ကော့ကရိတ်မြို့နယ်ကစစ်ရှောင်များ စားနပ်ရိက္ခာအခက်အခဲကြုံတွေ့နေ

ကော့ကရိတ်မြို့နယ်ကစစ်ရှောင်များ စားနပ်ရိက္ခာအခက်အခဲကြုံတွေ့နေ

**********************************

နန်းဆုပန်ခန့်

ဖေဖော်ဝါရီ ၆၊ ၂၀၂၄။

ကရင်ပြည်နယ်၊ ကော့ကရိတ်မြို့နယ်အတွင်းက စစ်ရှောင်ပြည်သူများအနေဖြင့် စားနပ်ရိက္ခာအခက်အခဲနှင့် ရင် ဆိုင်ကြုံတွေ့နေရသည်ဟု စစ်ရှောင်ကူညီသူများထံက သိရသည်။

စစ်ရှောင်ပြည်သူများအနေဖြင့် ဆန်ဝယ်ရာတွင် အခက်အခဲများစွာနှင့် ရင်ဆိုင်ကြုံတွေ့နေရခြင်းဖြစ်သည်ဟု စစ် ရှောင်ကူညီသူအမျိုးသမီး ၁ ဦးက သံလွင်ခက်သတင်းဌာနကို ပြောသည်။

၎င်းက “ ကော့ကရိတ်စစ်ရှောင်တွေက ဆန်တွေ အဓိကလိုအပ်တာ။ ကော့ကရိတ်စစ်ရှောင်တွေက များတယ်၊ သူတို့တွေက ဆန်ကို မြို့ထဲမှာဝယ်မရတော့ ဒီ မော်လမြိုင်တို့ဘက် သွားဝယ်နေရတာ။ သူတို့ဘက်က ဆန်အိတ် ကြီး ၁ အိတ်က ၂ သိန်းလောက်ရှိတယ် ” ဟု ဆိုသည်။

ပြီးခဲ့သည့် ၂၀၂၃ ခုနှစ်၊ ဒီဇင်ဘာ ၁ ရက်ကစပြီး ယနေ့အချိန်ထိဖြစ်ပွားနေသည့် ကော့ကရိတ်မြို့တွင်းတိုက်ပွဲများ ကြောင့် ကော့ကရိတ်မြို့ပေါ်အပါအဝင် အနီးအနားကျေးရွာက ဒေသခံ ၁၀,၀၀၀ ကျော် ထွက်ပြေးတိမ်းရှောင်နေ ကြရသည်။

ထွက်ပြေးတိမ်းရှောင်နေကြသည့် ဒေသခံများသည် နေရာအတိအကျမရှိဘဲ ထွက်ပြေးတိမ်းရှောင်နေရခြင်းဖြစ် သည်ဟု ဆိုက် ၃ စစ်ရှောင်စခန်း  တာဝန်ခံ စောလားဒို့ က ဆိုသည်။

၎င်းက “ကွင်းကလေးရွာ၊ ထီးမူးထရွာရယ်၊ ဒါတွေက အရှေ့ဒေါနဘက်ခြမ်းမှာပေါ့နော်။ မဲကနယ်တို့ ဘာတို့ လည်းပါမယ်။ အနောက်ဒေါနဘက်ခြမ်းကတော့ ကော့နွဲရယ်၊ မြို့ဟောင်းရယ်၊ အံဖကြီးတို့၊ အံဖလေးတို့ အဲ့ဒါ တွေတော့အများကြီးပါပဲ။ သူတို့ကတော့ ချောင်းဖျား ( မြစ်ချောင်းဖျား ) ဘက်မှာပဲနေတာများတယ်။ အဲ့ဒီဘက် ခြမ်းမှာကျတော့ နေရာအတိအကျတော့မရှိဘူး။ သူတို့ နေလို့ရတဲ့နေရာမှာ လိုက်နေတာပေါ့။ လုံခြုံတဲ့နေရာမှာ လေ” ဟု ပြောသည်။

ယခင် ကော့ကရိတ်မြို့သို့ စစ်ဘေးတိမ်းရှောင်ခဲ့သည့် မြဝတီမြို့အနီး၊ မဲကနယ်ကျေးရွာက ဒေသခံများသည်လည်း လက်ရှိအချိန်တွင် ချောင်းဖျား၊ မြစ်ဖျားနေရာများသို့ ထပ်မံ စစ်ဘေးတိမ်းရှောင်နေကြရသည်။

