စစ်ခေါင်းဆောင်က ထိပ်ပိုင်းအရာရှိနှင့် ဝန်ကြီးတချိူ့ကို အပြောင်းအလဲပြုလုပ်လာပြန်
********************************
သံလွင်ခက်
ဇန်နဝါရီ ၉ ၊ ၂၀၂၄။
အာဏာသိမ်းကာလ ၃ နှစ်နီးပါးတွင် ရှမ်းပြည်နယ်၊ ရခိုင်ပြည်နယ်အပါအဝင် အခြားပြည်နယ်များရှိ တပ်စခန်းများ လက်လွှတ်ဆုံးရှုံးနေရသော စစ်ခေါင်းဆောင်က ထိပ်ပိုင်းအရာရှိနှင့် ဝန်ကြီးတချို့ကို အပြောင်းအလဲများ ပြုလုပ်ခဲ့သည်။
တပ်မတော်(ရေ) ကာကွယ်ရေးဦးစီးချုပ် ဗိုလ်ချုပ်ကြီး မိုးအောင် ကို နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံးဝန်ကြီးဌာန – ၄ ၏ ပြည်ထောင်စုဝန်ကြီးနှင့် အမျိုးသား လုံခြုံရေးဆိုင်ရာ အကြံပေးပုဂ္ဂိုလ်အဖြစ် ပြောင်းလဲခန့်အပ်လိုက်သည်ဟု ဇန်နဝါရီ ၈ ရက်တွင် စစ်ကောင်စီလက်အောက်ခံသတင်းစာများတွင် ထည့်သွင်းဖော်ပြထားသည်။
အမျိုးသားလုံခြုံရေးကိစ္စရပ်များကို ဘက်ပေါင်းစုံကလေ့လာသုံးသပ်အကြံပြုနိုင်ရန်အတွက် ဗိုလ်ချုပ်ကြီး မိုးအောင် ကို အမျိုးသားလုံခြုံရေးဆိုင်ရာ အကြံပေးပုဂ္ဂိုလ်အဖြစ် ပြောင်းလဲခန့်အပ်ခဲ့ခြင်းဖြစ်သည်ဟု သတင်းစာတွင် ဖော်ပြထားသည်။
ဗိုလ်ချုပ်ကြီး မိုးအောင် သည် စစ်တက္ကသိုလ် အပတ်စဉ် ( ၂၈ ) ဆင်းဖြစ်ပြီး ၂၀၁၅ ခုနှစ်တွင် စစ်ဦးစီးအရာရှိချုပ်ရေ) ရာထူးဖြင့် တာဝန်ထမ်းဆောင်ခဲ့ပြီး စစ်တပ်အာ ဏာသိမ်းသည့် ၂၀၂၁ ခုနှစ်၌ ရေတပ်ဦးစီးချုပ်အဖြစ် တာဝန်ထမ်းဆောင်ခဲ့သူဖြစ်သည်။
ယခုကဲ့သို့ ရာထူးအချိန်းအပြောင်းလုပ်ခြင်းသည် ၂၀၀၃ ခုနှစ်ကစပြီး စစ်တပ်တွင်းကျင့်သုံးလာသည့် သာမာန်လုပ်ရိုးလုပ်စဉ်ကိစ္စတစ်ခုပင်ဖြစ်သည်ဟု CDM စစ်သားများကို အကူအညီပေးနေသည့် အဖွဲ့တစ်ခုဖြစ်သော ‘ပြည်သူ့ပန်းတိုင်’အဖွဲ့က CDMတပ်မတော်သား ကိုနောင်ရိုးက သုံးသပ်သည်။
၎င်းက ” စစ်တပ်မှာ ပုံမှန် အချိန်းအပြောင်းရှိတယ်။ ကျွန်တော်တို့ ၆၊ ၅၊ ၄၊ ၃ လို့ခေါ်တာပေါ့နော်။ ဗိုလ်မှူးချုပ်ဆိုရင် ၆ နှစ်၊ ဗိုလ်ချုပ်ဆိုရင် ၅ နှစ်၊ ဗိုလ်ချုပ်ကြီးဆိုရင် ၃ နှစ်ပေါ့ ။ အဲ့စနစ်နဲ့ သွားတာပေါ့။ သွားတော့ ဗိုလ်ချုပ်မိုးအောင်လည်း သူ ၃ နှစ်ပြည့်တဲ့အတွက် အချိန်းအပြောင်းလုပ်တာပေါ့။ သာမန်လုပ်ရိုးလုပ်စဉ်လို့ပဲ ပြောလို့ရပါတယ်။ တခြားသက်ရောက်မှုတော့ ရှိလာမယ်မထင်ပါဘူး “ဟုဆိုသည်။
