ကော့ကရိတ်မြို့တွင်းကို ဆက်လက်ထိုးစစ်ဆင်၊ စစ်တပ်နေရာကျဥ်းလာ
**************************
သံလွင်ခက်
ဒီဇင်ဘာ ၄ ၊ ၂၀၂၃ ။
ကော့ကရိတ်မြို့တွင်းကို ပူးပေါင်းစစ်ကြောင်းများက ယနေ့တွင်လည်း ဆက်လက်ထိုးစစ်ဆင်တိုက်ခိုက်ခဲ့ရာ စစ်ကောင်စီတပ်စွဲထားသည့်နေရာတချို့ကို သိမ်းပိုက်ရှင်းလင်းနိုင်ခဲ့ပြီး လက်နက်ခဲယမ်းတချို့ သိမ်းဆည်းရမိခဲ့သည်ဟု ကျားဖြူစစ်ကြောင်းထံက သိရသည်။
ကရင်ပြည်နယ်၊ ကော့ကရိတ်မြို့တွင်းမြို့ပြင်ရှိ စစ်ကောင်စီတပ်များကို KNLA နှင့် PDF ပူးပေါင်းစစ်ကြောင်းများက ဒီဇင်ဘာလ ၁ ရက်ကစတင်၍ ထိုးစစ်ဆင်တိုက်ခိုက်နေခြင်းဖြစ်သည်။
” ဒီမနက်က ထပ်ဖြစ်တယ်နော်။ သူတို့တပ်စွဲထားတဲ့နေရာတစ်ခုကို ကျွန်တော်တို့ ထပ်သိမ်းတယ် ။
ဒီနေ့တော့ ပွဲနည်းနည်းကြမ်းတယ်။ ပြင်းထန်တယ်ပေါ့။ မြို့ပြင်နားမှာပဲ “ဟု ကျားဖြူစစ်ကြောင်းတာဝန်ရှိသူ ဗိုလ်ပွဲတော်က ပြောသည် ။
လက်ရှိစစ်ဆင်ရေးအတွင်းကော့ကရိတ်မြို့အပြင်ဘက်ရှိ စစ်ကောင်စီတပ်စွဲထားသည့် နေရာများကို ပူးပေါင်းတပ်များက သိမ်းပိုက်ထားနိုင်ပြီး မြို့တွင်းရှိ ကျန်နေရာများအား ဝိုင်း၍ ပိတ်ဆို့ထားသည်။
” လက်ရှိ သူတို့ ပိတ်ဆို့ခံလည်း ထိတယ်။ အပြင်လည်း မထွက်ရဲဘူး။ သူတို့တပ်တွင်းမှာပဲ ။ နေရာပတ်ပတ်လည်မှာ ချတယ်နော်။ တဖြည်းဖြည်းတော့ ရမှာပါ “ဟု ၎င်းကဆက်လက်ပြောကြားသည် ။
လက်ရှိတွင် ကော့ကရိတ်မြို့တွင်း ခလရ ၉၇ တပ်အပါအဝင် စစ်ကောင်စီတပ်စွဲထားသည့်နေရာ ၅ နေရာ ခန့်ရှိ နေသည်။
ယနေ့တွင် ကော့ကရိတ်မြို့တွင်းနှင့် မြို့ပြင်နေရာတချို့၌ ထိတွေ့တိုက်ပွဲဖြစ်ပွားခဲ့ပြီး မြို့ကို ကာကင်းယူထားသည့်နေရာအထိ ပူးပေါင်းစစ်ကြောင်းက တက်ရှင်းနိုင်ခဲ့သည်။
” ဒီနေ့ကတော့ အမှတ် ၇ ရပ်ကွက်ထိပ် သူတို့ မြို့ကိုကာကင်းယူထားတဲ့နေရာထိ တက်ရှင်းပြီးပြီနော် “ဟု ကျားဖြူစစ်ကြောင်းက ဗိုလ်ပွဲတော်ကပြောသည်။
ကော့ကရိတ်မြို့ ထိုးစစ်အတွင်း စစ်ကောင်စီက လေကြောင်းက ပစ်ခတ်မှု၊ ဗုံးကြဲမှုများကို နေ့ရော၊ ညပါ လာရောက်ပြုလုပ်နေသည့်အပြင် လက်နက်ကြီးများမှာလည်း မရေတွက်နိုင်အောင် ဆက်တိုက်ပစ်ခတ်နေသည်ဟု ပိတ်မိနေသူများကို ကူညီကယ်ထုတ်ပေးနေသည့် ဒေသခံ အမျိုးသမီးတစ်ဦးကပြောသည်။
” ကယ်ထုတ်ပေးနေရတဲ့သူတွေမှာလည်း အသက်အန္တရာယ်စိုးရိမ်ရတယ်။ ဘယ်ကမှန်းမသိ ကျရောက်လာတဲ့ လက်နက်ကြီးရဲ့ ရန်ကိုလည်း ကြည့်ပြီးတော့ ရှောင်ရှားရတယ် ” ဟု ၎င်းကပြောသည်။
တိုက်ပွဲတွင်းပိတ်မိနေသူအများစုမှာ သက်ကြီးရွယ်အိုများအပါအဝင် သွားလာစရာ ကား၊ ဆိုင်ကယ်များမရှိသည့် လက်လုပ်၊ လက်စားသမားများက ပိုများသည်ဟု ကူညီပေးနေသူများကပြောသည်။
သို့သော်လည်း ပိတ်မိနေသူများကို ကူညီပေးသူများက နည်းလမ်းမျိုးစုံဖြင့် နေ့စဥ် ကူညီကယ်ထုတ်ပေးနေရာ မြို့တွင်း၌ ပိတ်မိနေသူအနည်းငယ်သာကျန်ရှိတော့သည်ဟု သိရသည်။
ကော့ကရိတ်တိုက်ပွဲကြောင့် ထွက်ပြေးရှောင်တိမ်းနေရသည့် ဒေသခံ၁၀,၀၀၀ ကျော်ထိရှိနေပြီး ပြည်သူ ၆ ဦး ထက်မနည်း ထိခိုက်သေဆုံးခဲ့သလို ၁၀ ဦးကျော် ထိခိုက်ဒဏ်ရာရရှိထားသည်ဟု ပူးပေါင်းစစ်ကြောင်းများနှင့် ကူညီပေးနေသူများထံက သိရသည်။
*******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2634
YouTube- > https://youtu.be/SpxIBpTYop8
Website – https://thanlwinkhet.net/?p=6502
