မံစီတွင် တိုက်ပွဲဆက်လက်ပြင်းထန်၊ လေကြောင်းတိုက်ခိုက်မှုကြောင့် ဒေသခံ ၇ ဦးသေဆုံး

မံစီတွင် တိုက်ပွဲဆက်လက်ပြင်းထန်၊ လေကြောင်းတိုက်ခိုက်မှုကြောင့် ဒေသခံ ၇ ဦးသေဆုံး    

*****************

ထွယ်

ဖေဖော်ဝါရီ ၁၉၊ ၂၀၂၃။

ကချင်ပြည်နယ်၊ ဗန်းမော်ခရိုင်၊ မံစီမြို့နယ်၊ စီခမ်းကြီးကျေးရွာတွင် တပ်စွဲထားသည့် စစ်ကောင်စီတပ်ကို ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်တို့က ဝင်ရောက်တိုက်ခိုက်နေသည်မှာ ၃ ရက်ရှိပြီဖြစ်သည်။

စစ်ကောင်စီတပ်သည် တိုက်ပွဲဖြစ်ပွားနေသည့်နေရာအပါအဝင် တိုက်ပွဲဖြစ်ပွားခြင်းမရှိသည့် စီခမ်းကြီးကျေးရွာနှင့် ၅ မိုင်ခန့်ဝေးသည့် သံတံတားကျေးရွာကိုလည်း ယမန်နေ့တွင် လေကြောင်းဖြင့် ပစ်ခတ်တိုက်ခိုက်ခဲ့သည့်အတွက် ဒေသခံ ၇ ဦးခန့် သေဆုံးခဲ့သည်ဟု ဒေသခံများထံက သိရသည်။

စစ်ကောင်စီ၏ လေကြောင်းပစ်ခတ်မှုနှင့် Drone ဖြင့်ပစ်ခတ်မှုကြောင့် ဒေသခံပြည်သူများ သံတံတားကျေးရွာဘုန်းကြီးကျောင်းတွင် လူဦးရေ ၁၀၀ ကျော် ပိတ်မိနေပြီး ဘေးလွတ်ရာသို့ ကယ်ထုတ်ရန်ပင် ခက်ခဲလျက်ရှိသည်ဟု လူမှုကယ်ဆယ်ရေးပြုလုပ်နေသည့် အမျိုးသား ၁ ဦးက သံလွင်ခက်ကို ပြောသည်။

၎င်းက “သေတဲ့သူ စာရင်းကောက်ထားတာက ၇ ယောက်လောက်သေထားတယ်လို့ ပြောတယ်။ သံတံတားကို လေယာဉ်ရော Drone ရော ချတာတဲ့။ ကျွန်တော်တို့လည်း သံတံတားနားကို ကပ်မရဘူး၊ သူတို့လည်း ဘုန်းကြီး ကျောင်းက ထွက်မရဖြစ်နေတာ” ဟုပြောသည်။

တိုက်ပွဲဖြစ်ပွားသဖြင့် ဒေသခံပြည်သူများသေဆုံးမှုအပါအဝင် ထိခိုက်ဒဏ်ရာရရှိသူလည်း ၈ ဦးခန့် ရှိသည်ဟု ကြားသိရကြောင်း ၎င်းက ဆက်ပြောသည်။

မံစီမြို့နယ်ရှိ သံတံတားကျေးရွာသည် မန္တလေး – မြစ်ကြီးနား အမြန်လမ်းမပေါ်တွင်တည်ရှိပြီး မံစီမြို့နှင့် မိုင် ၃၀ ခန့်ဝေးကာ ဗန်းမော်မြို့နှင့် မိုင် ၄၀ ခန့် အကွာတွင် တည်ရှိသည်။

စီခမ်းကြီးကျေးရွာတွင် ယခုအချိန်ထိ တိုက်ပွဲများပြင်းထန်နေပြီး ဒေသခံပြည်သူသေဆုံးမှုကို ၎င်းတို့လည်း ကြားမိသည်ဟု စီခမ်းကြီးကျေးရွာမှ မန်သာကျေးရွာသို့ တိုက်ပွဲရှောင်လာသည့် စီခမ်းကြီးကျေးရွာဒေသခံ အမျိုးသမီး ၁ ဦးက သံလွင်ခက်ကို ပြောသည်။

“စီခမ်းကြီးမှာ ကျွန်မတို့ ဒေသခံ ၅ ယောက် ၆ ယောက် လေယာဉ်မှန်းမသိ လက်နက်ကြီးမှန်းမသိ ထိလို့ သေပြီတဲ့။ မနေ့တုန်းကလည်း ဒေသခံ ၂ ယောက် ဆိုင်ကယ်သွားယူတဲ့အချိန် ထိထားတယ်တဲ့။ သေပြီလား၊ ရှင်သေးလား မသိသေးဘူး။ လေယာဉ်လည်း ပစ်လိုက်တာ အရမ်းပဲ။ မနေ့ညလည်း တစ်ညလုံးပစ်ခတ်သံကြားတယ်။ ဒီမနက်လည်း တစ်မနက်လုံး ပစ်နေတာ။ အခုလည်း ပစ်နေတာပဲ” ဟု ပြောသည်။

မံစီမြို့နယ် စီခမ်းကြီးကျေးရွာတွင် ယခုအချိန်ထိ ကျေးရွာတွင်း ပိတ်မိနေသူများလည်းရှိသည်ဟု ၎င်းက ဆက်ပြောသည်။

စစ်ကောင်စီတပ်သည် ၎င်းတို့စခန်းမကျဆုံးစေရန်အတွက် စီခမ်းကြီးကျေးရွာအနီးကို တိုက်ပွဲဖြစ်ပွားခြင်းမရှိသေးမီ ၄ ရက်ခန့်ကတည်းက လေကြောင်းဖြင့်ပစ်ခတ်ခဲ့ပြီး ဒေသခံပြည်သူများအသုံးပြုနေသည့် တံတားများကိုလည်း လေကြောင်းဖြင့်ပစ်ခတ်ကာ ဖျက်ဆီးခဲ့သည်။

Photo –  The Kachin Net

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3408

YouTube – > https://youtu.be/eEaLA1Cu5r0

Website – >  https://thanlwinkhet.net/?p=7773