လူမျိုးသုဉ်းသတ်ဖြတ်မှု ပြစ်ဒဏ်ကင်းလွတ်ခွင့်ပြုမည်မဟုတ်ဟု KSCC ဥက္ကဋ္ဌပြော
************************
သဇင်
ဖေဖော်ဝါရီ ၉၊၂၀၂၄။
ကရင်နီပြည် (ကယားပြည်နယ်)၊ ဒီးမော့ဆိုမြို့နှင့် ရှားတောမြို့နယ်ရှိ ကလေးသူငယ်များနှင့် အမျိုးသမီးများအပေါ် လူမျိုးသုဉ်းသတ်ဖြတ်မှုနှင့်ပတ်သက်၍ ပြစ်မှုကျူးလွန်သူများကို ပြစ်ဒဏ်ကင်းလွတ်ခွင့်ပြုမည်မဟုတ်ဘူးဟု ကရင်နီပြည်အတိုင်ပင်ခံကောင်စီ KSCC ဥက္ကဋ္ဌ ဦးအောင်ဆန်းမြင့်က သံလွင်ခက်ကို ပြောသည်။
ဖေဖော်ဝါရီ ၅ ရက် နံနက်အစောပိုင်းတွင် ရှားတောမြို့ကို ရဟတ်ယာဉ်ဖြင့် စစ်ကူရောက်ရှိလာသည့် အရှေ့ပိုင်း တိုင်းစစ်ဌာနချုပ် – ရပခ လက်အောက်ခံ မိုင်းပျဥ်းအခြေ စိုက် အမှတ် -၂၄၉၊ ခြေလျင်တပ်ရင်း (ခလရ-၂၄၉) နှင့် ကရင်နီကာကွယ်ရေးပူပေါင်းအဖွဲ့တို့ကြား တိုက်ပွဲဖြစ်ပွားခဲ့သည်။
ထို့နောက် အဆိုပါတိုက်ပွဲက လူစုကွဲလာသည့် စစ်ကောင် စီတပ်ဖွဲ့ဝင်များသည် ရှားတောမြို့နယ်ရှိ စစ်ဘေးရှောင်အမျိုးသား ၁ ဦး၊ အမျိုးသမီး ၃ ဦးနှင့် ကလေး ၃ဦးကို ဖမ်းဆီးခဲ့ခြင်းဖြစ်သည်။
နောက်တစ်နေ့တွင် ဖမ်းဆီးခံထားရသူများထဲက အမျိုးသား ထွက်ပြေးလွတ်မြောက်လာခဲ့သော်လည်း ကိုယ်ဝန်ဆောင်အမျိုးသမီး ၁ ဦးအပါဝင် မသန်စွမ်းအမျိုးသမီး၂ ဦး နှင့်အသက် ၁၀ နှစ်အောက် ကလေးငယ် ၃ ဦးတို့ကို စစ်ကောင်စီတပ်ဖွဲ့ဝင်များက ပစ်သတ်ခဲ့သည်။
လေကြောင်းတိုက်ခိုက်ခြင်း၊လက်နက်ကြီးပစ်ခတ်ခြင်းများအပြင် ဒေသခံများကို ဓားစာခံအဖြစ်ဖမ်းဆီးကာ သတ်ဖြတ်ခဲ့ခြင်းများ ပြုလုပ်နေသည့်စစ်ကောင်စီသည် နိုင်ငံတကာဥပဒေနှင့် စံနှုန်းများကို ပြောင်ပြောင်တင်း တင်းချိုးဖောက်နေခြင်းဖြစ်သည်။
ထိုကဲ့သို့ ပြစ်မှုကျူးလွန်သူများကို ပြစ်ဒဏ်ကင်းလွတ်ခွင့်ပြုမည်မဟုတ်ဟု ကရင်နီပြည်အတိုင်ပင်ခံကောင်စီ KSCC ဥက္ကဋ္ဌ ဦးအောင်ဆန်းမြင့် က ပြောသည်။
၎င်းက “ စစ်တပ်က သူတို့ပြောဆိုထားတဲ့အတိုင်း မင်းတို့နယ်မြေတွေကို သိမ်းပိုက်လို့ရချင်ရမယ်။ မင်းတို့လည်းအေးအေးဆေးဆေးနေရမှာမဟုတ်ဘူးဆိုတဲ့အတိုင်း ဒီလိုလုပ်ရပ်တွေကို ပြောင်ပြောင်တင်းတင်းလုပ်ဆောင်နေတာဖြစ်တယ်။ ဒီလိုစစ်ကောင်စီရဲ့လုပ်ရပ်တွေနဲ့ ပတ် သက်ပြီးတော့မှ နိုင်ငံတကာက အရေးယူဆောင်ရွက်နိုင်အောင် ဒီမိုကရေစီတည်ဆောက်ရေးကာလတွေမှာ ဒါတွေကို တရားမျှတမှုရအောင် အစွမ်းကုန်ကြိုးစားကြရမှာဖြစ်တယ်။ ပြစ်မှုကျူးလွန်တဲ့သူတွေကိုတော့ ပြစ်ဒဏ်ကင်းလွတ်ခွင့် ပေးမှာမဟုတ်ဘူးလို့ပြောချင်ပါတယ် ” ဟု ပြောသည်။
