သံလွင်ခက်
ဇန်နဝါရီ ၉ ၊ ၂၀၂၄ ။
စစ်ကောင်စီခေါင်းဆောင် ဗိုလ်ချုပ်မှူးကြီးမင်းအောင် လှိုင် သည် ရှမ်းပြည်နယ်မြောက်ပိုင်း လားရှိုးမြို့ကို ရောက်ရှိနေပြီး ညှိနှိုင်းမှုများပြုလုပ်နေသည်ဟု ရှမ်းပြည်မြောက်ပိုင်းရှိ တိုင်းရင်းသားလက်နက်အဖွဲ့အစည်းများနှင့်နီးစပ်သူများ၊ ဒေသခံများထံက သိရသည်။
လားရှိုးသို့ရောက်ရှိနေသော စစ်ခေါင်းဆောင်သည် ယခုလ ဇန်နဝါရီ ၇ ၊ ၈ ၊ ၉ ရက်များအတွင်း ညှိနှိုင်းမှုများ တောက်လျှောက်ပြုလုပ်ခဲ့ပြီး ၎င်းရောက်ရှိနေစဥ် ရက် ပိုင်းအတွင်း လားရှိုး၌ ယခင်ရက်များထက် လက်နက်ကြီးပစ်ခတ်မှုများအပါအဝင် စစ်ရေးအခြေအနေ ပိုမိုငြိမ်သက်နေသည်ဟု မြို့ခံများက ပြောသည်။
” မအလ က ဒီရောက်နေတယ်ဆိုတာတော့ ကြားတယ်။ အရင်အခေါက်တွေကတော့ တရုတ်မှာပဲ မီတင်လုပ်ကြတယ်။ အခုကတော့ လာရှိုးမှာပဲ လိုလို၊ ဘာလိုလိုသတင်းတွေထွက်နေတယ်။ နေရာတော့ အတိအကျမသိရဘူး။ သိပ်စိုးရိမ်စရာမရှိဘူးလို့ မန်ဆူ ဆရာတော်ပြောထားတဲ့ ဗီဒီယိုအရ ဒီအထဲမှာ ဆွေးနွေးညှိနှိုင်းတာတွေတော့ ဖြစ်ကောင်းဖြစ်နိုင်တယ် “ဟု ရှမ်းမြောက် တိုင်းရင်းသားလက်နက်ကိုင်အဖွဲ့အစည်းများနှင့်နီးစပ်သည့် အမျိုးသာ ၁ ဦးက သံလွင်ခက်ကိုပြောသည်။
ရှမ်းဒေသခံပြည်သူအများအပြား ကိုးကွယ်ကြပြီး စစ်ဗိုလ်ချုပ်များအပါအဝင် နှစ်ဖက်တပ်များအပေါ် သြဇာသက်ရောက်သည့် လားရှိုးမြို့၊ မန်ဆူဆရာတော်ကြီးကလည်း လားရှိုးမြို့က ငြိမ်းချမ်းသွားပြီဟု မိန့်ကြားထားသည် ။
ယနေ့ လူမှုကွန်ရက်စာမျက်နှာ၌ ပျံ့နှံ့လာသည့် ဗီဒီယိုဖိုင်တွင် ဆရာတော်ကြီးက လားရှိုးမြို့အခြေအနေနှင့်ပတ်သက်၍ အိမ်ပြန်ကြဖို့နှင့် ဘာမှမဖြစ်တော့ပါဘူးဟုလည်း မိန့်ကြားထားသည် ။
ထပ်မံ၍လည်း မန်ဆူဆရာတော်ကြီးက ” အားလုံး အားလုံး လူကြီးတွေလည်းပဲ နားလည်မှုပေးပြီးတော့မှ အကုန်လုံး တိုင်းသူပြည်သားလူအများတွေအားလုံး စိတ်ချမ်းသာ ကိုယ်ချမ်းသာနဲ့ ကိုယ့်နေရာကိုယ်အေးအေးဆေးဆေးပြန်နိုင်အောင် ဆောင်ရွက်နေပြီဖြစ်တဲ့အကြောင်း ကြားသိရတဲ့အတွက် ဝမ်းမြောက်ဝမ်းသာ ရှိကြပါစေလို့ မေတ္တာပေးပို့ပါတယ် “ဟု မိန့်ကြားထားသည် ။
ရှမ်းမြောက်ပိုင်းတွင် ဖြစ်ပွားနေသည် တိုက်ပွဲများသည် တဖြည်းဖြည်းနှင့် လားရှိုးမြို့အနီးထိရောက်ရှိလာသောကြောင့် ပြီးခဲ့သည့်ရက်ပိုင်းကလည်း လားရှိုးမြို့အခြေစိုက် UN နှင့် INGO အဖွဲ့အစည်းများ ထွက်ခွာခဲ့ကြသည်။
