စစ်ကောင်စီနဲ့ပူးပေါင်းပြီး စစ်ရှောင်အရေး ကူညီသွားမည်ဟု ထိုင်းဝန်ကြီးဆို

စစ်ကောင်စီနဲ့ပူးပေါင်းပြီး စစ်ရှောင်အရေး ကူညီသွားမည်ဟု  ထိုင်းဝန်ကြီးဆို

*****************

ယမင်းဖူးပွင့်အောင်

ဖေဖော်ဝါရီ ၁၀၊ ၂၀၂၄။

ထိုင်းနိုင်ငံဘက်ခြမ်း၊ သောင်ရင်းမြစ်ကမ်းဘေးရှိ စစ်ရှောင်ပြည်သူ ၂၀,၀၀၀ အတွက် ယာယီစစ်ရှောင်စခန်း ၃ ခု တည်ဆောက်သွားမည်ဟု ထိုင်းနိုင်ငံခြားရေးဝန်ကြီးက ပြောသည်။

ထိုင်းနိုင်ငံခြားရေးဝန်ကြီးသည် ဇန်နဝါရီလ ၈ ရက်က တာ့ခ်ခရိုင်၊ မဲဆောက်မြို့ကို လာရောက်ခဲ့ပြီး ၁ လအတွင်း စစ်ရှောင်စခန်း ၃ ခု ဖွင့်လှစ်နိုင်တော့မည့်အကြောင်း အဆိုပါ ခရီးစဉ်တွင် ပြောကြားခဲ့သည်ဟု ထိုင်းသတင်းဌာန များက ဖော်ပြခဲ့ကြသည်။

ထိုင်းအစိုးရဘက်က သောင်ရင်းမြစ်ကမ်းဘေး ထိုင်းနိုင်ငံဘက်အခြမ်းရှိ စစ်ရှောင်ပြည်သူ ၂၀,၀၀၀ အတွက် ယာယီစစ်ရှောင်ကူညီရေးစခန်းများဆောက်လုပ်ကာ ကူညီပေးသွားမည်ဖြစ်ပြီး မြန်မာဘက်ခြမ်းရှိ ဒုက္ခသည်များ အတွက်မူ စစ်ကောင်စီကထောက်ပံ့ပေးသွားမည်ဟု ဆိုသည်။

အဆိုပါ စစ်ရှောင်စခန်းများတွင်နေထိုင်သူများအတွက် လူသားချင်းစာနာထောက်ထားမှုဆိုင်ရာ အကူအညီပေး ရေးအစီအစဉ်အရ ရိက္ခာ၊ ဆေးဝါးများကို ၂ နိုင်ငံကြက်ခြေနီအသင်းများချိတ်ဆက်ကာ  မြန်မာ – ထိုင်း၊ မြဝတီ-မဲဆောက် ချစ်ကြည်ရေးတံတား အမှတ် ၂ ကတဆင့် ပို့ဆောင်သွားမည်ဟု ထိုင်းဝန်ကြီးက ဆိုသည်။

စစ်ရှောင်အရေးကိုဂရုမစိုက်သည့် စစ်ကောင်စီနှင့် ပူးပေါင်းဆောင်ရွက်သွားမည့် အစီအစဉ်အပေါ် မေးခွန်းထုတ် စရာအများကြီးရှိနေသည်ဟု စစ်ရှောင်အရေးကူညီပေးနေသူ ၁ ဦးက သံလွင်ခက် ကို ပြောသည်။

“စစ်ကောင်စီနဲ့ ပူးပေါင်းဆောင်ရွက်မယ်ဆိုတော့ စဉ်းစားစရာပဲပေါ့။ အခုလည်း စစ်ကောင်စီက ဇရပ်ကြီးက စစ် ရှောင်တွေကို ပေးမထွက်ဘူး။ လာကူတဲ့သူတွေကို ခြိမ်းခြောက်တယ်။ ဒီလိုအချိန်မှာ စစ်ကောင်စီနဲ့ ထိုင်းက ပူး ပေါင်းလုပ်ဆောင်မယ်ဆိုတော့ အခြေအမြစ်မရှိဘူး။ အကြံပြုချင်တာက စစ်ရှောင်တွေကို ကူညီတဲ့အဖွဲ့အစည်း တွေနဲ့တွေ့ပြီး လုပ်လို့ရတယ်။ နောက်ကွယ်မှာ ဘာတွေရှိနေမလဲ ဆိုတာ ခန့်မှန်းရခက်တယ် ” ဟု ဆိုသည်။