အသတ်ခံရသည့် ကိုယ်ဝန်ဆောင်အပါအဝင် ရုပ်အလောင်း ၆ လောင်းကို ကရင်နီတော်လှန်ရေးပူးပေါင်းတပ်များက နယ်မြေရှင်းလင်းစဉ် ရှာဖွေတွေ့ရှိခဲ့ပြီး သေနတ်ဒဏ်ရာများဖြင့် သေဆုံးလျက်တွေ့ရှိခဲ့သည်ဟု ကရင်နီတပ်မတော် – KA စစ်ရေးချုပ် ဗိုလ်မှူးကြီးဘုန်းနိုင်က ပြောသည်။
၎င်းက “ ရုပ်အလောင်းတွေကို တွေ့တဲ့ချိန်မှာ အားလုံးက သေနတ်ချက်တွေနဲ့ သေဆုံးနေတာ။ ခုလက်ရှိမှာတော့ ရှားတောမြို့ထဲမှာ နယ်မြေရှင်းလင်းရေးလုပ်နေတယ်။ ပြည်သူတွေကိုပစ်သတ်သွားတဲ့ ရန်သူတွေကို လိုက်လံချေမှုန်းနေပါတယ်။ နောက်ပြီး ရှားတောမြို့နယ်ထဲဗျူဟာကုန်း ၁ ခုကျန်နေသေးတယ်။အဲ့တာကိုလည်း ရှင်းဖို့ကြိုးစားနေပါတယ်” ဟု ဆိုသည်။
ကရင်နီလူ့အခွင့်အရေးအဖွဲ့က ရုပ်အလောင်းများကို နာရီပိုင်းအတွင်း ပြန်လည်တွေ့ရှိပြီး ဦးခေါင်းကို တေ့ကာ ပစ်ခတ်ထားသည့် ဒဏ်ရာများနှင့် ညိုမည်းဒဏ်ရာများအပြင် ခြေထောက်တွင် ဓားဖြင့် လှီးဖြတ်ထားသည့် ဒဏ်ရာများလည်း တွေ့ရှိရသည်ဟု ထုတ်ပြန်ထားသည်။
ထို့ပြင် ဖေဖော်ဝါရီ ၅ရက်တွင် ဒီးမော့ဆိုမြို့နယ်၊အနောက်ခြမ်း ဒေါဆီအီကျေးရွာစာသင်ကျောင်းနှင့် လွိုင်နန်းဖကျေးရွာ စာသင်ကျောင်း ၂ ကျောင်းကို စစ်ကောင်စီတပ်က ဂျက်လေယာဉ်ဖြင့် ဗုံးကြဲတိုက်ခိုက်ခဲ့သည့်အတွက် အသက် ၁၃ နှစ်အရွယ် အလယ်တန်း ကျောင်းသား ၄ ဦး နှင့် သက်ကြီးပိုင်းအမျိုးသား ၁ ဦး သေဆုံးခဲ့သည့်အပြင် မူကြိုအရွယ်ကလေးငယ် ၁ ဦးနှင့် ဆရာ၊ ဆရာမအပါအဝင် ၂၀ ဦးကျော် ထိခိုက်ဒဏ်ရာရရှိခဲ့သည်။
ကုလသမဂ္ဂ ကလေးများရန်ပုံငွေအဖွဲ့ UNICEF ကလည်း ကလေးများစာသင်ကြားနေသည့် နေရာများကို တိုက်ခိုက်ခြင်းသည် ကလေးအခွင့်အရေးနှင့် နိုင်ငံတကာ လူသားချင်းစာနာရေး ဥပဒေကို စိုးရိမ်စဖွယ် ချိုးဖောက်ခြင်းဖြစ်သည့်အတွက် ပြင်းပြင်းထန်ထန် ကန့်ကွက်သည်ဟု ဖေဖော်ဝါရီ ၇ ရက်တွင် ထုတ်ပြန်ထားသည်။
စစ်အာဏာသိမ်းပြီး ၃ နှစ်ကျော်ကာလအတွင်း စစ်ကောင်စီနှင့် စစ်ကောင်စီလက်အောက်ခံအဖွဲ့များ၏ သတ်ဖြတ်မှုကြောင့် ကလေးသူငယ် ၅၅၃ ဦးသေဆုံးခဲ့သည်ဟု နိုင်ငံရေးအကျဉ်းသားများကူညီစောင့်ရှောက်ရေးအသင်း – AAPP ၏ ယခုနှစ်ဖေဖော်ဝါရီ ၇ ရက် ထုတ်ပြန်ချက်အရ သိရသည်။
ဓာတ်ပုံ – CJ
ပုံစာ – ဖမ်းဆီးခံရသူများအနက်မှ သတ်ဖြတ်ခံခဲ့ရသည့် ကလေးငယ်၏ရုပ်အလောင်း။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3280
YouTube – > https://youtu.be/eEaLA1Cu5r0
Website – > https://thanlwinkhet.net/?p=7569
