မြောက်ပိုင်းညီနောင် ၃ ဖွဲ့နှင့် စစ်ကောင်စီ ကူမင်းဆွေးနွေးပွဲအဖြေမထွက်

Saw Smith

ဇန်နဝါရီ ၁၁ ၊ ၂၀၂၄ ။

ဆွေးနွေးပွဲအဖြေမထွက်ခဲ့သည့်အပြင် ဆွေးနွေးမှုများပြီးဆုံးပြီးနောက် ယမန်နေ့ ဇန်နဝါရီလ ၁၀ ရက် တစ်ရက်တည်းတွင်ပင် စစ်ကောင်စီက  လားရှိုးမြို့နယ်ရှိကျေးရွာများကို လေယာဥ်ဖြင့် ဗုံး  ၂၇ လုံးကြဲချခဲ့ပြီး လက်နက်ကြီးဖြင့် ၂၄ ကြိမ် တိုက်ခိုက်ခဲ့သည်ဟု မြောက်ပိုင်းမဟာမိတ်ညီနောင် ၃ ဖွဲ့က သတင်းထုတ်ပြန်သည်။

ရှမ်းပြည်နယ်မြောက်ပိုင်းတွင် စစ်ရေးပြင်းထန်နေသည့်အခြေအနေများနှင့်ပတ်သက်၍ တရုတ်၏ ကြားဝင်ညှိနှိုင်း ပေးမှုဖြင့် မြောက်ပိုင်းညီနောင်မဟာမိတ် ၃ ဖွဲ့နှင့် စစ်ကောင်စီတို့ ယခုလ ဇန်နဝါရီ ၇၊ ၈ နှင့် ၉ ရက်တို့၌ တရုတ် နိုင်ငံ၊ ကူမင်းမြို့တွင် ဆွေးနွေးခဲ့ကြသည် ။

၃ ရက်ကြာမြင့်ခဲ့သောအဆိုပါဆွေးနွေးပွဲတွင် နှစ်ဖက်သဘောတူညီမှုအဖြေများမရရှိခဲ့ဟု ရက္ခိုင့်တပ်တော် – AA နှင့် နီးစပ်သည့် စစ်ရေးသတင်းအရင်းအမြစ်က သံလွင်ခက်ကို ပြောသည်။

ထို့ပြင် တအာင်းအမျိုးသားလွတ်မြောက်ရေးတပ်မတော် – TNLA နှင့်နီးစပ်သည့် လားရှိုးဒေသခံ အမျိုးသား ၁ ဦး ကလည်း ” အဖြေမထွက်ဘူးဆိုတာထက် မပြတ်သေးဘူး ။ မပြီးသေးဘူး ဆိုတာမျိုးကြားရတယ် ” ဟု ပြောသည် ။

ကူမင်းမြို့ဆွေးနွေးပွဲတွင် စစ်ရေးအရေးနိမ့်မှုများနှင့်ကြုံနေရသည်တိုင် စစ်ကောင်စီဘက်က အလျော့ပေး ဆွေး နွေးခဲ့သည်မျိုးမရှိသည့်အပြင် ညီနောင်မဟာမိတ်တပ်များ လက်ရှိသိမ်းပိုက်ထားသည့် မြို့တချို့ကို ပြန်ပေးရန်၊ လက်နက်ချရန်နှင့် စစ်တပ်အောက်၌သာနေရန် အထိတောင်းဆိုမှုများရှိခဲ့သည်ဟု သိရသည်။

” ဒီအချိန်မှာ နှစ်ဖက်လုံးက တောင်းဆိုမှုတွေက များမယ်လို့ ထင်တာပဲ ။ EAOs တွေက သူတို့သိမ်းထားတဲ့နေရာ တွေကို လက်လွတ်ချင်မှာ မဟုတ်ဘူးပေါ့နော်။ ပိုတောင်းရင်သာ တောင်းမှာပေါ့ “ဟု ရှမ်းမြောက်စစ်ဆင်ရေးကို လေ့လာစောင့်ကြည့်နေသည့် စစ်ရေးအကဲခက် ၁ ဦးကပြောသည် ။

