တိုက်ပွဲဖြစ်ပွားနေသည့် ဆင်ဘိုမြို့အနီးကို စစ်ကောင်စီကလေကြောင်းပစ်ခတ်

တိုက်ပွဲဖြစ်ပွားနေသည့် ဆင်ဘိုမြို့အနီးကို စစ်ကောင်စီကလေကြောင်းပစ်ခတ်

***********************

ထွယ်

ဖေဖော်ဝါရီ ၂၄၊ ၂၀၂၄။

ကချင်ပြည်နယ်၊ မြစ်ကြီးနားမြို့နယ်အတွင်းရှိ ဆင်ဘိုမြို့ရှိ စစ်ကောင်စီ၏ ခြေလျင်တပ်ရင်း ခလရ – ၁၄၁ ကို ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်တို့က ယနေ့နံနက် ၇ နာရီခွဲခန့်ကစတင်၍ ဝင်ရောက် တိုက်ခိုက်လျက်ရှိသည်ဟု ဒေသခံများထံက သိရသည်။

တိုက်ပွဲဖြစ်ပွားနေစဉ်တွင် စစ်ကောင်စီတပ်က လေယာဉ် ၂ စင်းဖြင့် မွန်းလွဲ ၁၂ နာရီခွဲခန့်တွင် လာရောက်ဗုံးကြဲ တိုက်ခိုက်ခဲ့သည်ဟု ဆင်ဘိုဒေသခံ အမျိုးသား ၁ ဦးက သံလွင်ခက်ကို ပြောသည်။

၎င်းက “အခုလေးတင် လေယာဉ် ၂ စင်းလာပြီး အလုံးကြီး ၂ လုံးချသွားပြီ။ စက်သေနတ်လည်းပစ်တယ်။ မြို့ထဲတော့ မဟုတ်ဘူး။ တိုက်ပွဲဖြစ်နေတဲ့ စစ်တပ်နားတလျှောက်ကို ပစ်တာ” ဟု ပြောသည်။

အဆိုပါ စစ်ကောင်စီ၏ ခြေလျင်တပ်ရင်း ခလရ – ၁၄၁ သည် ဆင်ဘိုမြို့၏ အနောက်ဘက် ၃ မိုင်ခန့်အကွာတွင် တည်ရှိပြီး ကချင်လွတ်မြောက်ရေးတပ် KIA နှင့် ပူးပေါင်းတပ်က ဖေဖော်ဝါရီလ ဒုတိယပတ်ကတစ်ကြိမ် ထိုးစစ် ဆင်တိုက်ခိုက်ခဲ့သည်။

ယင်းတိုက်ပွဲတွင် မြို့တွင်းရှိ ရဲစခန်းနှင့် ဌာနဆိုင်ရာအဆောက်အအုံများအားလုံးကို သိမ်းပိုက်နိုင်ခဲ့သော်လည်း စစ်ကောင်စီ၏ ဆင်ဘိုမြို့ခြေကုပ်စခန်းဖြစ်သည့် ခလရ – ၁၄၁ ကို ၁ ရက်သာ ထိုးစစ်ဆင်ပြီး ရပ်နားထားခဲ့သည်။

ထို့နောက် ယနေ့နံနက်တွင် ဒုတိယအကြိမ် ထပ်မံထိုးစစ်ဆင်တိုက်ခိုက်ခဲ့ခြင်း ဖြစ်သည်။

မြစ်ကြီးနားမြို့နယ်၊ ဆင်ဘိုမြို့တွင် ကချင်လွတ်မြောက်ရေးတပ်မတော် – KIA၊ ပူးပေါင်းတပ်နှင့် စစ်ကောင်စီ တပ်ဖွဲ့ဝင်တို့အကြား တိုက်ပွဲပြင်းထန်စွာဖြစ်ပွားနေသဖြင့် ဆင်ဘိုမြို့ပေါ်ရှိ ဧရာဦးရပ်ကွက်အပါအဝင် အောင်မင်္ဂ လာရပ်ကွက်နှင့် အောင်ချမ်းသာရပ်ကွက်က ဒေသခံ ၂,၀၀၀ ခန့်သည် ဆင်ဘိုမြို့အရှေ့ဘက် ဝဲကြီးကျေးရွာနှင့် ဆင်ဘိုမြို့အထက်ပိုင်း တာဟိုးနားကျေးရွာ၊ ညောင်ပင်သာကျေးရွာ၊ ဆွန်ဒူကျေးရွာနှင့် မံဖွားကျေးရွာဘက်သို့ တိမ်းရှောင်နေသည်မှာ ၂ ပတ်ခန့်ရှိပြီဟု ဒေသခံအမျိုးသား ၁ ဦးက ပြောသည်။

ဆင်ဘိုမြို့သည် ဧရာဝတီမြစ်ကမ်းဘေးတွင်တည်ရှိသည့် မြို့ဖြစ်ပြီး ဧရာဝတီမြစ် ပထမမြစ်ကျဉ်း၏ မြစ်ညာဘက် ၁၄ မိုင်ခန့်အကွာတွင် တည်ရှိသည်။ ယခင်က ကျေးရွာ ဖြစ်သော်လည်း ၂၀၀၂ ခုနှစ်တွင် မြို့အဖြစ် သတ်မှတ် ခံခဲ့ရသည်။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3504

YouTube – > https://youtu.be/eEaLA1Cu5r0

Website – > https://thanlwinkhet.net/?p=7906