ဆီဆိုင်မြို့တိုက်ပွဲတွင်း ပိတ်မိနေသူအားလုံးနီးပါးကို ယနေ့ကယ်ထုတ်နိုင်
***************************
သံလွင်ခက်
ဇန်နဝါရီ ၂၅ ၊ ၂၀၂၄ ။
ရှမ်းပြည်နယ်တောင်ပိုင်း၊ ဆီဆိုင်မြို့တိုက်ပွဲအတွင်း ပိတ်မိနေသူအားလုံးနီးပါးကို ယနေ့တွင် ဆက်လက်ကယ် ထုတ်နိုင်ခဲ့သည်ဟု ဒေသခံများအား ကူညီကယ်ထုတ်ပေးနေသူများထံက သိရသည်။
ဆီဆိုင်မြို့တွင် ယမန်နေ့ညနေပိုင်း၌ တိုက်ပွဲပြင်းထန်ဖြစ်ပွားခဲ့ပြီး စစ်ကောင်စီက လေကြောင်းမှ လာရောက်တိုက် ခိုက်ခဲ့သည့်အပြင် ဒေသခံအများအပြားလည်း ပိတ်မိနေခဲ့သည်။
” မြို့ထဲမှာ ခံနေတဲ့သူတွေကို တတ်နိုင်သလောက် ကူထုတ်ပေးတယ်။ ထုတ်လို့ရသူတွေ သွားထုတ်တယ်။ တချို့ က နည်းနည်းကျန်တယ်။ ကျန်တယ်ဆိုတာက မြို့ထဲကတော့ ကုန်သလောက်ဖြစ်သွားပြီ။ တချို့က အိမ်စောင့် ကျန်တာမျိုးရှိတယ် “ဟု ဆီဆိုင်မြို့ခံ အမျိုးသား ၁ ဦးက ပြောသည်။
ဆီဆိုင်မြို့တွင် ယခင် ကရင်နီပြည်တွင်ဖြစ်ပွားခဲ့သည့်တိုက်ပွဲများကြောင့် လာရောက်ရှောင်တိမ်းနေသည့် စစ် ရှောင်ဟောင်းများနှင့် ဆီဆိုင်ဒေသခံ စုစုပေါင်းလူဦးရေ ၁ သိန်းကျော်တို့သည် နီးစပ်ရာမြို့များ ၊ကျေးရွာများနှင့် တောထဲတို့၌ ရှောင်တိမ်းနေကြရသည် ။
” အခုက အမိုးအကာတွေ အတော်လိုတယ်။ ရုတ်တရက် ပြေးကြတော့လေ၊ တချို့က စားစရာမပါကြဘူး။ နေ စရာက အတော်ခက်တယ်။ လူတွေအရမ်းများတော့လေ ။ တချို့တောထဲမှာနေတဲ့သူတွေရှိတယ်။ အိမ်မှာ ကပ်နေ တဲ့သူတွေရှိတယ်။ လွတ်ရာကျွတ်ရာ ရွာထဲတွေပြေးကြတယ်။ အစုံပဲဗျာ “ဟု စစ်ရှောင်များကို တပိုင်တနိုင် ကူညီပေးနေသူ ၁ ဦးကပြောသည်။
၎င်းကဆက်လက်ပြီး ” စိတ်အတော်ပင်ပန်းရတယ်ဗျာ ။ မနက်က ကျွန်တော် ဆီဆိုင်ခဏပြန် ပစ္စည်းဝင်ယူပြီး တော့ မြို့ထဲမှာ ခံနေတဲ့သူတွေ၊ စစ်ရှောင်စခန်းမှာ ခံနေတဲ့သူတွေကို သွားပြီးမှ ကယ်ထုတ်တယ်။ တချို့ကထွက်ဖို့ ဆီတောင်မရှိဘူး ။ ကျွန်တော်လည်း ဆီတတ်နိုင်သလောက်သယ်သွားပြီးတော့ ဆီ ၅ ဂါလံဗူး ၁၀ ဗူး သွားလှူပေး လိုက်တယ် “ဟု ၎င်းကပြောသည်။
ဆီဆိုင်မြို့ရှိဒေသခံများနှင့် ယခင်စစ်ဘေးရှောင်များသည် ယမန်နေ့နှင့် ယနေ့တွင် အများအပြားရှောင်တိမ်းနေခဲ့ ကြခြင်းဖြစ်ပြီး တောင်ကြီးမြို့က ဒေသခံများကလည်း ကားများဖြင့် ကူညီသယ်ဆောင်ပေးခဲ့ကြသည်။
“တစ်မနက်လုံး ကားအကူအညီတောင်းတာတွေ လိုက်ချိတ်ဆက်ပေးနေတာ ။ မနားရဘူး ။ အကူအညီတောင်း တာတွေ ဆက်တိုက်ပဲ။ အခုနောက်ပိုင်းမှ နည်းသွားတာ “ဟု ကားများကူညီပေးနေသည့် တောင်ကြီးမြို့ခံ ၁ ဦးက ပြောသည်။
ဆီဆိုင်မြို့တွင် စစ်ကောင်စီတပ်၊ PNA – ပြည်သူ့စစ်ပူးပေါင်းတပ်နှင့် PNLA၊ KNDF ၊ PDF ပူးပေါင်းတပ်တို့ တိုက်ပွဲဖြစ်ပွားခဲ့ပြီး ဆီဆိုင်မြို့ရဲစခန်းနှင့် စစ်ကောင်စီတပ်စခန်းအချို့ကို ပူးပေါင်းတပ်များက သိမ်းပိုက်ထားနိုင် သည်ဟု ဒေသခံသတင်းဌာနတချို့၌ဖော်ပြထားသည် ။
” အခြေအနေက အတော်ကြမ်းတယ် ။ လေယာဥ်နဲ့တောင်ပစ်တယ်။ လက်နက်ကြီး၊ လက်နက်ငယ်တွေက ချ လိုက်၊ ပစ်လိုက်၊ အိမ်တွေလည်း မီးလောင်တယ် “ဟု ဒေသခံ ၁ ဦးကပြောသည် ။
ယမန်နေ့ညပိုင်းတွင် ဆီဆိုင်မြို့၊ မြကန်သာရပ်ကွက်ကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ခဲ့သော ကြောင့် ပြည်သူတချို့ထိခိုက်ဒဏ်ရာရရှိခဲ့ပြီး နေအိမ်များလည်း မီးလောင်ပျက်စီးခဲ့သည်ဟု ဒေသခံများထံက သိရသည်။
ပုံစာ – ယနေ့ထပ်စစ်ရှောင်ကြရသည့် ဆီဆိုင်မြို့တွင်းက စစ်ရှောင်များ။
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3138
YouTube- > https://youtu.be/SpxIBpTYop8
Website _> https://thanlwinkhet.net/?p=7270