ထိုင်း-မြန်မာနယ်စပ် ကရင်နှင့် ကရင်နီပြည်များသာမက ပဲခူးတိုင်းအတွင်း တိုက်ပွဲများဖြစ်ပွားသည့်အခါ စစ်ဘေး သင့်ပြည်သူများ နယ်စပ်မျဉ်းကို ဖြတ်ကျော်၍ ထိုင်းနိုင်ငံအတွင်း ခိုလှုံနေရပြီး လူဦးရေ သိန်းချီမြင့်တက်လာခဲ့ သည်။

ထိုင်းနိုင်ငံသည် ၁၉၈၀ ခုနှစ်ကျော်ကာလကစ၍ ဒုက္ခသည်စခန်း ၉ ခုဖွင့်လှစ်ပြီး မြန်မာနိုင်ငံက ဒုက္ခသည် ၉၀,၀၀၀ ခန့်ကို ခိုလှုံခွင့်ပြုထားသော်လည်း ပြီးခဲ့သည့်လပိုင်းအတွင်း ကရင်နှင့် ကရင်နီစစ်ဘေးရှောင်များကို နေရပ်ပြန်ရန် ဒေသခံအာဏာပိုင်များက ဖိအားပေးမှုများ ပြုလုပ်ခဲ့သည်။

စစ်ဘေးရှောင်ဦးရေ စံချိန်တင်မြင့်တက်လာခဲ့သည့် ကရင်နီပြည်တွင်လည်း နိုင်ငံတကာအဖွဲ့အစည်းများအနေဖြင့် ထိုင်းနိုင်ငံဘက်ခြမ်းက အကူအညီပေးနိုင်ရေးအတွက် အခက်အခဲများရင်ဆိုင်နေရသည်ဟု ဒီးမော့ဆိုအနောက် ခြမ်းတွင် စစ်ရှောင်ကူညီပေးနေသူ ၁ ဦးက ဆိုသည်။

“ဒီဘက်မှာဝင်နေတဲ့ NGO တို့ CSO တို့လည်း camp တိုင်းလိုလိုမဝင်နိုင်ဘူးပေါ့။  camp ၅၀ ကျော်ရှိသလို လူဦးရေက သောင်းနဲ့ကျော်ရှိတယ်။ နေရာတိုင်းမဝင်နိုင်တော့ ရွေးချယ်ဝင်ရတဲ့ အခြေအနေမျိုးရှိတယ်။ တချိူ့ camp တွေက မိုးကာတွေလိုအပ်တယ်။ တချို့ camp က ရိက္ခာဆန်တွေလိုအပ်ကြတယ်။ တချို့ camp တွေက စောင်၊ ခြင်ထောင်တွေလိုအပ်ကြတယ်။ တစ်ခုနဲ့တစ်ခု မတူကြဘူး။ အမျိုးမျိူးလိုအပ်ချက်တွေ ရှိနေတယ်” ဟု ဆိုသည်။

အာဏာသိမ်းမှု ၃ နှစ်တာကာလအတွင်း ထိုင်းနိုင်ငံနှင့်ထိစပ်နေသည့် ကရင်ပြည်နယ်တွင် စစ်ဘေးရှောင် စုစု ပေါင်း ၇ သိန်းခွဲကျော်ရှိပြီး  ကရင်နီပြည်တွင်လည်း စစ်ဘေးရှောင်စုစုပေါင်း ၃ သိန်းကျော်ရှိနေသည်ဟု သိရ သည်။

ပုံစာ – ကရင်ပြည်နယ်အတွင်းက စစ်ရှောင်ပြည်သူများ/ ပုံအဟောင်း

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3301

YouTube – > https://youtu.be/eEaLA1Cu5r0

Website – >  https://thanlwinkhet.net/?p=7621