ရှမ်းမြောက်၌ ယာယီအပစ်ရပ်စဲဟု သတင်းထွက်ပေါ်
*****************************
Saw Smith
ဇန်နဝါရီ ၁၂ ၊ ၂၀၂၄ ။
ယမန်နေ့၌ မြောက်ပိုင်းညီနောင်မဟာမိတ် ၃ ဖွဲ့ဘက်က တိုက်ပွဲနှင့် ထိုးစစ်များမရှိခဲ့သော်လည်း စစ်ကောင်စီက တအာင်း နှင့် ရခိုင်ဒေသများ၌ လေကြောင်းကဗုံးကြဲခြင်း နှင့် လက်နက်ကြီးများဖြင့် ပစ်ခတ်တိုက်ခြင်းများကို ဆက်လက်ပြုလုပ်နေသည်ဟု ညီနောင် ၃ ဖွဲ့က သတင်းထုတ်ပြန်သည်။
ရှမ်းပြည်မြောက်ပိုင်း၌ဖြစ်ပေါ်နေသည့် ပြင်းထန်သောစစ်ရေးအခြေအနေများနှင့်ပတ်သက်၍ တရုတ်၏ ကြားဝင် ညှိနှိုင်းမှုဖြင့် ညီနောင် ၃ ဖွဲ့နှင့် စစ်ကောင်စီတို့ ယခုလ ဇန်နဝါရီ ၇ ၊ ၈ နှင့် ၉ ရက်တို့တွင် တရုတ်နိုင်ငံ ကူမင်းမြို့၌ တွေ့ဆုံဆွေးနွေးခဲ့ကြသော်လည်း နှစ်ဖက်သဘောတူညီမှုမရရှိခဲ့ပေ။
ထို့ကြောင့် ဇန်နဝါရီ ၁၀ ရက် နှင့် ၁၁ ရက်တို့၌ ထပ်မံတွေ့ဆုံဆွေးနွေးခဲ့ကြရာ ရှမ်းမြောက်၌ ယာယီအပစ်ရပ်စဲရန် သဘောတူညီမှုရရှိခဲ့ကြသည်ဟု ညီနောင်မဟာမိတ် ၃ ဖွဲ့နှင့်နီးစပ်သည့် စစ်ရေးသတင်းအရင်းအမြစ်များက သံလွင်ခက်ကို ပြောသည်။
ယာယီအပစ်ရပ်စဲသည့် သတင်းများထွက်ပေါ်လာနေသော်လည်း ယမန်နေ့ညပိုင်းနှင့် ယနေ့ နံနက်ပိုင်းက လားရှိုး မြို့တွင် လက်နက်ကြီးပစ်ခတ်သံများ ကြားနေရသည်ဟု မြို့ခံအမျိုးသား ၁ ဦးက ပြောသည်။
” ယာယီအပစ်ခတ်ရပ်စဲထားတယ်ဆိုတဲ့ ဟာမျိုးတွေတက်လာတာတော့ရှိတယ် ။ ဒါပေမယ့် မနေ့ညကဆိုရင် တစ် ညလုံးနီးပါး လက်နက်ကြီးသံတွေ ကြားနေရတယ် “ဟု လားရှိုးမြို့ခံ အမျိုးသား ၁ ဦးကပြောသည်။
ထို့ပြင် လားရှိုးနှင့်အခြားပြည်နယ်များကိုဆက်သွယ်ထားသည့် လမ်းကြောင်းများလည်း ယနေ့နံနက်ပိုင်းတွင် ထပ်မံပြတ်တောက်သွားသည့်အတွက် ယာယီအပစ်ရပ်စဲသည်ဆိုသောသတင်းကို ယုံရခက်နေသည်ဟု ၎င်းက ဆက်လက်ပြောကြားသည်။
” ဒီမနက်ကျတော့ ကိုယ်တို့တွေ့လိုက်ရတာက လားရှိုးကနေ နမ္မတူဘက်သွားတဲ့ လမ်းပေါ့နော်။ အရင်တုန်းက အီ နိုင်းတံတားဖျက်ထားတော့ အဲ့ဘက်ကနေသွားတယ်။ အခုက အဲတံတားကျိုးသွားပြီဆိုတော့ ဘယ်ဘက်တွေကို သွားမရတော့ဘူးလဲဆိုတော့ နမ္မတူ ၊ မန်တုံ ၊ နမ့်ဆန်အပြင်ကို မူဆယ်၊ နမ့်ခမ်းဘက်သွားတဲ့လမ်းကြောတွေပါ အကုန်ပြတ်သွားတာမျိုး တွေ့ရတယ်။ အပစ်အခတ်ရပ်စဲထားတယ်လို့ ပြောပေမယ့် ၊ ယာယီရပ်စဲထားတယ်လို့ ပြောပေမယ့် ဒီလိုအနေအထားတွေဖြစ်တော့ နည်းနည်းယုံရတာ ခက်တယ် ”
