ရှမ်း/တောင်ကျောင်းသားများကို အခြားဒေသများတွင် စာမေးပွဲဖြေဆိုခွင့်ပြုထား
****************************
ယမင်းဖူးပွင့်အောင်
ဖေဖော်ဝါရီ ၆၊ ၂၀၂၄။
ရှမ်းပြည်နယ်တောင်ပိုင်းတွင် တိုက်ပွဲပြင်းထန်နေသောဒေသများက ကျောင်းသားများကို အခြားဒေသများတွင် စာမေးပွဲပြောင်းရွှေ့ဖြေဆိုခွင့်ပြုထားသည်ဟု ကျောင်းသားမိဘများထံက သိရသည်။
ဆီဆိုင်၊ ဘန်းယဉ်နှင့် ဟိုပုံးမြို့များတွင် ယခုနှစ် ဇန်နဝါရီ ၂၃ ရက်ကစတင်၍ စစ်ကောင်စီတပ်ဖွဲ့အပါအဝင် ပအိုဝ်းအမျိုးသားတပ် PNA (ပြည်သူ့စစ်) နှင့် ပအိုဝ်းအမျိုးသားလွတ်မြောက်ရေးတပ်မတော် – PNLA တို့ကြား ထိတွေ့တိုက်ပွဲများပြင်းထန်နေသည်။
အဆိုပါမြို့များရှိစာသင်ကျောင်းများ၌ ပညာသင်ကြားနေသော ကျောင်းသား၊ ကျောင်းသူများအနေဖြင့် တောင် ကြီးမြို့တွင် စာမေးပွဲပြောင်းရွှေ့ဖြေဆိုလျှင် ချက်ချင်းလက်ခံပေးရန် စာထုတ်ထားသည်ဟု လုံခြုံရေးအရ အမည် မဖော်လိုသူ အမျိုးသမီးပညာရေးဝန်ထမ်း ၁ ဦးက သံလွင်ခက် ကို ပြောသည်။
၎င်းက “လတ်တလောအတွက် ချက်ချင်းလက်ခံပေးဖို့ စာထွက်ထားတယ်။ ဆီဆိုင်တို့ ဘန်းယဉ်တို့ဘက်က ကလေးတွေကို တောင်ကြီးမြို့မှာ ပေးဖြေမယ်ပေါ့။ ဘယ်အတန်းပဲဖြစ်ဖြစ်။ မြကန်သာရဲ့မြောက်ဘက်က အမက – ၂၂ ကျောင်းမှာ ဆီဆိုင်ပညာရေးမှူးရှိတယ်။ သူ့ကိုသွားတွေ့ပြီး ဘယ်ကျောင်းကပါ ဘယ်အတန်းကပါလို့ပြောပြီး ထောက်ခံစာရေးပြီးရင် ကိုယ်ကြိုက်တဲ့ကျောင်းမှာ သွားအပ်ပြီးဖြေပါတဲ့” ဟု ပြောသည်။
ဆီဆိုင်မြို့ကို PNLA က ထိန်းချုပ်ပြီးနောက် စစ်ကောင်စီသည် ပအိုဝ်းလူမျိုးအများစုနေထိုင်ရာ ရှမ်းပြည်နယ် တောင်ပိုင်းရှိ မြို့များ၊ ကျေးရွာများကို တိုက်ခိုက်ဖျက်ဆီးနေသဖြင့် ဘုန်းတော်ကြီးကျောင်း ၅ ကျောင်း၊ ဓမ္မာရုံ ၁ ရုံ၊ ဘုရားရှိခိုး ကျောင်း ၁ ကျောင်း၊ စာသင်ကျောင်း ၁ ကျောင်း နှင့် နေအိမ်အများအပြားထိခိုက်ပျက်စီးခဲ့ရသည်ဟု PNLA က ထုတ်ပြန်ထားသည်။
ဟိုပုံးမြို့နယ်ရှိ စံဖူးကျေးရွာတွင် စစ်ကောင်စီ၊ PNO ပြည်သူ့စစ်ပူးပေါင်းတပ်များနှင့် PNLA တပ်ဖွဲ့များကြား တိုက်ပွဲများစတင်ဖြစ်ပွားခဲ့ပြီး လက်ရှိအချိန်တွင်လည်း ဆီဆိုင်မြို့တွင် တိုက်ပွဲများဖြစ်ပွားလျက်ရှိသည်။
