နှစ် ၃၀ နီးပါးတပ်စွဲထားသည့်ဗျူဟာစခန်းအား စစ်ကောင်စီတပ်စွန့်ခွာထွက်ပြေး
**********************************
နန်းဆုပန်ခန့်
ဖေဖော်ဝါရီ ၂၆၊ ၂၀၂၄။
ကေအဲန်ယူထိန်းချုပ်နယ်မြေ၊ တပ်မဟာ ၅၊ မူတြော်ခရိုင်၊ လူသောမြို့နယ်၊ ယယ်မူပလော ကျေးရွာအုပ်စု အတွင်းရှိ ခမရ – ၃၄၉ အခြေချရာ ဗျူဟာစခန်းဖြစ်သည့် မော်ဖူး (ရိုးစလင်းတပ်စခန်း) အား စစ်ကောင်စီတပ်သား များကစွန့်ခွာပြီး ထွက်ပြေးသွားကြောင်း တော်လှန်ရေးလူမှုကွန်ရက်စာမျက်နှာက ယနေ့ ဖေဖော်ဝါရီ ၂၆ ရက်တွင် သတင်းထုတ်ပြန်သည်။
၁၉၉၅ ခုနှစ် ဇန်နဝါရီလဆန်းပိုင်းတွင် ကေအဲန်ယူ-ဗဟိုဌာနချုပ်ဖြစ်သည့် မာနယ်ပလောကို မြန်မာစစ်တပ်က သိမ်းပိုက်နိုင်ခဲ့ပြီး နောက်ထပ် ၂ နှစ်အကြာ ၁၉၉၇ ခုနှစ်ကစ၍ ၂၀၂၄ ခုနှစ်အထိ ၂၇ နှစ်ကြာ အဆိုပါ တပ်စခန်း တွင် မြန်မာစစ်တပ်က ဝင်ရောက်တပ်စွဲထားနိုင်ခဲ့ခြင်းဖြစ်သည်။
ယင်းတပ်စခန်းကို ဖေဖော်ဝါရီလ ၂၄ ရက်တွင် ကရင်အမျိုးသားလွတ်မြောက်ရေးတပ်မတော် – KNLA က ဦး ဆောင်သိမ်းပိုက်ခဲ့ခြင်းဖြစ်သည်ဟု Force for Federal Democracy – FFD က ယနေ့တွင် ထုတ်ပြန်ဖော်ပြ သည်။
တပ်မဟာ ၅ နယ်မြေအတွင်းရှိ မော်ဖူးတပ်စခန်းအား ဖေဖော်ဝါရီလ ၁၇ ရက်ကစတင်၍ ၂၄ ရက်အထိ FFD Drone တပ်ဖွဲ့က ဗုံးသီးအလုံးပေါင်း ၄၀ ကျော်ကြဲချခဲ့သလို KNLA တပ်ဖွဲ့ကလည်း စနိုက်ပါဖြင့် ပစ်ကူပေး တိုက်ခိုက်ခဲ့ခြင်းဖြစ်သည်။
ပြီးခဲ့သည့် ဖေဖေါ်ဝါရီလ ၁၀ ရက်၊ နံနက် ၆ နာရီအချိန်တွင် လယ်ကလေးကျိုးရှိ ခမရ – ၃၄၉ သည် ၎င်း တို့၏တပ်စခန်းအားစွန့်ခွာကာ ကျူလူတွင်တပ်စွဲထားသည့်တပ်ဖွဲ့များနှင့် ပြန်လည်ပူးပေါင်းခဲ့သည်။
ထို့နောက် ဖေဖေါ်ဝါရီလ ၁၁ ရက်၊ နံနက် ၆ နာရီအချိန်တွင် ကျူလူစခန်းအားထပ်မံစွန့်ခွာကာ ယခု ဖေဖော်ဝါရီလ ၂၄ ရက်ကသိမ်းပိုက်နိုင်ခဲ့သည့် မော်ဖူးဗျူဟာစခန်းသို့ ထပ်မံ၍ပူးပေါင်းခဲ့သည်။
ယခုတဖန် စစ်ကောင်စီတပ်၏ ခမရ – ၃၄၉ တပ်သားများသည် မော်ဖူးတပ်စခန်းမှ မူတြော်ခရိုင်၊ လူသောမြို့နယ်၊ ဖလပ်ခို ကျေးရွာအုပ်စုအတွင်းရှိ ကူခိုတပ်စခန်းသို့ နောက်တဆင့် ထပ်မံဆုတ်ခွာသွားခဲ့သည်ဟု မူတြော်သတင်း ၏ ထုတ်ပြန်ချက်အရသိရသည်။
ဓာတ်ပုံ – Force for Federal Democracy
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3535
YouTube – > https://youtu.be/eEaLA1Cu5r0
Website – > https://thanlwinkhet.net/?p=7932
