ကောလင်းမြို့တိုက်ပွဲ စစ်ကောင်စီတပ် သေဆုံးမှုများပြီးတပ်ပြန်ဆုတ်၊ လက်နက်ခဲယမ်းများ သိမ်းဆည်းရမိ
****************************
Saw Smith
ဖေဖော်ဝါရီ ၉ ၊ ၂၀၂၄ ။
ကောလင်းမြို့တွင်းသို့ ကျွံဝင်လာသည့် စစ်ကောင်စီတပ်များကို ကာကွယ်ရေးပူးပေါင်းတပ်များက စောင့်ကြိုတိုက်ခိုက်ခဲ့ရာ စစ်ကောင်စီတပ်များ ထိခိုက်သေဆုံးမှု များပြီး တပ်ပြန်ဆုတ်သွားရသည်ဟု ကာကွယ်ရေးရဲဘော်များထံက သိရသည် ။
သိမ်းပိုက်ခံထားရသည့် ကောလင်းမြို့ကို စစ်ကောင်စီက မြေပြင်၊ ဝေဟင်တို့မှ နေ၍ အင်အားလုံးအရင်းဖြင့် ဖေဖော်ဝါရီ ၃ ရက်နေ့ကတည်းက ထိုးစစ်ဆင်နေရာ ပြင်းထန်တိုက်ပွဲများ နေ့စဥ်ဖြစ်ပွားခဲ့သည်။
ယမန်နေ့တွင် စစ်ကောင်စီတပ်စစ်ကြောင်းတချို့ ကောလင်းမြို့တွင်းသို့ ထိုးဖောက်ဝင်ရောက်လာခဲ့သောကြောင့် ပြင်းထန်ထိတွေ့မှုများ ညပိုင်းထိဖြစ်ပွားခဲ့သည်။
” ညနေအစောပိုင်း ဒီကောင်တွေ မြို့ထဲထိဝင်လာတာ
တန်ပြန်တိုက်လိုက်တာ ညကပြန်ဆုတ်သွားရတယ် “ဟု ကာကွယ်ရေးရဲဘော်တစ်ဦးကပြောသည် ။
ယမန်နေ့တွင် ကောလင်းမြို့၌ ဖြစ်ပွားခဲ့သည့် တိုက်ပွဲအခြေအနေ နှင့် ပတ်သက်၍ ကောလင်းခရိုင် တပ်ရင်း၂ တာဝန်ရှိသူ တစ်ဦးကလည်း စစ်ကောင်စီဘက်ထိခိုက်သေဆုံးမှုများသည်ဟု ယနေ့နံနက်ပိုင်းတွင် ဖော်ပြထားသည်။
၎င်းက” ကောလင်းမြို့ မင်းချမ်းကျောင်း
နှင့် တဲကြီးကုန်း တဝိုက် တွင် စကစနှင့် တပ်ရင်း ၂
နှင့်ပူးပေါင်းအဖွဲ့များ အပြင်းအထန် အထိတွေ့ဖြစ်
ရာ စကစများ အထိနာအကျအဆုံးများပြီး ရင်း ၂
မှ ရဲဘော် ၄ ဦးဒဏ်ရာရ ၊ မစိုးရိမ်ရပါ ။
သိမ်းဆည်းရမိ ပစ္စည်း လေးတွေကတော့ ဓာတ်ပုံ
နှင့်တကွ တင်ပြလိုက်ရပါတယ် ။ အမျိုးတို့
ကျနော်တို့ အစွမ်းကုန်ကြိုးစားနေဆဲပါ ။
တပ်ရင်း ၁ လဲ အစွမ်းကုန်ကြိုးစားနေပါတယ် “ဟု လူမှုကွန်ရက်စာမျက်နှာတွင် အသိပေးဖော်ပြထားသည် ။
ကောလင်းမြို့ကို စစ်ကောင်စီက မြို့၏တောင်ဘက် ကိုးတောင်ဘို့ဘက်မှ ရဟတ်ယာဥ်များဖြင့် ချပေးမှုများအပါအဝင်အင်အား ၅၀၀ နီးပါးရှိ စစ်ကြောင်းများ နှင့် မြို့မြောက်ဘက် ဝန်သိုဘက်ကနေလာသည် အင်အား ၃၀၀ ကျော်ရှိ စစ်ကြောင်းများဖြင့် ထိုးစစ်ဆင်နေခြင်းဖြစ်သည်။
