နဂါးတွင်းကျေးရွာကို စစ်ကောင်စီက ထပ်မံမီးရှို့

နဂါးတွင်းကျေးရွာကို စစ်ကောင်စီက ထပ်မံမီးရှို့

*********************

သဇင်

ဖေဖော်ဝါရီ ၅ ၊ ၂၀၂၄။

စစ်ကိုင်းတိုင်း၊ မုံရွာမြို့နယ်၊ နဂါးတွင်းကျေးရွာရှိနေအိမ်များကို စစ်ကောင်စီတပ်က ထပ်မံမီးရှို့ဖျက်ဆီးခဲ့ပြီး နေအိမ် ၁၀၀ ကျော် မီးလောင်ပျက်စီးခဲ့ကာ ယခုအကြိမ်မီးရှို့ခြင်းသည် တတိယအကြိမ်မြောက် မီးရှို့ခံရခြင်း ဖြစ် သည်ဟု ဒေသခံများထံကသိရသည်။

ဖေဖော်ဝါရီလ ၂ ရက်ကစ၍ မုံရွာမြို့၊ မအူဂိတ်ကစတင်ထွက်ခွာလာသည့် စစ်ကောင်စီတပ်သားအင်အား ၁၀၀ ဝန်းကျင်ပါစစ်ကြောင်းသည် နဂါးတွင်းရွာညာဘက်ရှိ ညောင်လေးပင်စခန်းတွင် စခန်းချရပ်နားခဲ့ပြီး ဖေဖော်ဝါ ရီလ ၃ ရက်တွင် နဂါးတွင်းရွာသို့ ဝင်ရောက်လာခဲ့ကြသည်။

ယင်းစစ်ကြောင်း နဂါးတွင်းရွာထဲဝင်ရောက်လာချိန်တွင် ဒေသခံကာကွယ်ရေးတပ်များနှင့် အချိန် ၃ နာရီကြာ တိုက်ပွဲ ဖြစ်ပွားခဲ့ပြီး ရွာတောင်ပိုင်းရှိနေအိမ်များကို မီးရှို့ဖျက်ဆီးခဲ့သည့်အပြင် လေဖြတ်နေသည့် အဖွားအို ၁ ဦးကို လည်း မီးရှို့သတ်ဖြတ်သွားသည်ဟု အသက် ၄၀ ဝန်းကျင်အရွယ် ဒေသခံအမျိုးသမီး ၁ ဦးက သံလွင်ခက် ကို ပြော သည်။

“တိုက်ပွဲဖြစ်ပြီးနောက် ညနေ ၃ နာရီလောက်မှာ ရွာတောင်ပိုင်းက နေအိမ်အကုန်လုံးကို မီးရှို့သွားတယ်။ အဲ့ဒီ ထဲမှာ လေဖြတ်နေလို့ မခေါ်သွားနိုင် မပြေးနိုင်တဲ့ အဖွားအို ၁ ဦးကို မီးထဲမှာ အရှင်လတ်လတ်မီးရှို့ခဲ့တာ” ဟု ဆိုသည်။

အဆိုပါ စစ်ကြောင်းစတင်ဝင်ရောက်ချိန်တွင် ဒေသခံကာကွယ်ရေးတပ်များနှင့် ထိတွေ့တိုက်ပွဲဖြစ်ပွားခဲ့သည့် အတွက် တိုက်ပွဲဖြစ်ပွားနေချိန်အတွင်း ရွာထဲရှိဒေသခံများပုန်းရှောင်နိုင်ခဲ့ပြီး ဖမ်းဆီးခံရခြင်းမျိုးမရှိခဲ့ ဟု ၎င်းက ဆက်ပြောသည်။

နဂါးတွင်းရွာကို စစ်ကောင်စီတပ်များက  ၂၀၂၂ ခုနှစ် စက်တင်ဘာလ ၁၄ ရက်၌  နေအိမ် ၁၆ လုံးကိုလည်း ကောင်း၊ ၂၀၂၂ ခုနှစ်လ နိုဝင်ဘာ ၃ ရက်တွင် နေအိမ် ၂၇ လုံးကိုလည်း ၊ ယခုဖေဖော်ဝါရီလ ၃ ရက်နေ့တွင် နေအိမ် ၁၀၀ ကျော်ကိုလည်းကောင်း မီးရှို့ဖျက်ဆီးခဲ့သည်။

လက်ရှိတွင် နဂါးတွင်းရွာအတွင်း ကာကွယ်ရေးတပ်ဖွဲ့ဝင်များနှင့် ကျေးရွာဒေသခံများက နယ်မြေရှင်းလင်းရေး လုပ်ဆောင်နေပြီး ဒေသခံအချို့  ရွာထဲပြန်လည်ဝင်ရောက်နေထိုင်နေပြီဟု သိရသည်။

Monywa Revolution Force – MRF တာဝန်ခံ မီးပွား က “စခတွေနဲ့ ပျူစောထီးတွေရဲ့ သွေးကွက်တွေ၊ ဦးနှောက်လို့ယူဆရတဲ့အရာတစ်ခု၊ ကျောပိုးအိတ်၊ စခ အီကွေးမန့်တစ်ခု နဲ့ တိုက်ပွဲအတွင်း ထွက်ပြေးရင်းကျကျန် ခဲ့တဲ့ ကျည်ဘောက်တွေ၊ ကျည်ဆံတွေကို နယ်မြေရှင်းလင်းရေးလုပ်ရင်းရရှိခဲ့ပါတယ်” ဟုဆိုသည်။

အချိန် ၃ နာရီကြာဖြစ်ပွားခဲ့သည့် အဆိုပါတိုက်ပွဲဖြစ်စဉ်အတွင်း စစ်ကောင်စီဘက်က ဗိုလ်ကြီး ၁ ဦးအပါအဝင် ၃ ဦး သေဆုံးခဲ့ပြီး ၁၀ ဦးကျော် ဒဏ်ရာရရှိခဲ့သည်။

တစ်ဖက်တွင်လည်း စစ်ကောင်စီမအူစစ်ဆေးရေးဂိတ်က ၈၁ မမ ၊ ၁၂၀ မမလက်နက်ကြီးများဖြင့် တိုက်ပွဲ ဖြစ် ပွားရာနေရာကို ၂၄ လုံးခန့် ပစ်ကူပေးခဲ့သည့်အတွက် ကာကွယ်ရေးအဖွဲ့ဝင် ရဲဘော် ၆ ဦး ထိခိုက်ဒဏ်ရာရရှိခဲ့ သည်။

နဂါးတွင်းရွာတွင် အိမ်ခြေ ၈၀၀ ၊ လူဦးရေ ၃၀,၀၀ကျော် ရှိပြီး စစ်ကောင်စီ၏ မီးရှို့ဖျက်ဆီးမှုကြောင့် နေအိမ် ၁၀၀ ကျော် မီးလောင်ဆုံးရှုံးထားသည်။

ဓာတ်ပုံ – CJ။

ပုံစာ – ဖေဖော်ဝါရီ ၃ ရက်တွင် မီးရှို့ဖျက်ဆီးခံခဲ့ရသည့် နဂါးတွင်းရွာရှိ နေအိမ်များမြင်ကွင်း။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3239

YouTube – > https://youtu.be/eEaLA1Cu5r0

Website – > https://thanlwinkhet.net/?p=7494