စပါးရိတ်သွားသည့် ဒေသခံ ၁ ဦး လက်နက်ကြီးထိမှန်သေဆုံး

စပါးရိတ်သွားသည့် ဒေသခံ ၁ ဦး လက်နက်ကြီးထိမှန်သေဆုံး
******************************

သံလွင်ခက်
နိုဝင်ဘာ ၃၊ ၂၀၂၃။

စပါးရိတ်သွားသည့် ပဲခူးတိုင်းအရှေ့ခြမ်း၊ ဖြူးမြို့နယ်၊ ပျဉ်းမပင်ကျေးရွာက ဒေသခံအမျိုးသား ၁ ဦး သည် စစ်ကောင်စီကပစ်ခတ်လိုက်သည့် လက်နက် ကြီးထိမှန်မှုကြောင့် သေဆုံးခဲ့သည်ဟု ဒေသခံများထံက သိရသည်။

ယနေ့ နံနက် ၆ နာရီခွဲအချိန်တွင် ကျောက်တံခါးမြို့နယ်၊ ပဲနွယ်ကုန်းမြို့အနီးရှိ စစ်ကောင်စီ ခမရ – ၃၀၇ တပ်ရင်း က ပစ်ခတ်လိုက်သည့် လက်နက်ကြီးသည် ကင်မွန်းခြုံကျေးရွာမြောက်ဘက်၊ ပျဉ်းမပင်ကျေးရွာသွားလမ်းတွင် ကျ ရောက်ပေါက်ကွဲခဲ့သည်။

အဆိုပါလက်နက်ကြီးသည် စပါးရိတ်သွားသည့် ပျဉ်းမပင်ကျေးရွာက အသက် ၄၅ နှစ်အရွယ် အတီးသဝါး၏အနီး ကျရောက်ပေါက်ကွဲခဲ့သည့်အတွက် လက်နက်ကြီးစထိမှန် သေဆုံးခဲ့ရခြင်းဖြစ်သည်ဟု ဒေသခံ ၁ ဦးကပြောသည်။

၎င်းက ” ဒီနေ့မနက်မှာ သူရွာကနေ လက်တက်ကြီးကို စပါးရိတ်ဖို့ ဆိုင်ကယ်နဲ့သွားတာ။ အဲ့သွားတဲ့လမ်းမှာပဲ လက်နက်ကြီးထိသွားတာ ” ဟုဆိုသည်။

အဆိုပါဒေသများသည် ကရင်အမျိုးသားအစည်းအရုံး – KNU၊ တပ်မဟာ ၃ နယ်မြေအတွင်းက ဒေသများဖြစ်ပြီး ယင်းဒေသများတွင် စစ်ကောင်စီတပ်နှင့် ပူးပေါင်းတပ်များကြား မကြာခဏ ထိတွေ့တိုက်ပွဲဖြစ်ပွားလျက်ရှိသည်။

ထို့ပြင် ပဲခူးတိုင်းအရှေ့ခြမ်း၊ ညောင်လေးပင်မြို့နယ်၊ ကျောက်တံခါးမြို့နယ်၊ ဖြူးမြို့နယ်၊ ကျောက်ကြီးမြို့နယ်နှင့် စစ်တောင်းမြစ်ကမ်းဘေးတလျှောက်ရှိ စစ်ကောင်စီတပ်များက အနီးအနားရှိကျေးရွာများကို လက်နက်ကြီးများ ဖြင့် နေ့စဉ်ပစ်ခတ်မှုများလုပ်ဆောင်လျက်ရှိသည်ဟု ဒေသခံများထံက သိရသည်။

ပြီးခဲ့သည့် နိုဝင်ဘာ ၁ ရက်၊ နေ့လယ် ၁၂ နာရီ ဝန်းကျင်တွင် ကျောက်ကြီးမြို့နယ်၊ နတ်သံကွင်းတံတားရှိ စစ်ကောင်စီတပ်ဖွဲ့ဝင်များက အနီးအနားကျေးရွာများကို လက်နက်ကြီးများဖြင့်ပစ်ခတ်ခဲ့ရာ သပြေကုန်း ကျေးရွာ အတွင်း ကျရောက်ပေါက်ကွဲခဲ့ပြီး အသက် ၇၆ နှစ်အရွယ် စောပဲပဲ ကို လက်နက်ကြီးစ ထိမှန်ခဲ့သဖြင့် ထိခိုက်ဒဏ် ရာရရှိခဲ့သည်ဟု KNU က နိုဝင်ဘာ ၁ ရက်တွင် သတင်းထုတ်ပြန်ထားသည်။