ဗိုလ်ချုပ်ကြီး မိုးအောင် အပြင် ပြည်ထောင်စုအစိုးရအဖွဲ့ရုံးဝန်ကြီးဌာန – ၂ ၏ ဝန်ကြီး ဦးကိုကိုလှိုင် ကိုလည်းနိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌရုံးဝန်ကြီးဌာန – ၁ ၏ ပြည်ထောင်စုဝန်ကြီးအဖြစ် ပြောင်းလဲခန့်အပ်ခဲ့သည်။
ထို့ပြင် ပြည်ထောင်စုအစိုးရအဖွဲ့ရုံးဝန်ကြီးဌာန ၁ ၏ ဝန် ကြီးဖြစ်သည့် ဦးအောင်နိုင်ဦး ကိုလည်း နိုင်ငံတော် စီမံအုပ်ချုပ်ရေးကောင်စီ ဥက္ကဋ္ဌရုံးဝန်ကြီးဌာန ၂ ၏ ပြည် ထောင်စုဝန်ကြီးအဖြစ် ပြောင်းလဲခန့်အပ်ခဲ့သည်။
ထိပ်ပိုင်းအရာရှိနှင့် ဝန်ကြီး တချိူ့ကို အပြောင်း အလဲပြုလုပ်ခဲ့သည့်စစ်ခေါင်းဆောင်၏ လုပ်ရပ်သည် အဆုံးအရှုံးများရင်ဆိုင်နေရစဉ် တောင်စဉ်ရေမရလုပ်ရပ်သာ ဖြစ်သည်ဟု နိုင်ငံရေးလေ့လာသုံးသပ်သူ ဦးသန်းစိုးနိုင်က ပြောသည်။
၎င်းက “ ဒီချိန်မှာ ဒီလို အပြောင်းအလဲတွေ လုပ်နေတာနဲ့ ပတ်သက်လို့လည်း ဗိုလ်ချုပ်မှူးကြီး မင်းအောင်လှိုင်ရဲ့ ဒီနေ့အချိန်ကာလမှာ သူတပ်ဖွဲ့တွေနဲ့ ကြည်းရေ၊ လေ ဘက်အသီးသီးမှာ အဆုံးအရှုံးတွေနဲ့ ရင်ဆိုင်နေရတဲ့အခါမှာ တောင်စဉ်ရေမရ လျောက်လုပ်နေသလားလို့တောင် စဉ်းစားရပါတယ်။ ဦးစီးချုပ်တွေမှန်သမျှဖယ်ရှား၊ လူတွေအစားထိုး၊ အခြေအနေများ ပြန်ကောင်းလာမလားဆိုပြီးတော့ စဉ်းစားပြီးလုပ်ဆောင်နေတယ်လို့ ထင်ပါတယ်။ ဒီထက်ပိုပြီးတော့ နက်နက်ရှိုင်းရှိုင်း သိခွင့်လည်းမရဘူး။ နောက်ပြီး မျှော်မှန်းလို့လည်းမရတဲ့အနေထားဖြစ်တဲ့အတွက် ဒီလောက်ပဲပြောနိုင်ပါတယ် ” ဟုဆိုသည်။
အာဏာသိမ်းကာလ ၃ နှစ်နီးပါးရှိလာချိန်တွင် ၁၀၂၇ စစ်ဆင်ရေးနှင့်အတူ မြို့သိမ်းတိုက်ပွဲများ များပြားလာပြီး မြို့ပေါင်း ၂၄ မြို့ကို တော်လှန်ရေးအင်အားစုများဘက်က သိမ်းယူထားနိုင်သည်ဟု မြန်မာ့မဟာဗျူဟာနှင့် မူဝါဒလေ့လာရေး အင်စတီကျု (ISP-Myanmar) က ကောက်ယူထားသည့် စာရင်းများအရသိရသည်။
ပုံစာ – ဇန်နဝါရီ ၄ ရက်တွင် ပြုလုပ်သည့် တပ်မတော်စွမ်းရည်သတ္တိဆိုင်ရာ ဂုဏ်ထူးဆောင်တံဆိပ်နှင့် လက်မှတ်များ ချီးမြှင့်အပ်နှင်းခြင်း အခမ်းအနားမြင်ကွင်း။
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2920
YouTube- > https://youtu.be/SpxIBpTYop8
Website _> https://thanlwinkhet.net/?p=6892
