခိုင်ကမ်းမြို့ ၉ မိုင်ဂိတ်ကို ကာကွယ်ရေးတပ်များတိုက်ခိုက်နေ

ခိုင်ကမ်းမြို့ ၉ မိုင်ဂိတ်ကို ကာကွယ်ရေးတပ်များတိုက်ခိုက်နေ

*******************

ထွယ်

ဖေဖော်ဝါရီ ၂၆၊ ၂၀၂၄။

စစ်ကိုင်းတိုင်း၊ ကလေးမြို့နယ်နှင့် နယ်နိမိတ်ချင်းထိစပ်နေသည့် ချင်းပြည်နယ် တီးတိန်မြို့နယ်၊ ခိုင်ကမ်းမြို့ရှိ ၉ မိုင်ဂိတ်စခန်းကို ယနေ့နံနက် ၄ နာရီခန့်ကစတင်ပြီး ကာကွယ်ရေးပူးပေါင်းတပ်ဖွဲ့ဝင်များက ဝင်ရောက်တိုက်ခိုက် လျက်ရှိသည်ဟု CDF Civic Defense Militia -CDM – Siyin ၏ ပြောရေးဆိုခွင့်ရှိသူထံက သိရသည်။

၎င်းက “ခိုင်ကမ်းမှာထိုင်တဲ့ ခိုင်ကမ်းရဲစခန်းကို တိုက်တာပါ။ အခုဖြစ်နေတုန်းပဲ” ဟု ပြောသည်။

စစ်ကောင်စီတပ်သည် တိုက်ပွဲဖြစ်ပွားနေစဉ် ယနေ့နံနက် ၇ နာရီခန့်က တိုက်လေယာဉ်ဖြင့် ခိုင်ကမ်းမြို့ပေါ်တွင် လှည့်လည်ဝဲပျံကာ မြို့မြောက်ဘက်ကိုပစ်ခတ်သွားသည်ဟု ခိုင်ကမ်းဒေသခံ အမျိုးသား ၁ ဦးက သံလွင်ခက်ကို ပြောသည်။

“မနက်က လေယာဉ် ၇ ကြိမ်လောက် ဝဲသွားတယ်။ လက်နက်ကြီးလည်း ခိုင်ကမ်းမြို့မြောက်ဘက်က မြောင်းထဲ ကိုကျတာရှိတယ်” ဟု ၎င်းက ပြောသည်။

အဆိုပါတိုက်ပွဲကြောင့် နှစ်ဖက်ထိခိုက်ကျဆုံးမှုရှိနေပြီး လတ်တလောတွင် ကာကွယ်ရေးတပ်ဖွဲ့ဝင် ၃ ဦး ကျဆုံး ထားကြောင်း သိရသည်ဟု ခိုင်ကမ်းဒေသခံအမျိုးသားက ပြောသည်။

ခိုင်ကမ်းမြို့သည် ကလေးမြို့နှင့် ၉ မိုင်ခန့်အကွာတွင်တည်ရှိပြီး မြန်မာနိုင်ငံအနောက်ဘက်ရှိ ကလေးမြို့နယ်မှ ချင်းတောင်တန်းသို့ တက်မည့် လမ်းဆုံ၊ လမ်းခွတွင် တည်ရှိသည်။

အဆိုပါ ခိုင်ကမ်းမြို့သည် ယခင် ၂၀၁၄ သန်းခေါင်စာရင်းအရ တီးတိန်မြို့နယ်၊ ထေးဇန်ကျေးရွာအုပ်စုတွင် ပါဝင်ပြီး ၂၀၁၆ ခုနှစ်တွင် ခိုင်ကမ်းမြို့အဖြစ် သတ်မှတ်ခံခဲ့ရပြီး အိမ်ခြေ ၁,၀၀၀ ဝန်းကျင်ရှိသည့် မြို့ဖြစ်သည်။

ကလေးမြို့အနောက်ဘက် ချင်းပြည်နယ်စပ်တွင်ဖြစ်ပွားနေသည့် တိုက်ပွဲများကြောင့် ခိုင်ကမ်းမြို့ဒေသခံအချို့ နေအိမ်မှထွက်ပြေးတိမ်းရှောင်နေသည်မှာ ၁ ပတ်ခန့်ရှိနေပြီဖြစ်ပြီး အချို့မှာ ယနေ့နံနက်က တိမ်းရှောင်ခဲ့ကြ သည်ဟု ဒေသခံများထံက သိရသည်။

ကာကွယ်ရေးမဟာမိတ်တပ်ဖွဲ့ဝင်များသည် ယခုရက်ပိုင်းအတွင်း ကလေးမြို့နယ်နှင့် ချင်းပြည်နယ်စပ်ရှိ စစ် ကောင်စီလက်အောက်ခံ ပျူစောထီးအဖွဲ့ဝင်များတပ်စွဲထားသောကျေးရွာဟု သတင်းထွက်နေသည့် ကလေးမြို့ အနောက်ဘက်ပိုင်းရှိ စက္ကန့်ကျေးရွာကိုလည်း ဖေဖော်ဝါရီ ၂၂ ရက်တွင် ကာကွယ်ရေးတပ်ဖွဲ့ဝင်များက ထိန်းချုပ်ထားနိုင်ပြီဟု သိရသည်။

အဆိုပါ စက္ကန့်ကျေးရွာတွင် ချင်းအမျိုးသားကာကွယ်ရေးတပ်ဖွဲ့ – CNDF ၏ ရဲဘော် ၁ ဦး မိုင်းရှင်းလင်းရေး ပြုလုပ်စဉ် ကျဆုံးခဲ့ရပြီး ဖေဖော်ဝါရီ ၂၃ ရက်တွင်လည်း တိုက်ပွဲစစ်ဆင်ရေးတစ်နေရာမှ တစ်နေရာသို့ ရွှေ့ပြောင်း သွားလာစဉ် ချင်းအမျိုးသားကာကွယ်ရေးတပ်ဖွဲ့ CNDF ၏ ဒုစစ်ဦးစီးချုပ်နှင့် ရဲဘော် ၂ ဦး ကလေးမြို့နယ်၊ မန်တော်ကျေးရွာအနီး၌ ခြုံခိုတိုက်ခိုက်ခံရကာ ကျဆုံးခဲ့သည်။

၂ ရက်အတွင်း ကလေးမြို့ကို စစ်ကောင်စီ၏လက်နက်ကြီးပစ်ခတ်ခဲ့သဖြင့် ကလေးသူငယ်အပါအဝင် အရပ်သား ပြည်သူ ၅ ဦး လက်နက်ကြီးကျည်ထိမှန်မှုကြောင့်သေဆုံးခဲ့ပြီး ဒဏ်ရာရရှိသူများလည်းရှိသည်ဟု ဒေသခံများ ထံက သိရသည်။

နှစ်ဖက်တိုက်ပွဲများကြောင့် ကလေးမြို့၊ ဗိုလ်ချုပ်လမ်းပေါ်ရှိ မြို့တွင်းပိုင်းရပ်ကွက်များက ဒေသခံများလည်း ထွက် ပြေးတိမ်းရှောင်နေရပြီး အချို့မှာ နေအိမ်တွင်းပိတ်မိနေကြသည်ဟုလည်း ကလေးမြို့ ဒေသခံများက သံလွင်ခက်ကို ပြောသည်။

ဓာတ်ပုံ – Zalen။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3536

YouTube – > https://youtu.be/eEaLA1Cu5r0

Website – > https://thanlwinkhet.net/?p=7936