ထို့ကြောင့်လည်း ပညာရေးထက်စားဝတ်နေရေးကို ပိုမိုဦးစားပေးနေရသဖြင့် တောင်ကြီးမြို့ကို စာမေးပွဲသွား ရောက်ဖြေဆိုမည့် ကျောင်းသားရာခိုင်နှုန်းနည်းနိုင်သည်ဟု ဆီဆိုင်မြို့တွင်နေထိုင်သည့် အမျိုးသားဒေသခံ ၁ ဦးက သံလွင်ခက် ကို ပြောသည်။
“လိုင်းပေါ်မှာပဲစာတွေပျံ့နေတာ၊ တရားဝင်လားတော့မသိဘူး။ အခုက ပညာရေးထက် စားဝတ်နေရေးကို ပိုဦးစား ပေးနေရတော့ သွားဖြေမယ့်ရာခိုင်နှုန်းနည်းမယ် ထင်တယ်။ တောထဲကို ရှောင်နေကြတဲ့သူတွေလည်းရှိတယ်။ ဖေ ဖော်ဝါရီမှာဖြေမယ့်စာမေးပွဲက အဆင့်ကြီးဆိုတော့ ကလေးတွေအတွက် နစ်နာတာပေါ့”
ရှမ်းပြည်နယ်တောင်ပိုင်းတွင် ကရင်နီဒေသက စစ်ဘေးရှောင်လာသူအများအပြားရှိနေပြီး ယခုကဲ့သို့ ထပ်မံ ရှောင် တိမ်းရသည့်အတွက် ထိခိုက်နစ်နာမှုများစွာရှိသည်ဟု ပအိုဝ်းအမျိုးသမီး ၁ ဦးဖြစ်သူ မကြယ်စင် က ပြောသည်။
၎င်းက “အခုလို တိုက်ပွဲထပ်ဖြစ်တော့ အခုဆို ထပ်ပြီးရှောင်စရာနေရာမရှိဘူးဆိုပြီး ထိခိုက်နစ်နာမှုတွေတော့ အ များကြီးရှိတယ်။ အထူးသဖြင့် ပအိုဝ်းပြည်သူအချင်းချင်း ၂ ခြမ်းလိုမျိုးဖြစ်သွားတယ်။ PNA ကိုထောက်ခံတဲ့သူ လည်းရှိတယ်။ PNLA ကိုထောက်ခံတဲ့လူထုက ၁ ခြမ်းဖြစ်တယ်။ အခုဆိုလူထုက ဘယ်သူ့နောက်လိုက်လို့ လိုက်ရ မှန်းမသိဘူးဆိုတဲ့အခြေအနေတွေလည်း အများကြီးရှိတယ်ပေါ့” ဟု ဆိုသည်။
ရှမ်းပြည်နယ်မြောက်ပိုင်း လားရှိုးမြို့နယ်တွင်လည်း တိုက်ပွဲဖြစ်ပွားလာနိုင်မည့်အခြေအနေအပေါ် စိုးရိမ်၍ ဒေသခံ ကျောင်းသားမိဘများက အခြားမြို့များ၌ စာမေးပွဲပြောင်းရွှေ့ဖြေဆိုခွင့်ပြုရန် တောင်းဆိုထားသော်လည်း လက်ခံ ခြင်းမရှိဟု ဒေသခံများထံက သိရသည်။
ပုံစာ – တောင်ကြီးမြို့နယ်အတွင်းရှိ ကျောင်းများတွင် စာသင်ကြားနေသည့် မြင်ကွင်း/ ပုံ အဟောင်း
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3254
YouTube – > https://youtu.be/eEaLA1Cu5r0
Website – > https://thanlwinkhet.net/?p=7521