ရှမ်းမြောက်၌ နှစ်ဖက်ယာယီအပစ်ရပ်စဲထားသည်ဟု သတင်းထွက်ပေါ်နေသော်လည်း အဆိုပါကိစ္စနှင့်ပတ်သက်၍ ညီနောင် ၃ ဖွဲ့က တရားဝင်ထုတ်ပြန်ထားခြင်းမရှိသော်လည်း ညီနောင် ၃ ဖွဲ့၏ ယမန်နေ့ ဇန်နဝါရီလ ၁၁ ရက်၊ ည၁၂ နာရီ သတင်းထုတ်ပြန်ချက်၌ –
” ညီနောင်မဟာမိတ် (၃) ဖွဲ့၏ နယ်မြေများတွင် ယနေ့၌ နှစ်ဖက်ရင်ဆိုင်တိုက်ပွဲ၊ ထိုးစစ်များမရှိခဲ့သော်လည်း တအာင်းနှင့် ရက္ခိုင်ဒေသများ၌မူ စစ်ကောင်စီဘက်က လက်နက်ကြီးနှင့် လေကြောင်းပစ်ခတ်တိုက်ခိုက်မှုများမှာ ယခင်ရက်များနည်းတူ အပြောင်းအလဲမရှိ ဆက်လက်ရှိနေခဲ့သည် ” ဟု ဖော်ပြထားသည်။
ဇန်နဝါရီလ ၁၁ ရက်တွင် စစ်ကောင်စီက လားရှိုးနှင့် နမ့်ဆန်မြို့နယ်ရှိကျေးရွာများကို လေကြောင်းက ၁၇ ကြိမ် လာရောက်၍ ဗုံးသီး ၁၃၀ ထက်မနည်း ကြဲချတိုက်ခိုက်ခဲ့သည်ဟု ထုတ်ပြန်ထားသည်။
ထို့ပြင် လားရှိုး၊ ကျောက်မဲ ၊ မိုးကုတ် နှင့် သီပေါမြို့နယ်များတွင် စစ်ကောင်စီက လက်နက်ကြီး ၃၆ ကြိမ်ပစ်ခတ် ခဲ့သည် ။ ယမန်နေ့၌ ရခိုင်ပြည်နယ်တွင်လည်း စစ်ကောင်စီက လေကြောင်းမှ ဗုံးကြဲခြင်း ၊ စစ်ရေယာဥ်ပေါ်မှ ပစ် ခတ်ခြင်း ၊ လက်နက်ကြီးများဖြင့် ပစ်ခတ်ခြင်းများ ပြုလုပ်ခဲ့သည်။
နှစ်ဖက်ညှိနှိုင်းဆွေးနွေးနေသည့် ဇန်နဝါရီ ၁၀ ရက်ကလည်း စစ်ကောင်စီသည် လားရှိုးမြို့နယ်ရှိကျေးရွာများကို လေယာဥ်ဖြင့် ဗုံး ၂၇ လုံးကြဲချခဲ့ပြီး လက်နက်ကြီးဖြင့် ၂၄ ကြိမ် တိုက်ခိုက်ခဲ့သည်။
ဇန်နဝါရီ ၁၀ ရက်တွင် ရှမ်းပြည်နယ်မြောက်ပိုင်းရှိ လားရှိုး၊ နမ္မတူ ၊ ရခိုင်ပြည်နယ်ရှိ ကျောက်တော်၊ မင်းပြား ၊ မြောက်ဦး ၊ ဘူးသီးတောင် မြို့နယ်များကို စစ်ကောင်စီတပ်များက လေကြောင်းက ဗုံးကြဲတိုက်ခိုက်မှု ၊ လက်နက် ကြီးများဖြင့် ပစ်ခတ်မှုများကြောင့် အရပ်သားများသေဆုံးမှု၊ ထိခိုက်ဒဏ်ရာရရှိမှုနှင့် နေအိမ်အဆောက်အအုံ ပျက် စီးမှုများရှိခဲ့သည်ဟု ညီနောင်မဟာမိတ် ၃ ဖွဲ့က ထုတ်ပြန်ထားသည်။
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2981
YouTube- > https://youtu.be/SpxIBpTYop8
Website _> https://thanlwinkhet.net/?p=6968
