Saw Smith
ဖေဖော်ဝါရီ ၆ ၊ ၂၀၂၄ ။
ရှမ်းပြည်နယ်တောင်ပိုင်း၊ ပအိုဝ်းဒေသရှိ ဆီဆိုင်မြို့ကို စစ်ကောင်စီက အလုံးစုံပျက်စီးသွားစေရန် လေကြောင်းမှ ဗုံးကြဲခြင်း ၊ လက်နက်ကြီးဖြင့် ပစ်ခတ်ခြင်းများကို ဆက်တိုက်ပြုလုပ်နေသည်ဟု ပအိုဝ်းအမျိုးသားလွတ်မြောက်ရေးတပ်မတော်(PNLA)က ယနေ့တွင် သတင်းထုတ်ပြန်သည် ။
ဆီဆိုင်မြို့နယ်တွင် ပြီးခဲ့သည့် ဇန်နဝါရီလ ၂၃ ရက်မှ ၂၆ ရက်ထိ စစ်ကောင်စီတပ်၊ PNO/PNA ပြည်သူ့စစ်များနှင့် PNLA မဟာမိတ်တပ်ပေါင်းစုတို့ တိုက်ပွဲဖြစ်ပွားပြီးနောက် ဆီဆိုင်မြို့ကို ထိန်းချူပ်နိုင်ခဲ့သည်ဟု PNLAက ထုတ်ပြန်ခဲ့သည်။
ထို့နောက်စစ်ကောင်စီက ဆီဆိုင်မြို့အတွင်းသို့ စစ်ကြောင်းပြန်ထိုးခြင်း၊ လေကြောင်းမှ ဗုံးကြဲခြင်း၊ လက်နက်ကြီးဖြင့် ပစ်ခတ်ခြင်းများကို ဆက်တိုက်ပြုလုပ်နေသည်။
” စစ်ကောင်စီသည် ၎င်းတို့ လက်လွှတ်ဆုံးရှုံးရသည့်မြို့များ ၊ ရွာများကို အလုံးစုံဖျက်ဆီးပစ်ရေးသဘောထားဖြင့် ပအိုဝ်းကျေးရွာများ ၊ မြို့များကို ဖျက်ဆီးနေခြင်းဖြစ်သည်” ဟု PNLA က ထုတ်ပြန်သည်။
စစ်ကောင်စီသည် ထိတွေ့တိုက်ပွဲဖြစ်ပွားခြင်းမရှိသည့်ရက်များတွင်လည်း ဆီဆိုင်မြို့ပေါ်ကို လေကြောင်းမှ တိုက်ခိုက်ခြင်း၊ လက်နက်ကြီးဖြင့်ပစ်ခတ်ခြင်းများဆက်တိုက်ပြုလုပ်နေသည်ဟုဒေသခံများထံမှသိရသည် ။
ဖေဖော်ဝါရီ ၂ရက်တွင် မြေပြင် တိုက်ပွဲဖြစ်ပွားခြင်းမရှိဘဲ စစ်ကောင်စီသည် သထုံႏပေႏ(ဆီဆိုင်)မြို့ကို လက်နက်ကြီးများ ၊ လေယာဉ်များဖြင့် ပစ်ခတ်ဗုံးကြဲမှုများကို တနေကုန်ပြုလုပ်သောကြောင့် မြို့ဂုဏ်ဆောင်ဇဝနာရာမပရိယတ္တိစာသင်တိုက်ကြီး အဆောက်အဦး အချို့ပျက်စီးခဲ့ရသည်။
ထို့ပြင် ဖေဖော်ဝါရီလ ၄ရက်တွင်လည်း စစ်ကောင်စီနှင့်ပူးပေါင်းတပ်များသည် ဆီဆိုင်မြို့အတွင်းရှိ ဟိုခဲဘုန်းတော်ကြီးကျောင်းကို လက်နက်ကြီးများ ဒရုန်းဗုံးများဖြင့် ဆက်လက်ပစ်ခတ်ဖျက်ဆီးခဲ့သည်။
