မိခိုင်
ဒီဇင်ဘာ ၁၈ ၊ ၂၀၂၃။
ရခိုင်ပြည်နယ်ရှိ စစ်ဘေးရှောင်များအနေဖြင့် လက်ရှိတွင် ဆန်ထောက်ပံ့မှုပြတ်တောက်ခြင်းအပြင် စားနပ်ရိက္ခာစျေးနှုန်းမြင့်တက်လာသည်ကိုပါ တပြိုင်နက်တည်းကြုံတွေ့နေရပြီး စားနပ်ရိက္ခာပြတ်လပ်နေကြောင်း သိရသည်။
ပုဏ္ဏားကျွန်းမြို့နယ်၊ ယိုးတရုပ်ကျေးရွာအနီးရှိ ရထားဘူတာ၊ မြက်လှဲ၊ ဂဏန်းတောင်စစ်ရှောင်စခန်း၊ ကျောက်တော်မြို့နယ်ရှိ တိမ်ညို၊ တောင်မြင့်၊ တင်းထိန်ကန်၊ ရွာသစ်ကေ၊ ပီပင်ရင်းစစ်ရှောင်စခန်းများအပြင် ရသေ့တောင်ရှိ စစ်ရှောင်စခန်းများတွင် ရိက္ခာပြတ်လပ်နေခြင်းဖြစ်သည်။
တိမ်ညိုစစ်ဘေးရှောင်စခန်းက စစ်ရှောင် ၁ ဦးက ” စားနပ်ရိက္ခာက လုံးဝကို ပြတ်နေပြီ။ အထောက်အပံ့လည်း လုံးဝမရှိတော့ ပိုခက်ခဲလာတယ် ” ဟု ၎င်းက ဆိုသည်။
တိုက်ပွဲဖြစ်ပွားသည့် နိုဝင်ဘာလကစ၍ စစ်ကောင်စီက ကုန်းလမ်း၊ ရေလမ်းများအား ပိတ်ဆို့ထားသည့်အတွက် ဒေသခံများ အခက်အခဲများနှင့် ရင်ဆိုင်နေရခြင်းဖြစ်သည်။
စစ်ဘေးရှောင်များအား စစ်ဘေးရှောင်များအား WFP က လူ ၁ ဦးလျှင် ၁ လ ငွေကျပ် ၃၀,၀၀၀ ထောက်ပံ့ပေးနေသော်လည်း ပြီးခဲ့သည့် အောက်တိုဘာလပိုင်းကစ၍ WFP ထောက်ပံ့မှုများ ရပ်ဆိုင်းထားသောကြောင့် ရထားဘူတာစစ်ရှောင်စခန်းတွင်လည်း ပိုမိုခက်ခဲလာကြောင်း သိရသည်။
စခန်းကတာဝန်ရှိသူ ၁ ဦးက ” အခုက စားနပ်ရိက္ခာက ၃ ဆလောက် စျေးတက်သွားတယ်။ လက်လုပ် လက်စားတွေဖြစ်ပြီး အလုပ်လည်းရှာမရတော့ ပိုပြီး ခက်ခဲလာတယ်။ အဖွဲ့အစည်း ၁ ခုကမှလည်း ထောက်ပံ့မှု မရှိဘူး ” ဟု ပြောသည်။
ရခိုင်တွင် အခြေခံစားနပ်ရိက္ခာနှင့်ပတ်သက်ပြီး ယခင်က ဆန်ကြမ်း ၁ အိတ်လျှင် ကျပ် ၆၀,၀၀၀ ရှိခဲ့သော်လည်း လက်ရှိတွင် ၁၂၀,၀၀၀ ၊ ဟင်းချိုမှုန့် ၁ ပိဿာလျှင် ယခင် ၈,၀၀၀ ကျပ်ကနေ ယခု ၃၀,၀၀၀ ကျပ်၊ ငရုပ်သီး ခြောက် ၁ ပိဿာလျှင် ယခင် ၉,၀၀၀ ကျပ်ကနေ လက်ရှိ ၆၀၀၀၀ ကျပ် နှင့် နှမ်းဆီ ၁ လီတာကို ယခင် ၇,၀၀၀ကျပ်ကနေ လက်ရှိ ၂၅,၀၀၀ထိ စျေးနှုန်းမြင့်တက်နေခြင်းဖြစ်သည်။
ထောက်ပံ့မှုများရှိခဲ့သည့်အချိန်တွင်ပင် စားဝတ်နေရေးအခက်အခဲများရှိနေရာ လက်ရှိတွင် ကုန်စျေးနှုန်းများ မြင့်တက်နေပြီး ထောက်ပံ့မှုပါမရသည့်အတွက် ပိုမိုကြပ်တည်းလာကြောင်း စစ်ရှောင်အမျိုးသမီး ၁ ဦးက ဆိုသည်။
” အရင်ကတည်းက အလုပ်အကိုင်က မရှိတော့လို့ ကြပ်တည်းမှုနဲ့ နေနေကြရတာ။ အခုက ထောက်ပံ့မှုကလည်း မရှိဘူး။ စားနပ်ရိက္ခာကလည်း ရှားတယ်။ ပိုက်ဆံလည်း ပြတ်တယ်။ ကုန်စျေးနှုန်းကလည်း တက်နေတော့ ပိုဆိုး တာပေါ့ ” ဟု ၎င်းက ပြောသည်။
ထို့ပြင် ကူညီကယ်ဆယ်ရေးလုပ်ငန်းများဆောင်ရွက်ပေးနေသည့် အဖွဲ့အစည်းများလည်း လုံးဝပြတ်တောက်သွားကြောင်း စစ်ဘေးရှောင်များကဆိုသည်။
ဘူးသီးတောင်မြို့နယ် တောင်မင်းစစ်ရှောင်စခန်းက စစ်ရှောင် ၁ ဦးက ” အနွေးထည်တွေ စောင်တွေလည်း လိုအပ်နေပါတယ်။ အရင်ကဆို အရပ်ဘက်အဖွဲ့အစည်းတွေက လာပေးတာရှိတယ်။ အခုက သူတို့လည်း အခက်အခဲ ရှိမယ်ထင်တယ်။ ၁ ဖွဲ့မှ မရောက်လာတော့ဘူး ” ဟု ပြောသည်။
ရခိုင်ပြည်နယ်တွင် စစ်ဘေးရှောင်ဟောင်း ၆၀,၀၀၀ ကျော်ရှိနေရာက လက်ရှိတွင် စစ်ဘေးရှောင် ၁၀၀,၀၀၀ ကျော်ထိ ထပ်တိုးလာသည်ဟု သိရသည်။
ပုံစာ – ရခိုင်ပြည်နယ်ရှိ စစ်ရှောင်များ။
ဓာတ်ပုံ – သံလွင်ခက်။
******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2747
Website – > https://thanlwinkhet.net/?p=6638
