BGF ဘက်တံဆိပ်ပြောင်းလဲမည့်အပေါ် ကရင်လူထုကြိုဆို

BGF ဘက်တံဆိပ်ပြောင်းလဲမည့်အပေါ် ကရင်လူထုကြိုဆို

***********************

နန်းဆုပန်ခန့်

ဖေဖော်ဝါရီ ၂၄၊ ၂၀၂၄။

ကရင်နယ်ခြားစောင့်တပ် – BGF သည် ကရင်အမျိုုးသားတပ်မတော် – KNA ဘက်တံဆိပ်သို့ပြောင်းလဲမည်ဟု သတင်းများထွက်ပေါ်နေသည့်အပေါ် ကရင်လူထုကကြိုဆိုလျက်ရှိသည်ဟု ကရင်ပြည်သူများထံက သိရသည်။

BGF ၏ ဘက်တံဆိပ်ပြောင်းလဲမှုသည် ကရင်လူထုနှင့် လက်နက်ကိုင်တပ်ဖွဲ့များအတွက် ရန်သူ့အင်အား လျော့ နည်းလာခြင်းလည်းဖြစ်သည်ဟု ကရင်ပြည်သူ လူငယ်အမျိုးသား ၁ ဦးက သံလွင်ခက်ကိုပြောသည်။

၎င်းက “ကောင်းတာပေါ့၊ ကြိုဆိုတယ်လေ၊ ကိုယ်နဲ့ဘက်တူရင် ကိုယ့်အတွက် ရန်သူအင်အားနည်းသွားတာပေါ့ ဗျာ။ ဒါအတွက် ဝမ်းသာမှုမျိုးခံစားရပြီး သူတို့အတွက် အမှန်တရားကိုလက်ခံလာနိုင်တာမျိုးလို့ ကျွန်တော်မြင် တယ်” ဟုဆိုသည်။

BGF နှင့်နီးစပ်သူများကတော့ BGF တပ်သည် ၎င်း၏ ယခင်ဘက်တံဆိပ်အား ပြောင်းလဲအသုံးပြုရန် ဖေဖော်ဝါရီ ၂၂ ရက်တွင် အတည်ပြုခဲ့သည်ဟု ဆိုသည်။

ယခင် ကရင်နယ်ခြားစောင့်တပ် BGF ဘက်တံဆိပ်အား ကရင်အမျိုးသားတပ်မတော် KNA ဘက်တံဆိပ်သို့ ပြောင်းရန် BGF တပ်ဖွဲ့၏ ခေါင်းဆောင်ပိုင်းများက အတည်ပြုခဲ့ခြင်းဖြစ်သည်ဟု အမည်မဖော်လိုသည့် BGF တပ် ဖွဲ့ဝင် ၁ ဦးက သံလွင်ခက်သတင်းဌာနကိုပြောသည်။

၎င်းက “ အစည်းအဝေးမှာ မနေ့ကတော့ ဆုံးဖြတ်ချက်ချပြီးသွားပြီ။ ပြောင်းမယ်လို့ ရည်ရွယ်ထားတယ်ပေါ့နော်။ အခုပြောင်းဖို့အတွက်ကိုလည်း လူကြီးတွေအကုန်လုံး အတည်ပြုပြီးသွားပြီ။ ပြောင်းတာတော့ မပြောင်းရသေးဘူး ပေါ့နော် “ ဟု ဆိုသည်။

ပြီးခဲ့သည့် ဖေဖော်ဝါရီလ ၂၀ ရက်တွင်လည်း ကရင်အမျိုးသားအစည်းအရုံး – KNU ဥက္ကဋ္ဌ ပဒိုစောကွယ်ထူးဝင်း က ကရင်လက်နက်ကိုင်အဖွဲ့အစည်းများ တစုတစည်းတည်းဖြစ်ရန်ဆန္ဒရှိပြီး ကော်သူးလေပြည်ကို တည်ထောင်ရန် လုပ်ဆောင်နေသည်ဟု KNU ၏ လူမှုကွန်ရက်စာမျက်နှာကတဆင့် ပြောကြားခဲ့သည်။

“ကျွန်တော်တို့ရဲ့ ကရင်အမျိုးသားအစည်းအရုံးအဖွဲ့အစည်း – KNU ရဲ့လုပ်ဆောင်မှုအောက်မှာ ကရင့်တော်လှန် ရေးအတွင်း ကရင်အမျိုးသားလွတ်မြောက်ရေးတပ်မတော် – KNLA ၊ ဒုတိယကတော့ DKBA လက်နက်ကိုင် ကရင်ဗုဒ္ဓဘာသာအဖွဲ့အစည်း၊  တတိယကတော့ KNU / KNLA လက်နက်ကိုင် ကရင်ငြိမ်းချမ်းရေး အဖွဲ့အစည်း၊ နောက်တစ်ခုက DKBA ကနေတဆင့် ပေါ်ပေါက်လာတဲ့ BGF အဖွဲ့အစည်းတွေဖြစ်တယ်၊ ဒီအဖွဲ့အစည်းတွေ ဘယ် လိုခွဲထွက်ကွဲပြားနေပါစေ၊ ကျွန်တော်တို့အားလုံးနားလည်တာကတော့ ကရင်တစ်မျိုးသားလုံး မျှော်လင့်တောင့်တ နေတဲ့ ကရင်ပြည် ( ခေါ် ) ကော်သူးလေပြည် ရရှိဖို့အတွက် လုပ်ဆောင်နေတာပဲဖြစ်တယ် ” ဟု ပြောကြားခဲ့ ခြင်းဖြစ်သည်။

