အရပ်သားလက်နက်ကိုင်ဆောင်ခြင်းကို ထိန်းသိမ်းမည်ဟု MNDAA ဆို
****************************
ယမင်းဖူးပွင့်အောင်
ဖေဖော်ဝါရီ ၇၊ ၂၀၂၄။
ပြန်လည်ထူထောင်ရေးကာလတွင် မလိုလားအပ်သည့်ပြဿနာများ မဖြစ်ပေါ်လာစေရန် အရပ်သားများ လက်နက်ကိုင်ဆောင်မှုကို ထိန်းသိမ်းမည်ဟု မြန်မာအမျိုးသားဒီမိုကရက်တစ်မဟာမိတ်တပ်မတော် – MNDAA ပြောရေးဆိုခွင့်ရှိသူ လီကျားဝင်း က ဆိုသည်။
လီကျားဝင်းက ” “တိုက်ပွဲအပြီး ပြန်လည်ထူထောင်ရေးကာလဆိုတော့ လက်နက်တွေက အရပ်သားတွေကိုင်ရင် တော်တော်လေးကို မလိုလားအပ်တဲ့ ပြဿနာတွေဖြစ်စေနိုင်တယ်။ ဒါတွေကို လျော့ကျအောင် ပပျောက်အောင် ကျွန်တော်တို့က ထိန်းသိမ်းရမှာဖြစ်တယ်” ဟုဆိုသည်။
ရှမ်းပြည်နယ်၊ အမှတ် ၁ အထူးအုပ်ချုပ်ရေးဒေသတွင် ရှင်းလင်းရေးလုပ်ငန်းများဆောင်ရွက်ခဲ့ရာ အမျိုးအစားအစုံ တရားမဝင်လက်နက် ၆၃၁ လက်ကို သိမ်းဆည်းရမိခဲ့သည်ဟု ဖေဖော်ဝါရီ ၅ ရက်နေ့၌ တရုတ်ဘာသာဖြင့် MNDAA က ထုတ်ပြန်ခဲ့သည်။
အကြီးစားစစ်ဆေးရေးနှင့် ပြုပြင်ရေးလုပ်ငန်းဌာနချုပ်၏ပြောကြားချက်အရ ဖေဖော်ဝါရီ ၃ ရက် မွန်းလွဲပိုင်းတွင် ကုန်တင်ယာဉ် ၁ စီးအတွင်း လက်နက်အများအပြားဝှက်ထားသည်ဟု သတင်းရရှိပြီးနောက် သွားရောက်ရှင်းလင်း ခဲ့သည်ဟု ထုတ်ပြန်ချက်တွင် ဖော်ပြထားသည်။
သိမ်းဆည်းရမိသည့် လက်နက်များသည် MNDAA ၏ တပ်မဟာ ၁ ခုစာအတွက် မလုံလောက်နိုင်ဟု လက်နက်အရေးကျွမ်းကျင်သူ ၁ ဦးက သံလွင်ခက်ကို သုံးသပ်ပြောကြားသည်။
၎င်းက “MNDAA ရဲ့ ဖွဲ့စည်းပုံအင်အားက ဘယ်လောက်ရှိမလဲတော့ ကျွန်တော် အတိအကျမသိထားဘူး။ သိမ်းမိတာတွေက တပ်မဟာ ၁ ခုစာတော့ မရနိုင်ဘူးယူဆပါတယ်။ MNDAA က 7.62×39 ပဲသုံးတော့ စကစရဲ့ နေတိုးစံပြုကျည်သုံး လက်နက်ငယ်တွေ သိပ်သုံးမယ်တော့ မထင်ဘူး။ အခုပုံထဲကဖမ်းမိတာတွေကတော့ Type 56 ( တရုတ် AK) တွေဖြစ်ပုံရလို့ သုံးလို့ရနိုင်တယ်။ ဒကစ ကျတုန်းက သိမ်းမိတာတွေကတော့ တခြားကိုပဲ ပေးမယ်ထင်တယ်” ဟုဆိုသည်။
ယခုနှစ် ဖေဖော်ဝါရီလ ၅ ရက်မတိုင်မီ ကိုးကန့်ဒေအတွင်းရှိ အရပ်သားများအနေဖြင့် ဝှက်ထားသော လက်နက်ခဲယမ်းများ လာရောက်အပ်နှံရမည်ဖြစ်ပြီး သတ်မှတ်ကာလအတွင်း လာရောက်အပ်နှံခြင်းမရှိပါက ဥပဒေနှင့်အညီအရေးယူမည်ဟု MNDAA က ဇန်နဝါရီ ၂၁ ရက် ရက်စွဲဖြင့် ထုတ်ပြန်ထားသည်။
ဓာတ်ပုံ – The Kokang
ပုံစာ – MNDAA က သိမ်းဆည်းရမိသည့် တရားမဝင်လက်နက်များ။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3266
YouTube – > https://youtu.be/eEaLA1Cu5r0
Website – > https://thanlwinkhet.net/?p=7545
