သံလွင်ခက်
ဒီဇင်ဘာ ၂၇ ၊ ၂၀၂၃ ။
စစ်ကိုင်းတိုင်းအထက်ပိုင်း၊ ကသာမြို့နယ်၊ မိုးတားလေးကျေးရွာကို စစ်ကောင်စီက တိုက်လေယာဥ်ဖြင့် ဗုံးကြဲတိုက်ခိုက်ခဲ့ရာ ကာကွယ်ရေးရဲဘော်များ ထိခိုက်သေဆုံးမှုရှိသည့်အပြင် ပြည်သူများလည်း ဒဏ်ရာရရှိခဲ့သည်ဟု ဒေသခံများထံက သိရသည် ။
ယမန်နေ့ ဒီဇင်ဘာ ၂၆ ရက်၊ နံနက် ၁၀ နာရီကျော်အချိန်တွင် မြစ်ကြီးနားလေတပ်မှတက်လာသည့် ဂျက်ဖိုက်တာ ၁ စီးက ပေါင် ၅၀၀ ဗုံး ၂ လုံးကြဲချတိုက်ခိုက်ခဲ့ခြင်းဖြစ်သည်ဟု မိုးတားတိုက်နယ် ပ.က.ဖ ဒုတာဝန်ခံ အိန်ဂျလာက ပြောသည်။
” မြို့လှတပ်ရင်းက ရဲဘော်တွေ မိုးတားလေးရွာဘက် ခဏဝင်နားကြတာ ။ ရဲဘော်တွေက တစ်နေရာဘက် စစ်ရေးလှုပ်ရှားသွားကြတာမှာ ခဏဝင်ပြီး နားနေတာပေါ့ “ဟု ၎င်းကပြောသည် ။
မိုးတာလေးကျေးရွာ၊ ရဲစခန်းအနီးရှိ လက်ပံရပ်ကွက် နှင့် အရှေ့ရပ်ကွက်အစပ်နေရာကို ဗုံးကြဲတိုက်ခိုက်ခဲ့ခြင်း ကြောင့် ကာကွယ်ရေးရဲဘော် ၁ ဦးကျဆုံးပြီး၊ ရဲဘော်၆ ဦးနှင့် ပြည်သူ ၆ ဦး(အမျိုးသား ၃ ဦး၊ အမျိုးသမီး ၃ ဦး) ဒဏ်ရာရရှိခဲ့သည်။
ထို့ပြင် ပျဥ်ထောင်အိမ် ၇ လုံး ၊ တိုက်အိမ် ၂ လုံး ၊ အုတ်နံရံကပ်အိမ် ၂ လုံး ၊ ရုံး ၁ ရုံး ၊ ကား ၁ စီးနှင့် ထရန်စဖော်မာ ၁ လုံး ပျက်စီးခဲ့သည်။
” ရဲစခန်းက အပျက်ကြီးလေ ။ သူတို့က ရဲစခန်းနား တပ်ဖြန့်ပြီးနေကြတာ ။ ဒလန်ပေါ့။ အတိအကျကြီး ပွိုင့်မှတ် ပေးတယ် လို့ ယူဆမိတယ် “ဟု အိန်ဂျလာက ပြောသည် ။
ယမန်နေ့တွင် လေကြောင်းကလာရောက်တိုက်ခိုက်သွားချိန်သည် တိုက်ပွဲဖြစ်ပွားခြင်းမရှိသည့်အပြင် မိုးတား ကျေးရွာဘက်၌ စစ်ကောင်စီတပ်ဖွဲ့ဝင်များ တပ်စွဲမနေတော့သည်မှာ၃ လ ကျော်နေပြီဖြစ်သည်ဟု ဒေသခံများထံကသိရသည်။
ပုံစာ – စစ်ကောင်စီလေကြောင်းတိုက်ခိုက်မှုကြောင့် မိုးတားလေးကျေးရွာရှိ နေအိမ်နှင့် အဆောက်အအုံများ ပျက်စီးမှု။
******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2807
YouTube – > https://youtu.be/LsSx5mAIttA?si=cQ389gohgAYNfmVR
Website – > https://thanlwinkhet.net/?p=6719
