Saw Smith
ဇန်နဝါရီ ၂ ၊ ၂၀၂၄ ။
ကရင်အမျိုးသားလွတ်မြောက်ရေးတပ်မတော် KNLA နှင့် PDF ပူးပေါင်းစစ်ကြောင်းများက ကော့ကရိတ်မြို့သိမ်း စစ်ဆင်ရေးဆင်နွှဲနေသည်မှာ ယနေ့ဆိုလျှင် ၁ လနှင့် ၂ ရက်မြောက်လာခဲ့ပြီဖြစ်သည် ။
တိုက်ပွဲကာလအတွင်း တော်လှန်ရေးပူးပေါင်းစစ်ကြောင်းများအပေါ် ဒေသခံပြည်သူများက အထင်အမြင်မှားစေ သည့် ဝါဒဖြန့်မှုများ၊ ပူးပေါင်းစစ်ကြောင်းများဘက်က ထိန်းသိမ်းရခက်စေသည့်သတင်းများ အမျိုးမျိုးထွက်ပေါ် နေခဲ့သည်။
ကော့ကရိတ်မြို့ထဲပြန်ဝင်နေ၍ရပြီဆိုသည့်သတင်းများ ယခုရက်ပိုင်းအတွင်း ကျယ်ကျယ်ပြန့်ထွက်ပေါ်နေပြီး ထိုသတင်းအပေါ် ဒေသခံစစ်ရှောင်များက အထူးစိတ်ဝင်တစားရှိနေကြသည်။
Follower ၄၀၀၀၀ ကျော်ထိရှိနေသည့် ” ကော့ကရိတ်အကြောင်းပြောကြမယ် ” Facebook Group တွင် မြို့ထဲပြန်ဝင်နေ၍ရပြီဟု အဖွဲ့ဝင် ၁ ဦးက ယနေ့နံနက်ပိုင်း၌ ပို့စ်တင်ခဲ့သည်။
” မနေ့က ပြန်ရောက်တယ် ။ အခုထိတော့ အေးဆေးပဲဗျ။ ဆိုင်တွေကတော့ ဘာဆိုင်မှ မတွေ့မိသေးဘူး။ ကိုယ့် ရိက္ခာက အပြည့်အစုံဆိုတော့ အဆင်ပြေပါတယ် ” ဟု ဖော်ပြထားသည်။
ထို့ပြင် တချို့သော Follower များကလည်း မြို့ထဲပြန်ဝင်နေ၍ရကြောင်း ထပ်မံဖော်ပြထားကြသည်။
ထိုသတင်းအားဖြန့်နေသူများမှာ ပရိုဖိုင်မဖော်ပြထားသည့်အပြင် မည်သည့်ရပ်ကွက်တွင် ပြန်၍နေထိုင်နေကြ ကြောင်းသေချာမဖော်ပြထားသော်လည်း ကော့ကရိတ်မြို့ခံများက ပြန်ဝင်နေ၍ ရ၊ မရ ကို စိတ်ဝင်တစား မေး မြန်းနေကြသည်။
ထိုသတင်းဖြန့်ချီနေမှုများက မဟုတ်မှန်ကြောင်း တိုက်ပွဲကာလအတွင်း ပိတ်မိနေသူများနှင့် စစ်ရှောင်များအား ကူညီနေသူ ကော့ကရိတ်မြို့ခံအမျိုးသား ၁ ဦးက ပြောသည် ။
” ဝင်ဖို့နေနေသာ ကြာအင်းဘက်ကလူတွေတောင် စစ်ရှောင်နေရပြီ ။ ရောက်နေတာဆိုရင် သူ့အိမ်ရှေ့မှာ ဓာတ်ပုံ ရိုက်ပို့ခိုင်းလိုက်။ သက်သက်လူတွေဒုက္ခရောက်အောင်လုပ်နေတာ ” ဟု ၎င်းက ပြောသည် ။
ကော့ကရိတ်မြို့သိမ်းစစ်ဆင်ရေးကိုဦးဆောင်နေသည့် ကျားဖြူစစ်ကြောင်းက ပြောရေးဆိုခွင့်ရှိသူ ဗိုလ်ပွဲတော်က လည်း ပြည်သူများ မြို့ထဲပြန်ဝင်မနေကြသေးကြောင်းနှင့် ပြန်ဝင်နေလို့ အဆင်မပြေသေးဘူး ဟု ဆိုသည်။
