မင်းကင်းဒေသက ပျူရွာအထိုင်စခန်းအား ကာကွယ်ရေးတပ်ဖွဲ့များ သိမ်းပိုက်
**************************
သံလွင်ခက်
ဖေဖော်ဝါရီ ၁၃ ၊ ၂၀၂၄။
စစ်ကိုင်းတိုင်း၊ ကလေးခရိုင်၊ မင်းကင်းမြို့နယ်၊ ကူလဲ ( အရှေ့ ) ရွာရှိ ပျူစောထီးအထိုင်စခန်းကို ကာကွယ်ရေး ပူးပေါင်းတပ်များက ယမန်နေ့ ဖေဖော်ဝါရီ ၁၂ ရက်တွင် တိုက်ခိုက်နိုင်ခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။
အဆိုပါ ကူလဲ ( အရှေ့ ) ရွာသည် ပျူစောထီးရွာဖြစ်ပြီး ယင်းရွာထဲရှိ အင်အား ၆၀ ဝန်းကျင်ရှိသော ပျူစောထီး အထိုင်စခန်းအား မင်းကင်းမြို့နယ် တပ်ရင်း ၅ ရင်း နှင့် ပြည်သူ့ကာကွယ်ရေးအဖွဲ့- ပကဖ တို့က ပူးပေါင်းတိုက်ခိုက်ခဲ့ခြင်းဖြစ်သည်။
မင်းကင်းမြို့နယ် ကာကွယ်ရေးတပ်ဖွဲ့ဝင် ၁ ဦးက ” ကူလဲရွာကကျတော့ စစ်ကောင်စီအထိုင်စခန်းတော့ မဟုတ်ပါဘူး။ ပျူရွာပါ။ ပျူရွာအထိုင်စခန်းပါ။ စစ်ကောင်စီတပ်ဖွဲ့ဝင်က အနည်းအကျဉ်းပါပဲ။ အစုလိုက်ကြီးတော့ မဟုတ်ဘူး။ ဒီစခန်းကို သူတို့ အချိန်ပိုင်းလောက်ပဲ တိုက်ယူလိုက်တာပါ ” ဟု ဆိုသည်။
အဆိုပါ ပျူစောထီးအထိုင်စခန်းအား ကာကွယ်ရေးတပ်ဖွဲ့များက ပြီးခဲ့သည့်နှစ်ကလည်း တိုက်ခိုက်ခဲ့ပြီး ဒုတိယအကြိမ် ထပ်မံတိုက်ခိုက်ချိန်မှာတော့ အပြီးတိုင်သိမ်းပိုက်နိုင်ခဲ့ခြင်းဖြစ်သည်။
ယခုလအတွင်း မင်းကင်းဒေသတွင် စစ်ကောင်စီတပ်ဖွဲ့များက ထိုးစစ်ဆင်မှုမရှိဘဲ ကာကွယ်ရေးတပ်ဖွဲ့များကသာ ထိုးစစ်ဆင်တိုက်ခိုက်မှုများရှိသည်ဟု ကာကွယ်ရေးတပ်ဖွဲ့ဝင်များထံက သိရသည်။
” ဒီလအတွင်းမှာ ထိုးစစ်ဆင်တာကတော့ တော်လှန်ရေးတပ်ဖွဲ့တွေက ထိုးစစ်ဆင်တာတွေရှိတယ်။ စစ်ကောင်စီဘက်က ထိုးတဲ့အခြေအနေတော့မရှိပါဘူး ” မင်းကင်းမြို့နယ် ကာကွယ်ရေးတပ်ဖွဲ့ဝင် ၁ ဦးက ပြောသည်။
ပြီးခဲ့သည့် ဖေဖော်ဝါရီ ၇ ရက်ကစတင်ကာ မင်းကင်းမြို့နယ်၊ ကံရွာရှိ စစ်ကောင်စီတပ်စခန်းကို ကာကွယ်ရေး ပူးပေါင်းတပ်များက ထိုးစစ်ဆင်တိုက်ခိုက်နေပြီး ယနေ့အချိန်ထိ တိုက်ပွဲပြင်းထန်လျက်ရှိသည်။
အဆိုပါ တိုက်ပွဲအတွင်း မင်းကင်းမြို့နယ်၊ ပျူစောထီးတပ်တာဝန်ခံ ကျေးတောင်ဦး “ကိုကိုကြီး” မေးရိုးထိမှန်ဒဏ်ရာရရှိခဲ့ကာ ပျူ ၄ ဦးသေဆုံးပြီး ပျူစောထီးနေအိမ် ၁၀၀ ကျော် မီးလောင်ပျက်စီးခဲ့သည်ဟု ကျောင်းသားတော်လှန်ရေးတပ်ဖွဲ့ – S.R.F က ထုတ်ပြန်ထားသည်။
ယမန့်နေ့ ဖေဖော်ဝါရီ ၁၂ ရက်၊ နံနက် ၆နာရီကစတင်ကာ စစ်ကောင်စီတပ်ဖွဲ့ဝင်များနှင့် ကျောင်းသားတော်လှန်ရေးတပ်ဖွဲ့ S.R.F ၊ မဟာမိတ်တပ်ဖွဲ့များဖြစ်ကြသော Brave eagle revolution force -B.E.R.F၊ People’s Liberation Army – P.L.A ၊ ချင်းတွင်းအထက်မြစ်ရိုးတော်လှန်ရေးတပ်ဖွဲ့ – U.C.R.R.F တို့ကြား တိုက်ပွဲဖြစ်ပွားလျက်ရှိသည်ဟု မင်းကင်းနွေဦးတော်လှန်ရေးအဖွဲ့ထံက သိရသည်။
လက်ရှိတွင် စစ်ကောင်စီတပ်က ကံရွာကို ရဟတ်ယာဉ်ဖြင့် လက်နက်ခဲယမ်းနှင့် စစ်အင်အားဖြည့်တင်းထားပြီး ၎င်းကျေးရွာအနီးတစ်ဝိုက်ရှိဒေသခံများ တိမ်းရှောင်နေကြရကာ စစ်ရေးဆက်လက်တင်းမာနေသည်ဟု မင်းကင်းနွေဦးတော်လှန်ရေးအဖွဲ့က ထုတ်ပြန်ထားသည်။
ဓာတ်ပုံ – ကျောင်းသားတော်လှန်ရေးတပ်ဖွဲ့ – S.R.F။
ပုံစာ – ရှေ့တန်းတစ်နေရာတွင် မြင်တွေ့ရသည့် ကျောင်းသားတော်လှန်ရေးတပ်ဖွဲ့ – S.R.F တပ်ဖွဲ့ဝင်များ။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3336
YouTube – > https://youtu.be/eEaLA1Cu5r0
Website – > https://thanlwinkhet.net/?p=7681