နှစ်ဖက်ဆွေးနွေးမှုမပြေလည်သည့် သတင်းများထွက်ပေါ်လာမှုနှင့်အတူ ဆွေးနွေးပွဲပြီးသည့် နောက်တစ်ရက် ဇန်နဝါရီလ ၁၀ ရက်တွင် စစ်ကောင်စီဘက်က လားရှိုးအပါအဝင် ရှမ်းမြောက်နှင့် ရခိုင်ပြည်နယ်တို့တွင် ဗုံးကြဲ တိုက်ခိုက်မှုများနှင့် လက်နက်ကြီးများဖြင့် ပစ်ခတ်မှုများ ဆက်တိုက်ပြုလုပ်ခဲ့သည်။

ယမန်နေ့တွင်လည်း ရှမ်းပြည်နယ်မြောက်ပိုင်းရှိ လားရှိုး၊ နမ္မတူ  ၊ ရခိုင်ပြည်နယ်ရှိ ကျောက်တော်၊ မင်းပြား ၊ မြောက်ဦး ၊ ဘူးသီးတောင် မြို့နယ်များကို စစ်ကောင်စီတပ်များက လေကြောင်းက ဗုံးကြဲတိုက်ခိုက်မှု ၊ လက်နက်ကြီးများဖြင့် ပစ်ခတ်မှုများကြောင့် အရပ်သားများသေဆုံးမှု၊ ထိခိုက်ဒဏ်ရာရရှိမှုနှင့် နေအိမ် အဆောက်အအုံပျက်စီးမှုများရှိခဲ့သည်ဟု ညီနောင်မဟာမိတ် ၃ ဖွဲ့က ထုတ်ပြန်ထားသည်။

ထို့ပြင် ယနေ့ နေ့လယ်ပိုင်း၌လည်း လားရှိုးမြို့ပေါ်တွင်  ဟောင်ဝှစ်ဇာပစ်ခတ်သံများ ၊ ရဟတ်ယာဥ်အသံများ ကြားနေရသည်ဟု လားရှိုးမြို့ခံအမျိုးသား ၁ ဦးကသံလွင်ခက်ကို ပြောသည်။

ကူမင်းမြို့ ဆွေးနွေးပွဲအခြေအနေများနှင့်ပတ်သက်၍ မြောက်ပိုင်းညီနောင်မဟာမိတ် ၃ ဖွဲ့က မထုတ်ပြန်သော် လည်း ၁၀၂၇ စစ်ဆင်ရေးကြီး ၇၆ ရက်မြောက်နေ့သို့ ရောက်ရှိလာသည့်တိုင် သတ်မှတ်ထားသည့် စစ်ရေး ပစ်မှတ် များအား ရပ်တန့်ခြင်းမရှိဘဲ ဆက်လက်ချေမှုန်းတိုက်ခိုက်လျက်ရှိသည်ဟု ညီနောင်မဟာမိတ် ၃ ဖွဲ့က ယမန်နေ့ ညပိုင်း၌ သတင်းထုတ်ပြန်ထားသည်။

ပုံစာ-ကူမင်းမြို့ ဆွေးနွေးပွဲ နှင့် ဆွေးနွေးပွဲ နောက်ဆုံးရက်ဖြစ်သည့် ဇန်နဝါရီလ ၉ ရက်၊ နေ့လည်ပိုင်း၌ လောက်ကိုင်မြို့ကို စစ်ကောင်စီက လောကြောင်းမှ ဗုံးကြဲမှုကြောင့် ထိခိုက်ပျက်စီးမှုများ။

*********

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/2933

YouTube- > https://youtu.be/SpxIBpTYop8

Website _> https://thanlwinkhet.net/?p=6928