” ဘယ်လိုပြောမလဲ။ လက်ရှိကတော့ ပြန်မဝင်တာဘဲ ကောင်းတယ်ပေါ့နော် ။ ပြန်လာနေမယ်ဆိုရင်တော့ သူတို့ အတွက် အန္တရာယ်များတယ် ။ အခုလက်နက်ကြီးက နေ့တိုင်းပဲပစ်တယ်။ နေ့ရော ညရောပစ်နေတာပေါ့နော် “ဟု ဗိုလ်ပွဲတော် က ပြောသည် ။
ကော့ကရိတ်မြို့အနီးနှင့် မြို့ပေါ်တချို့နေရာများ၌တပ်စွဲထားသည့် စစ်ကောင်စီတပ်များကို ပူးပေါင်း စစ်ကြောင်း များက ပြီးခဲ့သောဒီဇင်ဘာလ ၁ ရက်တွင် ထိုးစစ်ဆင်တိုက်ခိုက်ခဲ့သည်။
လက်ရှိစစ်ဆင်ရေး ၁ လကျော်ကာလအတွင်း စစ်ကောင်စီတပ်စခန်းတချို့ကို သိမ်းပိုက်ထားနိုင်ပြီး မြဝတီ – ကော့ ကရိတ်အာရှလမ်းမကြီးကိုလည်း ပူးပေါင်းတပ်များကထိန်းချုပ်ထားနိုင်ခဲ့သည်။
ထို့ပြင် ကော့ကရိတ်မြို့တွင်းရှိ စစ်ကောင်စီတပ်များကို ထောက်ပို့လမ်းကြောင်းများဖြတ်တောက်၍ ပိတ်ဆို့ဖိအား ပေးနေသည် ။
ထို့ကြောင့်လည်း မြို့တွင်ကျန်နေသေးသည့် စစ်ကောင်စီတပ်ဖွဲ့ဝင်များက ဒေသခံပြည်သူများ၏ နေအိမ်များ ဖောက်ထွင်းခြင်း၊ ပစ္စည်းများကို ခိုးယူခြင်းနှင့် မီးရှို့မှုများ ပြုလုပ်နေသည်ဟု ကာကွယ်ရေးရဲဘော်များနှင့် ဒေသခံ တချို့ကပြောသည်။
” မီးတုတ်တွေနဲ့ လိုက်ရှို့နေတဲ့ ပျူ ၄ ကောင်ကို စစ်ကြောင်းဘက်က မိထားတယ်။ စစ်တပ်ဘက်က လုပ်ခိုင်းတာ တဲ့။ စစ်ဆေးလိုက်တော့ပေါ်တယ် “ဟု KNLAနှင့်နီးစပ်သည် ဒေသခံအမျိုးသမီး ၁ ဦးကပြောသည် ။
မြို့သိမ်းတိုက်ပွဲများအတွင်း စစ်ကောင်စီဘက်က လေကြောင်းမှဗုံးကြဲပစ်ခတ်ခြင်း၊ လက်နက်ကြီးပစ်ခတ်ခြင်း စသည်တို့ဖြင့် အရပ်သားပစ်မှတ်များပါမချန် တိုက်ခိုက်နေသည့်အပြင် တစ်ဘက်၌လည်း သွေးခွဲမှု၊ ဝါဒဖြန့်မှု စသည့် နည်းလမ်းအမျိုးမျိုး အသုံးပြုနေသည်။
လာမည့် ဇန်နဝါရီ ၄ ရက်၊ လွတ်လပ်ရေးနေ့တွင်လည်း စစ်ရှောင်နေသည့် ကော့ကရိတ်ဒေသခံများ မနက် ၈ နာရီ တွင်စုဝေးပြီး မြို့ထဲပြန်လည်ဝင်ရောက်ကြဖို့ စည်းရုံးပြောဆိုထားသည့် သတင်းများဖြန့်ဝေနေကြသည် ။