လမ်းခရီးအခက်အခဲများရှိသည့်အတွက် ကော့ကရိတ်စစ်ရှောင်များကို သွားရောက်ကူညီရာတွင် အခက်အခဲများစွာ ရှိသည်ဟု စစ်ရှောင်ကူညီသူအမျိုးသမီး ၁ ဦးက ပြောသည်။

၎င်းက “ အခုရက်ပိုင်း ကော့ကရိတ်စစ်ရှောင်တွေဆီသွားဖို့တော့ရှိတယ်။ သွားရင်တော့ ဒီအတိုင်း ရိက္ခာနည်းနည်း နဲ့မသွားချင်ဘူးလေ။ ဆန်အိတ် ၃၀ လောက်တော့ယူသွားချင်တယ်။ ဒါပေမယ့် ဆန်အိတ်ကမပြည့်သေးဘူး။ အလှူရှင်တွေကလည်း နည်းလာတယ်” ဟု ဆိုသည်။

ပြီးခဲ့သည့် ၂၀၂၃ ခုနှစ် ဧပြီလ ၁၈ ရက်တွင် တကျော့ပြန်ဖြစ်ပွားခဲ့သည့်တိုက်ပွဲများကြောင့် မြဝတီမြို့အနီးရှိ မဲကနယ်ကျေးရွာကဒေသခံများ ကော့ကရိတ်မြို့သို့ ထွက်ပြေးတိမ်းရှောင်ခဲ့သူများရှိသလို ထိုင်း – ကရင် နယ်စပ်ရှိ စစ်ရှောင်စခန်းများဖြစ်သော သေ့ဘောဘိုးနှင့် ပလောတပို့သို့ ထွက်ပြေးတိမ်းရှောင်လာသူများလည်းရှိသည်။

သေ့ဘောဘိုးစစ်ရှောင်စခန်း၌ လူဦးရေ ၂၂၄ ဦး ရှိပြီး ယင်းအထဲ မဲကနယ်ဒေသခံ ၁၃၂ ဦးနေထိုင်လျက်ရှိကာ ၎င်း တို့အတွက် ဆန်လိုအပ်နေသည် ဟု သေ့ဘောဘိုးကျေးရွာဥက္ကဋ္ဌက သံလွင်ခက် သတင်းဌာနကို ပြောသည်။

“ အဓိကကျတော့ ဒီ…စားစရာတွေပေါ့နော်။ စားစရာတွေဆိုတာက အရေးကြီးတာပေါ့။ ဒီလမှာဆို သူတို့အတွက် ဘာမှမလာတော့ဘူးလေ။ ၁ အိမ်ထောင်ဆိုရင် ၁၅ ကီလို ဆန်အိတ် ၁ အိတ်လောက်ပဲရတော့တယ်လေ။ အရေး ကြီးတာကတော့ စားစရာပေါ့နော်။ ကျန်တာကတော့ သိပ်တော့မလိုဘူး၊ အလှူရှင်တွေက တစ်ဦးတစ်လေ လောက်ပဲလာတာ ၅ လ လောက်ရှိနေပါပြီ ” ဟု သေ့ဘောဘိုးကျေးရွာဥက္ကဋ္ဌ က ဆိုသည်။

ပြီးခဲ့သည့် ဒီဇင်ဘာ ၁ ရက်တွင် ကော့ကရိတ်မြို့ကို ကရင်အမျိုးသားလွတ်မြောက်ရေးတပ်မတော် – KNLA နှင့် တော်လှန်ရေးပူးပေါင်းတပ်များကစတင်တိုက်ခိုက်ခဲ့ရာ လက်ရှိမှာတော့ ကော့ကရိတ်မြို့တွင်းအထိပါ တိုက်ပွဲများ ပြင်းထန်လျက်ရှိသည်။

ဓါတ်ပုံ – CJ

ပုံစာ – သေ့ဘောဘိုးစခန်းရှိ စစ်ရှောင်များ။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3253

YouTube – > https://youtu.be/eEaLA1Cu5r0

Website – > https://thanlwinkhet.net/?p=7516