ထို့ပြင် အောက်တိုဘာ ၃၁ ရက်၊ နေ့လယ် ၁ နာရီဝန်းကျင်တွင်လည်း ဖြူးမြို့နယ်၊ ကညွတ်ကွင်းမြို့အခြေစိုက် ခမရ – ၄၃၉ တပ်ရင်းက စစ်ကောင်စီတပ်ဖွဲ့ဝင်များသည် အနီးအနားရှိကျေးရွာများကို ၁၅၅ ဟောင်ဝစ်ဇာ လက် နက်ကြီး ၄ လုံးဖြင့်ပစ်ခတ်ခဲ့ရာ ပျဉ်းမပင်ကျေးရွာအတွင်း ၁ လုံး၊ ရေလဲ (အရှေ့ဘက်ကမ်း)တွင် ၂ လုံး ကျရောက် ပေါက်ကွဲခဲ့သည်။

ထိုသို့ လက်နက်ကြီးကျရောက်ပေါက်ကွဲခဲ့သောကြောင့် ပျဉ်းမပင်ကျေးရွာရှိ ညားဆာဖော ၏နေအိမ်ပျက်စီးခဲ့ပြီး နေအိမ်ထဲရှိ အသက် ၁၇ နှစ်အရွယ် နော်ဒါးဖော ကို ကျည်စထိမှန်သဖြင့် ညာဘက်ဒူးပြတ်၍ သေဆုံးခဲ့သည်ဟု KNU က ထုတ်ပြန်ထားသည်။

ရေလဲ (အရှေ့ဘက်ကမ်း) တွင်လည်း လက်နက်ကြီးကျရောက်ပေါက်ကွဲခဲ့သည့်အတွက် နေအိမ် ၁ လုံး ပျက်စီးခဲ့၍ အသက် ၂၀ အရွယ် နော်အယ်စေး ၏ ဘယ်ဘက်ပေါင်နှင့် ခြေသလုံး ဒဏ်ရာရခဲ့သလို အသက် ၉ နှစ်အရွယ် နော်စေးလာဝါး ၏ ညာဘက်လက်ညှိုး ကျည်စထိမှန်ပြီး ပြင်းထန်ဒဏ်ရာရရှိခဲ့သည်။

ထို့နောက် စစ်ကောင်စီတပ်သည် နေ့လယ် ၂ နာရီခန့်တွင် ရေလဲ (အရှေ့ဘက်ကမ်း) ရွာနှင့် ရေလဲ (အနောက် ဘက်ကမ်း)ရွာများကို MI – 35 တိုက်ခိုက်ရေးရဟတ်ယာဉ်ဖြင့် ၃ ကြိမ် ပစ်ခတ်ခဲ့သည့်အပြင် ညနေ ၄ နာရီခွဲခန့် တွင်လည်း စစ်တောင်းမြစ်ကမ်းတစ်လျှောက်ရှိ ကျေးရွာ ၇ ရွာကို လေကြောင်းဖြင့်ပစ်ခတ်မှုများ ထပ်မံလုပ် ဆောင်ခဲ့သည်ဟု KNU က ဆိုသည်။

ထိုကဲ့သို့ လေကြောင်း၊ လက်နက်ကြီးများဖြင့် ပစ်ခတ်မှုများကြောင့် ရေလဲ ( အနောက်ဘက်ကမ်း ) ၊ သောင်ကြီး၊ ကျီးပင်ပေါက်၊ ရေလဲ ၊ ဝက်တူး၊ သင်္ကန်းပင်နှင့် ပျဉ်းမပင်ကျေးရွာများက လူဦးရေ ၅၂၃၈ ဦး စစ်ဘေးတိမ်းရှောင် နေရသည်ဟု ကရင်အရေးပေါ် ကူညီကယ်ဆယ်ရေးကော်မတီကကောက်ယူထားသည့် စာရင်းများအရသိရသည်။

ပုံစာ – လက်နက်ကြီးထိမှန်မှုကြောင့် သေဆုံးခဲ့သည့် ပျဉ်းမပင်ကျေးရွာက ဒေသခံအမျိုးသား။