ထို့ပြင် အမျိုးမျိုးထွက်ပေါ်နေသည့် သတင်းများကြောင့် လားရှိုး၌ လာရောက်ရှောင်တိမ်းနေသူများ၊ လားရှိုးမြို့ရှိ ငွေကြေးတတ်နိုင်သူများကလည်း ကြိုတင်ရှောင်ရှားမှုများ ပြုလုပ်နေကြသည် ။
” အခုလအစပိုင်းကတည်းက လှုပ်လှုပ်ရှားရှား ဖြစ်နေကြတာပေါ့နော် ။ ရှောင်ကြတာက ဒီနေ့အထိ ထွက်နေကြတာရှိတယ် ။ ဒါပေမယ့် အစောပိုင်းရက်ပိုင်းနဲ့စာရင် အခုရက်ပိုင်းက နည်းနည်းပို အေးဆေးဖြစ်လာတယ်လို့ ပြောရမယ်။ လက်နက်ကြီး ပစ်တာတွေရောပေါ့ ” လားရှိုးမြို့ခံ အမျိုးသား ၁ ဦးက သံလွင်ခက်ကို ပြောသည် ။
လားရှိုးမြို့မှ ရန်ကုန်မြို့သို့ ဇန်နဝါရီ ၇ ရက်က ဆင်းလာသည့်ဒေသခံအမျိုးသမီး ၁ ဦးကလည်း ” အခုက သူ့ ( လားရှိုး) ပတ်ပတ်လည်က အကုန်သိမ်းထားတာ ဆိုတော့ လားရှိူး လည်းရောက်လာမှာဆိုပြီးပေါ့။ ရှောင်ကြတာ။ လမ်းတွေကလည်း ခုက တောလမ်းပဲသွားရတာ။ လမ်းတွေပိတ်မှာ စိုးကြတယ်။ စျေးလဲကြီးတယ်။ ကားခကလေ။ လားရှိူး – တန့်ယန်း – နမ့်လန် ဘက်ကနေ ရပ်စောက်၊ ရပ်စောက်ဘက်ကနေ မန္တလေးကိုပြန်ထွက်ပြီး ရန်ကုန်လာရတာ” ဟု ပြောသည် ။
ပြီးခဲ့သော အောက်တိုဘာ ၂၇ ရက်တွင် စတင်ခဲ့သည့် စစ်ဆင်ရေးအတွင်း၌ မြောက်ပိုင်းညီနောင်မဟာမိတ်သုံးဖွဲ့က ရှမ်းမြောက်ပိုင်းရှိ မြို့ ၁၆ မြို့ကို သိမ်းထားနိုင်ပြီး လားရှိုးမြို့အနီးရှိ သန္နီ၊ ကွတ်ခိုင် မြို့များကိုလည်း ယခုရက်ပိုင်းအတွင်း သိမ်းပိုက်ရရှိခဲ့သည်။
ညီနောင်သုံးဖွဲ့က ဆင်နွှဲနေသည့် စစ်ဆင်ရေးအတွင်း၌ စစ်ကောင်စီဘက်က တပ်ရင်းအလိုက်၊ တပ်မအလိုက် ထောင်ချီ၍ လက်နက်ချမှုများရှိနေပြီး ဇန်နဝါရီလ ၅ ရက်ကလည်း လောက်ကိုင်မြို့အခြေစိုက် ဒေသကွပ်ကဲမှုစစ်ဌာနချုပ် (ဒကစ) အပါအဝင် စစ်ကောင်စီတပ်ဖွဲ့ဝင် ၂၅၀၀ နီးပါး လက်နက်ချခဲ့သည်။
အဆိုပါလက်နက်ချမှုတွင် ဗိုလ်မှူးချုပ် ၆ ဦးထိပါဝင်ခဲ့သည့်အပြင် လက်နက်ချခဲ့သော စစ်ကောင်စီတပ်ဖွဲ့ဝင်များနှင့် မိသားစုဝင်များကို လားရှိုးသို့ ပို့ဆောင်ပေးခဲ့သောကြောင့် စစ်ကောင်စီနှင့် ညီနောင်မဟာမိတ်တပ်ဖွဲ့များအကြား လားရှိုးမြို့ စစ်ရေးနှင့်ပတ်သက်၍ ညှိနှိုင်းမှုများဆက်လက်ရှိနိုင်သည်ဟု ရှမ်းမြောက်စစ်ဆင်ရေးကို လေ့လာစောင့်ကြည့်သူများက မှတ်ချက်ပြုပြောဆိုမှုများလည်း ရှိခဲ့သည်။
*****
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2920
YouTube- > https://youtu.be/SpxIBpTYop8
Website _> https://thanlwinkhet.net/?p=6896