စစ်ကောင်စီသည် စစ်ကြောင်း အင်အားအများအပြားနှင့် လက်နက်ကြီးပစ်ကူများစွာတို့ဖြင့် မြေပြင်မှ ထိုးစစ်ဆင်နေသည့်အပြင် လေကြောင်းမှလည်း နေ့စဥ်နီးပါး ပစ်ကူပေး၍ ထိုးစစ်ဆင်နေသည် ။
စစ်ကောင်စီ၏ မြေပြင်၊ ဝေဟင်တို့မှ အပြင်းအထန်ထိုးစစ်ဆင်နေမှုကို အကောင်းဆုံးတန်ပြန်တိုက်ခိုက်နေသည့် ပူးပေါင်းတပ်များအနေဖြင့် တိုက်ပဲဲကာလာသည်နှင့် လိုအပ်ချက်များရှိလာသဖြင့် ပြည်သူများ ဝိုင်းဝန်းကူညီထောက်ပံ့ပေးကြရန် မနွေဦးနှင်းက မေတ္တာရပ်ခံပြောဆိုသည်။
ကောလင်း ခရိုင်တပ်ရင်း ၁ ၊ တပ်ရင်း ၂ နှင့် ကောလင်း ပကဖ အဖွဲ့များကို အဓိက ထောက်ပံ့မှုပေးနေသည့် မနွေဦးနှင်းက ” NUG က စီစဉ်ထားပေမဲ့လည်းထောက်ပို့လုပ်နေသူတယောက်အနေနဲ့ပြည်သူတွေကို လိုက်ပါပူးပေါင်းပေးဖို့ နိုင်သလောက်ပါဝင်ပေးဖို့ ပြောချင်ပါတယ် “ဟု ပြောသည် ။
ကောလင်းမြို့ကို စစ်ကောင်စီဘက်က အင်အားအလုံးအရင်းဖြင့် ဖိနေသောကြောင့် ကန့်ဘလူဘက်တွင် စစ်ကောင်စီနှင့်ပျူစောထီးများတပ်စွဲထားသည့် ချပ်သင်းရွာကို ပူးပေါင်းတပ်များက ထိုးစစ်ဆင်တိုက်ခိုက်နေသလို ကျွန်းလှဘက်တွင်လည်း အင်အား ၂၀၀ ခန့်ရှိ စစ်ကြောင်း ရှေ့ဆက်မလာနိုင်ရန် ပိတ်ဆို့တိုက်ခိုက်မှုများပြုလုပ်နေသည်ဟု ကန့်ဘလူ ပကဖ တပ်ဖွဲ့ဝင်များထံက သိရသည်။
စစ်ရေးအရအရေးပါပြီး ခရိုင်မြို့ကြီးတစ်ခုဖြစ်သော ကောလင်းမြို့ကို ပြီးခဲ့သည့် နိုဝင်ဘာလ ၆ ရက်တွင် ပူးပေါင်းတပ်များ ပိုက်သိမ်းခဲ့ရာ စစ်ကောင်စီက မကြာခဏ တိုက်ခိုက်နေရာ ယခုအကြိမ်၌ အင်အားအလုံးအရင်းဖြင့် ပြန်လည်ထိုးစစ်ဆင်နေခြင်းဖြစ်သည်။
ပုံစာ-ယမန်နေ့ ကောလင်းမြို့တိုက်ပွဲတွင်းမှ စစ်ကောင်စီတပ်ထံမှ သိမ်းဆည်းရမိသော လက်နက်၊ခဲယမ်းပစ္စည်းများ ။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3282
YouTube – > https://youtu.be/eEaLA1Cu5r0
Website – > https://thanlwinkhet.net/?p=7575
