စစ်တပ်ကပစ်ခတ်သည့် လက်နက်ကြီးကြောင့် ၁၁ နှစ်အရွယ် ကလေးငယ် ၁ ဦးသေဆုံး၍ ၉ဦး ဒဏ်ရာရ

စစ်တပ်ကပစ်ခတ်သည့် လက်နက်ကြီးကြောင့် ၁၁ နှစ်အရွယ် ကလေးငယ် ၁ ဦးသေဆုံး၍ ၉ဦး ဒဏ်ရာရ

*************************

မိခိုင်

ဒီဇင်ဘာ ၁၁၊ ၂၀၂၃။

ရခိုင်ပြည်နယ် မင်းပြားမြို့နယ်တွင် ယမန်နေ့ ဒီဇင်ဘာလ ၁၀ ရက် ညနေ ၄နာရီဝန်းကျင်တွင် စစ်တပ်က ပစ်ခတ် လိုက်သည့် လက်နက်ကြီးကျည်ကျ၍ ၁၁ နှစ်အရွယ် ကလေးငယ် ၁ ဦးသေဆုံးပြီး ၉ ဦး ဒဏ်ရာရရှိခဲ့ကြောင်း သိရသည်။

သေဆုံးသွားသူမှာ ဥက္ကာပျံရပ်ကွက်နေ မစံပယ်မိုး – ၁၁ နှစ် ဖြစ်ပြီး ဒဏ်ရာရသူများမှာ မောင်ခံထွန်း –  ၉နှစ် ၊ မနေဇာဝင်း – ၂၁နှစ်၊ မောင်ဇော်မိုးနိုင် – ၁၃ နှစ်၊ မမိုးမိုးစံ – ၁၄ နှစ်၊ မောင်ထွန်းနိုင်လင်း – ၁၂နှစ် ၊ မောင်ညီလင်းထွန်း – ၁၄ နှစ်၊ မောင်ခိုင်မျိုးကျော် – ၁၂ နှစ်၊ မောင်ခိုင်လင်းနိုင် – ၅နှစ် နှင့် ဒေါ်နီနီဝင်း – ၃၅ နှစ်တို့ဖြစ်ကြ

သည်။

ကလေးငယ်အများစု လမ်းပေါ်ကစားနေချိန်၌ လက်နက်ကြီးကျလာခြင်းဖြစ်ကြောင်း ဆိုသည်။

” ညနေ ၄ နာရီလောက်ရှိမယ်။ သူတို့က လမ်းမှာဆော့နေတဲ့အချိန် လက်နက်ကြီး လာကျတာ။ ကလေးမ ၁ ယောက်က သေသွားတယ်” ဟု မင်းပြားမြို့၊ ရပ်ကွက်အုပ်ချုပ်ရေးမှူး ၁ ဦးကပြောသည်။

မင်းပြားကျိန်းတောင်ထက်၌ အခြေစိုက်ထားသော စစ် ကောင်စီတပ်က  ယခုကဲ့သို့ လက်နက်ကြီးဖြင့် ရမ်းသမ်းပစ်ခတ်သည့်အတွက် မြို့နေရာအများအပြားတွင် လက်နက်ကြီး ထိမှန်ခဲ့ကြောင်းသိရသည်။

ယမန်နေ့တွင် မင်းပြားမြို့၊ စစ်တွေမြို့၊ ပုဏ္ဏားကျွန်းမြို့အနီးရှိကျေးရွာများသို့ စစ်ကောင်စီတပ်က လက်နက်ကြီး

များဖြင့် အဆက်မပြတ်ပစ်ခတ်တိုက်ခိုက်ခဲ့မှုကြောင့် မင်းပြားမြို့၊ ဥက္ကာပျံရပ်ကွက်နေ ၁၃ နှစ်အရွယ် ကလေးငယ် ၁ ဦး လက်နက်ကြီးကျည်စထိမှန်၍ သေဆုံးခဲ့ပြီး ဒေသခံ ၈ ဦး ထိခိုက်ဒဏ်ရာရခဲ့သည်ဟု ရက္ခိုင့်တပ် တော်က ထုတ်ပြန်ထားသည်။

စစ်တွေမြို့၊ ဝါဘိုကျေးရွာကိုလည်း စစ်ကောင်စီက

ဒရုန်းဖြင့် ဗုံးကြဲခဲ့သဖြင့် ၁၂ နှစ်အရွယ် ကလေးငယ် ၁ ဦး ထိခိုက်ဒဏ်ရာရရှိခဲ့ပြီး နေအိမ် ၁ လုံး ထိမှန်ပျက်စီးခဲ့သည်ဟု သိရသည်။

ထို့အပြင် ပုဏ္ဏားကျွန်းမြို့နယ်၊ ပဒေသာရွာသစ်ကိုလည်း စစ်ကောင်စီကပစ်ခတ်လိုက်သော လက်နက်ကြီး ၂ လုံး ကျရောက်ပေါက်ကွဲခဲ့ရာ ကျေးရွာအတွင်းရှိ နေအိမ်များ ပျက်စီးခဲ့ရပြီး ‌ဒေသခံတချို့လည်း ထိခိုက်ဒဏ်ရာရရှိခဲ့ကြောင်း ရက္ခိုင့်တပ်တော်၏ထုတ်ပြန်ချက်တွင်  ဖော်ပြထားသည်။

ပေါက်တောမြို့အတွင်း ကျန်ရှိနေသေးသော ရန်သူ့အကြွင်းအကျန်များကို ရက္ခိုင့်တပ်တော်က ဆက်လက်ရှင်းလင်းနေပြီး စစ်ကောင်စီကလည်း ပေါက်တောမြို့နှင့် အနီးဝန်းကျင်ရှိကျေးရွာများကို Navy ဖြင့် ရမ်းကားပစ်ခတ်တိုက်ခိုက်ခဲ့သည်ဟု ဆိုထားသည်။

” ပေါက်တောမြို့ရှိ အရပ်သားပြည်သူများအား ဓားစာခံနှင့် လူသားဒိုင်းကာအဖြစ် ဖမ်ဆီးကာသတ်ဖြတ်ခဲ့သော ရန်သူ့တပ်ဖွဲ့ဝင်အချို့အား ထပ်မံရှင်းလင်းနိုင်ခဲ့သည်” ဟု ထုတ်ပြန်ချက်က ဆိုသည်။

တိုက်ပွဲဖြစ်ပွားခြင်းမရှိသည့်နေ့ရက်များတွင်လည်း စစ် ကောင်စီက လက်နက်ကြီးများဖြင့် မြို့ပြနှင့် ကျေးရွာဒေသများကို ပစ်ခတ်နေသည့်အတွက် ဒေသခံများအနေဖြင့် ဘေးလွတ်ရာတိမ်းရှောင်နေကြရသည်။

ဓာတ်ပုံ – Twitter

******

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2704

Website – > https://thanlwinkhet.net/?p=6577