စစ်ကား ၁၇ စီးပါ ယာဉ်တန်း ကျောက်မဲတောင်စခန်းသို့ ၃ စီးသာရောက်ရှိ

စစ်ကား ၁၇ စီးပါ ယာဉ်တန်း ကျောက်မဲတောင်စခန်းသို့ ၃ စီးသာရောက်ရှိ

*********************************

သဇင်

ဖေဖော်ဝါရီ ၂၄၊၂၀၂၃။

တနင်္သာရီတိုင်း ၊ ထားဝယ်မြို့နယ် အရှေ့တောဒေသကို တပ်အင်အား ၃၀၀ ကျော်၊ စစ်ကား ၁၇ စီးဖြင့် စစ်ကြောင်းထိုးလာသည့်စစ်ယာဥ်တန်းသည် ကာကွယ်ရေးပူပေါင်းတပ်ဖွဲ့များ၏ တိုက်ခိုက်ခံရမှုကြောင့် ကျောက် မဲတောင်စခန်းသို့ ၃ စီးသာရောက်ရှိနိုင်ခဲ့သည်ဟု ကာကွယ်ရေးတပ်ဖွဲ့ဝင်များ၏ ပြောပြချက်အရသိရသည်။

အဆိုပါစစ်ယာဉ်တန်းသည် ပြီးခဲ့သည့်ဖေဖော်ဝါရီလ ၁၆ ရက်ကစ၍  ထားဝယ်အရှေ့တောဒေသဖြစ်သည့် သင်္ကန်း တုန်းရွာကို စတင်စစ်ကြောင်းထိုးလာခဲ့ရာ ကရင်အမျိုးသားလွတ်မြောက်ရေးတပ်တော် – KNLA အပါအဝင် PDF ပူးပေါင်းတပ်များနှင့် ယနေ့အထိ ထိတွေ့တိုက်ပွဲဆက်လက်ဖြစ်ပွားနေသည်။

အချိန်တစ်ပတ်ကျော်ကြာဖြစ်ပွားနေသည့် ယင်းတိုက်ပွဲများအတွင်း အဆိုပါယာဉ်တန်းပါ စစ်ကောင်စီတပ်၏ ရိက္ခာနှင့် စစ်လက်နက်ပစ္စည်းပို့ဆောင်ရေးကားများကို   ပူးပေါင်းတပ်ဖွဲ့များက တိုက်ခိုက်ဖျက်ဆီးသိမ်းပိုက်နိုင်ခဲ့ ပြီး ဖေဖော်ဝါရီ ၂၃ ရက်တွင် ကျောက်မဲတောင်နယ်မြေရဲစခန်းသို့ ၃ စီးသာ ရောက်ရှိနိုင်ခဲ့သည်ဟု ထားဝယ်အရှေ့ တောနယ် ကာကွယ်ရေးတပ်ဖွဲ့ဝင် ၁ ဦးကဆိုသည်။

“ကျွန်တော်တို့တိုက်ပွဲဖြစ်ပွားတဲ့နေရာတွေက သင်္ကန်းတုန်းရွာနဲ့ ဝကုန်း-ကျောက်မဲတောင်ကြား ၂၅ မိုင်လို့ခေါ်တဲ့ နေရာမှာဖြစ်တာ၊ တောက်လျှောက်ပဲ။ ဖေဖော်ဝါရီလ ၁၉ နဲ့ ၂၁ မှာ စစ်ကားတွေကို ကျွန်တော်တို့ဖျက်ဆီးနိုင် ခဲ့တယ်။၂ ၃ရက်နေ့ရောက်တော့ ကျောက်မဲတောင်ကို စစ်ကား ၃ စီးပဲ ရောက်လာတော့တယ်လို့ ကျွန်တော်တို့ သိရပါတယ်။ ခုနေ့မှာလည်း ကျောက်မဲတောင်မှာ တိုက်ပွဲတွေဆက်ပြီးဖြစ်နေတုန်းပဲ”ဟုဆိုသည်။

အဆိုပါတိုက်ပွဲများအတွင်း စစ်ကောင်စီတပ်ဖွဲ့ဝင် ၃၀ ဦးကျော်သေဆုံးပြီး လက်နက်၊အကြီးအငယ် ၃၄ လက် သိမ်း ဆည်းရမိကာ ပြည်သူ့ကာကွယ်ရေးပူးပေါင်းတပ်ဖွဲ့ဝင်ဘက်က ၇ ဦးသေဆုံးခဲ့သည်ဟု တော်လှန်ရေးရဲဘော်များ က အတည်ပြုပြောဆိုသည်။

ရှေ့တန်းရောက်ရဲဘော် ၁ ဦးက” ၁၉ရက်နေ့က ကျွန်တော်တို့ရဲဘော်ဘက်က ၁ ယောက်ကျတယ်။၂၁ ရက်နေ့ တစ်နေ့တည်းကို ၆ ယောက်ကျတယ်။ အဲ့နေ့မှာကျသွားတဲ့ ၁ ယောက်က ကျွန်တော့ဘေးနားကပါပဲ”ဟုဆိုသည်။

ယင်းအပြင် ဖေဖော်ဝါရီလ၂၂ ရက်တွင် စစ်ကောင်စီက Mi 2 အမျိုးအစားရဟတ်ယာဉ်ဖြင့် တိုက်ပွဲဖြစ်ပွားရာ ၂၅ မိုင်အနီးတွင် ဗုံး ၁၀ လုံးထက်မနည်းကို ၂ ကြိမ်လာရောက်ကြဲချခဲ့သလို ဖေဖော်ဝါရီလ ၂၃ ရက်တွင်လည်း ဗုံး ၈ လုံး လာရောက်ကြဲချခဲ့သေးသည်ဟု သိရသည်။

နှစ်ဖက်ထိတွေ့‌တိုက်ပွဲများအပြင် စစ်ကောင်စီ၏လေကြောင်းတိုက်ခိုက်မှုကြောင့်  ဝကုန်း၊ သင်္ကန်းတုန်း၊ ကျောက် မဲတောင်အနီးရှိ ကျေးရွာ ၁၀ ရွာက ဒေသခံများ ထွက်ပြေးတိမ်းရှောင်နေကြရသည်။

လက်ရှိတွင် ထားဝယ်အရှေ့တောဒေသရှိ မေတ္တာမြို့ရဲစခန်းနှင့် ဟိန္ဒားကျေးရွာရှိ စစ်ကောင်စီတပ်စခန်းကို တော်လှန်ရေးတပ်များက မီးရှို့လိုက်သည်ဟု တနင်္သာရီတိုင်းအခြေစိုက်သတင်းမီဒီယာများတွင် ဖော်ပြနေကြ သော်လည်း သံလွင်ခက် က သီးခြားအတည်မပြုနိုင်သေးပါ။

တနင်္သာရီတိုင်းအခြေပြု သုတေသနအဖွဲ့ဖြစ်သည့် FE5 Tanintharyi ၏ အစီရင်ခံစာအရ အာဏာသိမ်းကာလ အတွင်း တနင်္သာရီတိုင်းတွင် နေရပ်စွန့်ခွာထွက်ပြေးတိမ်းရှောင်နေရသည့် ဒေသခံပြည်သူ ၄၄,၀၀၀ ကျော် ရှိသည်ဟုသိရသည်။

ပုံစာ-တိုက်ခိုက်ဖျက်ဆီးခံရသည့် စစ်ယာဉ်တန်းမြင်ကွင်း။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3506

YouTube – > https://youtu.be/eEaLA1Cu5r0

Website – > https://thanlwinkhet.net/?p=7910