“လက်ရှိပအိုဝ်းဒေသမှာလည်း ဘာသာ၊ သာသနာကို ကာကွယ်စောင့်ရှောက်ပါတယ်လို့ ပြောပေမယ့်လည်း တော်လှန်ရေးရဲဘော်တွေနဲ့ ထိတွေ့တိုက်ပွဲမဖြစ်/မရှိဘဲ မြို့ထဲ ရွာထဲကို လက်နက်ကြီးနဲ့ ထု၊ လေယာဉ်နဲ့ ဗုံးကြဲတာကြောင့် ဆီဆိုင်မြို့က ဘုရားကျောင်းကန်၊ စေတီပုထိုးတွေ ပျက်ဆီးတာမျိုးတွေကို တွေ့ရပါတယ်။ ဒီလိုဖြစ်စဉ်မျိုးက မြန်မာနိုင်ငံအနှံ့မှာဖြစ်နေတာပါ၊၊ လက်ရှိပအိုဝ်းဒေသမှာ မျက်မြင်ကိုယ်တွေ့ဖြစ်လာပြီ ၊၊ ကျနော့်အနေနဲ့ ပြောရရင် တော်တော်လေး စိုးရိမ်မိပါတယ်”ဟု ပင်လောင်းမြို့နယ်မှ ပအိုဝ်းတော်လှန်ရေးလူငယ် ခွန်မွန်ဗန်က ပြောသည် ။
ဆီဆိုင်မြို့နယ်တွင် စစ်ကောင်စီ၏ဖျက်ဆီးမှုများကြောင့် ဘုန်းတော်ကြီးကျောင်း ၅ ကျောင်း၊ ဓမ္မာရုံ ၁ ခု၊ ဘုရားရှိခိုးကျောင်း ၁ ကျောင်း၊ စာသင်ကျောင်း ၁ ကျောင်း နှင့် နေအိမ်အများအပြားထိခိုက်ပျက်စီးခဲ့သည်ဟု PNLA က ထုတ်ပြန်ထားသည် ။
ထို့ပြင် ဒေသခံပြည်သူတချို့ ထိခိုက်မှုများရှိနေပြီးဖေဖော်ဝါရီ ၅ ရက်တွင်လည်း အသက် ၅၀ နှစ်အရွယ် နောင်အယ်ရွာသား ခွန်ဘဩကို ဆီဆိုင်မြို့မြောက်ဘက်တွင် စစ်ကောင်စီတပ်က ဖမ်းဆီးရိုက်နှက် သတ်ဖြတ်ခဲ့သည်။
” မြို့ရွာလူနေအိမ်တွေကို လေယာဉ်နဲ အဆမတန် ဗုံးကြဲခြင်း လက်နက်ကြီးများဖြင့် အဆက်မပြတ် ပစ်ခတ်ခြင်းများ ပြုလုပ်သည့်အတွက်ကြောင့် ပြည်သူလုံခြုံမှုကို ထိခိုက်ခဲ့ရတယ် ။
ဒီစစ်ပွဲကြောင့် ဆီဆိုင်မြို့နယ်က ကယားပြည်နယ်မှ ရောက်ရှိလာတဲ့ လူဦးရေ နှစ်သောင်းကျော်အပါအဝင် လူဦးရေ အနည်းဆုံးငါးသောင်းက စစ်ဘေးရှောင်ကြရပါတယ်။ စစ်တပ်ဖက်က လေယာဉ်ဗုံးကြဲခြင်း လက်နက်ကြီးပစ်ခြင်းမပြုပါက စစ်ရှောင်စရာမလိုပါဘူး ” ဟု PNLA မှ သတင်းနှင့်ပြန်ကြားရေးတာဝန်ခံက ပြောသည် ။
ဆီဆိုင်မြို့တွင် စစ်ကောင်စီ လေကြောင်းမှ ဗုံးကြဲခြင်း၊ ဒရုန်းဖြင့် ဗုံးကြဲခြင်း ၊ လက်နက်ကြီးပစ်ခတ်ခြင်းများ ဆက်တိုက်ပြုလုပ်နေသည့်အပြင် ပြည်သူများအား ဖမ်းဆီး သတ်ဖြတ်ခြင်းနှင့် ပစ်ခတ်ခြင်းများ ပြုလုပ်နေသောကြောင့် ပြည်သူများအနေဖြင့် မြို့အတွင်းသို့ ပြန်မဝင်ကြသေးရန် PNLAက သတိပေးထားသည်။
ပုံစာ- ဖေဖော်ဝါရီ ၂ရက်တွက် ဗုံးကြဲခြင်း၊ လက်နက်ကြီးပစ်ခတ်မှုများကြောင့် ဆီဆိုင်မြို့၏ မြို့ဂုဏ်ဆောင် ဇဝနာရာမပရိယတ္တိစာသင်တိုက်ကြီး အဆောက်အဦး အချို့ပျက်စီးခဲ့ရမှု ။
*****
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2797
YouTube – >https://youtu.be/EmAoZr41MUg
Website – > https://thanlwinkhet.net/?p=6714
