သံလွင်ခက်
ဇန်နဝါရီ ၈ ၊ ၂၀၂၃။
စစ်ကောင်စီလက်အောက်ခံ အုပ်ချုပ်ရေးမှူး ၊ ရာအိမ်မှူး နှင့် ပျူစောထီးများသည် ပဲခူးတိုင်း၊ ကျောက်တံခါးမြို့နယ်အတွင်းရှိ ဒေသခံများထံက ကင်းကြေးကောက်ခံနေသည်ဟု ဒေသခံများထံက သိရသည်။
မြို့နယ်အထွေထွေအုပ်ချုပ်ရေး ဦးစီးဌာနရုံးတွင် သက်ဆိုင်ရာ ကျေးရွာအုပ်ချုပ်ရေးမှူးများကို အစည်းအဝေး ခေါ်ယူပြီးနောက် ကျေးရွာတစ်အုပ်စုလျှင် ၃ ယောက်နှုန်းဖြင့် မီးရထားလမ်းတလျှောက် ကင်းစောင့် ရမည်ဖြစ် ကြောင်း သိရသည်။
ကျောက်တံခါးမြို့ ဒေသခံအမျိုးသား ၁ ဦးက ” အုပ်ချုပ်ရေးမှုးတွေကို မြို့နယ်အုပ်ချုပ်ရုံးမှာခေါ်ပြီး အစည်းဝေး လုပ်တယ်။ ပြီးတော့မှ ရပ်/ကျေးအလိုက် ရပ်/ကျေးရုံးတွေမှာ အုပ်ချုပ်ရေးမှူးကတဆင့်ခေါ်ပြီး ရာအိမ်မှူး၊ ဆယ် အိမ်မှူးနဲ့ ပျူအဖွဲ့တွေခေါ်ပြီး အစည်းအဝေးလုပ်တယ်။ ၈ ရက်နေ့ကစပြီး ကင်းစောင့်ရမယ်ပြောတယ် ” ဟု ဆို သည်။
ထို့နောက် စစ်ကောင်စီလက်အောက်ခံ အုပ်ချုပ်ရေးမှူး၊ ရာအိမ်မှူး ၊ ဆယ်အိမ်မှူးနှင့် ပျူစောထီးများက သက်ဆိုင်ရာကျေးရွာအတွင်းရှိ ဒေသခံများကိုခေါ်ယူကာ ကင်းကြေးကောက်ခံနေခြင်းဖြစ်ကြောင်း ဆယ့်လေးရွာ က ဒေသခံ ၁ ဦးက သံလွင်ခက် သတင်းဌာနကိုပြောသည်။
၎င်းက ” တစ်ရွာလုံးအစည်းအဝေးခေါ်တယ်။ လာမတက်ရင် တစ်အိမ် ၁၀,၀၀၀ ဒဏ်ရိုက်မယ်လို့ အုပ်ချုပ်ရေးမှူး ငပိန်ကပြောသေးတာ။ အစည်းအဝေးမှာ ကျေးရွာတစ်အုပ်စုကို ၃ ယောက်နှုန်း မီးရထားကင်းစောင့်ဖို့ ပြောထား တော့ အဲ့ သွားစောင့်မယ့် လူတစ်ယောက်ကို ၆ သိန်းနှုန်း၊ သုံးယောက်ဆိုတော့ ၁၈ သိန်းကျမယ်ဆိုပြီး တစ်အိမ်ထောင်ကို ကင်းကြေး ၃,၀၀၀ ကောက်တယ် ” ဟုဆိုသည်။
လူဦးရေ ၂ သိန်းခွဲကျော်ရှိသည့် ကျောက်တံခါးမြို့နယ်တွင် ကျေးရွာအုပ်စုပေါင်း ၆၄ အုပ်စုရှိပြီး ကျေးရွာ အုပ်စု ပေါ်မူတည်ကာ ကင်းကြေးကောက်ခံမှုပုံစံ မတူညီဟု ဒေသခံများထံက သိရသည်။
အခြားကျေးရွာအုပ်စုများတွင် တစ်အိမ်ထောင်လျှင် ကင်းကြေး ၃၀၀၀ကျပ် ကောက်ခံမှုရှိနေပြီး ဖဒိုကျေးရွာအုပ် စုတွင်မူကင်းကြေး တစ်အိမ်ထောင်လျှင် ၁၀,၀၀၀ ကျပ် ကောက်ခံနေသည်ဟု ဒေသခံများထံက သိရသည်။
ကျောက်တံခါးမြို့နယ်သည် ကရင်အမျိုးသားအစည်းအရုံး တပ်မဟာ ၃ နယ်မြေနှင့်ထိစပ်နေပြီး ဒေသအတွင်းရှိ စစ်ကောင်စီတပ်များနှင့် ကာကွယ်ရေးတပ်များကြား မကြာခဏ ထိတွေ့တိုက်ပွဲများဖြစ်ပွားလျက်ရှိသည်။
ပြီးခဲ့သည့် ၂၀၂၃ ခုနှစ်၊ ဒီဇင်ဘာ ၁၃ ရက်တွင် မန္တလေး – ရန်ကုန် လူစီးရထား ၁ စင်း ကျောက်တံခါးမြို့နယ်၊ ကျောက်တံခါးဘူတာနှင့် ပိန်းဇလုပ်ဘူတာကြားတွင် မိုင်းဆွဲခံခဲ့ရပြီး ရထားစက်ခေါင်းနှင့် လူစီးတွဲ ၃ တွဲ လမ်း ချော်ခဲ့သည်ဟု စစ်ကောင်စီက ထုတ်ပြန်ထားသည်။