ကရင်ခေါင်းဆောင်များ၏ ပြောကြားချက်များအတိုင်း ကရင်လက်နက်ကိုင်အဖွဲ့အစည်းများအနေဖြင့် လက်ရှိတွင် တစုတစည်းတည်း နေထိုင်သင့်ပြီဖြစ်သလို ဘက်တံဆိပ်ပြောင်းလျှင် ပိုမိုစည်းလုံးလာနိုင်သည်ဟု BGF တပ်ဖွဲ့ဝင် ၁ ဦးကလည်းဆိုသည်။

၎င်းက “ လူကြီးတွေပြောတဲ့အတိုင်းပဲ။ ကျွန်တော်တို့ ကရင်လူမျိုးတွေက တစုတစည်းနဲ့ပြန်ပြီးတော့ စည်းစည်း လုံးလုံးနဲ့ ညီညီညွတ်ညွတ်နဲ့ နေသင့်တာကတော့ကြာပါပြီ။ ဘက်တံဆိပ်တွေ ပြန်ပြီးတော့လဲမယ့်အပေါ်မှာလည်း ကျွန်တော်တို့ ကရင်လူမျိုးတွေက ပိုပြီးတော့စည်းလုံးသွားတာပေါ့နော်။ ကျွန်တော်တို့ ကရင်လူမျိုးတွေ စည်း စည်းလုံးလုံး ပြန်ဖြစ်လာနိုင်မယ်လို့လည်း ကျွန်တော်မြင်တယ်ပေါ့နော်။ ကျွန်တော်လည်း ပိုပြီးတော့ သဘောကျ တယ်” ဟု ဆိုသည်။

BGF ဘက်တံဆိပ်ဖြင့်နေခဲ့စဉ်တွင် စစ်ကောင်စီကထောက်ပံ့သည့်လစာကိုယူခဲ့ပြီး ၂၀၂၁ ခုနှစ် စစ်တပ်အာဏာ သိမ်းပြီးနောက်ပိုင်းတွင် စစ်ကောင်စီတပ်က ၎င်းတို့နှင့်အတူ စစ်ဆင်ရေးတွင်ဝင်ရောက်ရန် တိုက်တွန်းမှုများ လည်း ရှိခဲ့သည်။

စစ်ကောင်စီတပ်နှင့်အတူ စစ်ဆင်ရေးထွက်ပြီး ကရင်လူမျိုးအချင်းချင်း ပြန်လည်တိုက်ခိုက်ရမည်ကို မလိုလား သလို ကရင်လူထုကို စိတ်ချမ်းသာစေချင်သည်ဟု BGF တပ်ဖွဲ့ဝင် ၁ ဦးကဆိုသည်။

၎င်းက “ ကျွန်တော်တို့က သူတို့နဲ့ ပူးပေါင်းပြီးတော့ စစ်ဆင်ရေးတွေဘာတွေ ထွက်ရတယ်၊ ပြုရတယ်ဆိုတော့ ကိုယ့်ကရင်လူမျိုးအချင်းချင်းပဲကိုယ်ပြန်တိုက်နေရတာ။ အဲဒီအပေါ်မှာ ကျွန်တော်တို့ကလည်းမလုပ်ချင်ဘူး။ ကျွန် တော်တို့ပြည်သူလူထုစိတ်ချမ်းချမ်းသာသာနေနိုင်ဖို့ပဲ နဂိုကတည်းက ရည်ရွယ်ခဲ့တာ” ဟု ဆိုသည်။

ကရင်နယ်ခြားစောင့်တပ် – BGF တပ်အနေဖြင့်  စစ်ကောင်စီ၏ လက်အောက်ခံအဖြစ်မနေတော့သလို စစ်ကောင် စီထံက လစာနှင့် ရိက္ခာမယူဘဲ သီးခြားရပ်တည်တော့မည်ဟု ပြီးခဲ့သည့် ဇန်နဝါရီလအတွင်းတွင် ပြောဆိုခဲ့သည်။

BGF ကို ဖျက်သိမ်းပြီး KNA – Karen National Army အဖြစ် ပြောင်းလဲဖွဲ့စည်းသွားမည်ဟု သတင်းများ ထွက်ပေါ်နေသည့်နှင့်ပတ်သက်၍ အတည်မပြုသေးဟု ကရင်နယ်ခြားစောင့်တပ်ဖွဲ့ ဗိုလ်မှူးကြီး စောချစ်သူ က ပြီးခဲ့သည့်ရက်ပိုင်းတွင် သတင်းမီဒီယာများကိုဖြေကြားထားသည်။

BGF သည် ဒီမိုကရေစီအကျိုးပြုကရင့်တပ်မတော် – DKBA က ခွဲထွက်ပြီး ၂၀၁၀ ခုနှစ် ဩဂုတ်လ ၂၀ ရက်တွင် BGF တပ်အဖြစ် စတင်တည်ထောင်ခဲ့ခြင်းဖြစ်သည်။

ပုံစာ – ပြောင်းလဲရန်အတည်ပြုခဲ့သည်ဟု သတင်းထွက်ပေါ်နေသော ကရင်အမျိုးသားတပ်မတော် KNA ဘက် တံဆိပ်။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3491

YouTube – > https://youtu.be/eEaLA1Cu5r0

Website – > https://thanlwinkhet.net/?p=7883