ရွှေလီကြိုးတံတားရှိ စစ်ကောင်စီစခန်းကို တအာင်းတပ်မတော်သိမ်းပိုက်

ရွှေလီကြိုးတံတားရှိ စစ်ကောင်စီစခန်းကို တအာင်းတပ်မတော်သိမ်းပိုက်

*****************************

သံလွင်ခက်

နိုဝင်ဘာ ၃၊ ၂၀၂၃။

ရှမ်းပြည်နယ်မြောက်ပိုင်း၊  နမ့်ခမ်းမြို့နှင့် မန့်ဝိန်းကြီးကြားဆက်သွယ်ထားသည့် ရွှေလီကြိုးတံတားရှိ စစ်ကောင်စီ တပ်စခန်းကို တအာင်းတပ်မတော် – TNLA က  ယနေ့ နံနက်ပိုင်း ၆ နာရီ ၅၅ မိနစ်တွင် တိုက်ခိုက်သိမ်းပိုက်နိုင်ခဲ့ သည်ဟု PSLF/TNLA  က ထုတ်ပြန်သည်။

တိုက်ပွဲအတွင်း စစ်ကောင်စီတပ်ထံက လက်နက် ၄ လက်၊ 60 MM ဗုံးသီး ၃၀ လုံး၊ RPG အသီး ၈ လုံး၊ လက်ပစ်ဗုံး ၅၀ လုံး၊ ကျည်ဆံနှင့် စစ်အသုံးအဆောင်ပစ္စည်းများ သိမ်းဆည်းရမိခဲ့သည်ဟု ထုတ်ပြန်ချက်တွင် ဖော်ပြထားပြီး စခန်းသိမ်းပိုက်ချိန်တွင် စစ်ကောင်စီတပ်ဘက်က ဂျက်ဖိုက်တာဖြင့် ၃ ကြိမ် လာရောက်ပစ်ခတ်ခဲ့သည်ဟုလည်း ဖော်ပြထားသည်။

TNLA တပ်များသည် ရွှေလီကြိုးတံတားရှိစစ်ကောင်စီတပ်စခန်းအပြင် မန်တုံမြို့နယ်ရှိ စစ်ကောင်စီလက်အောက် ခံရဲစခန်း၊ ပြည်သူ့စစ်စခန်းကို ယနေ့ နံနက် ၅နာရီတွင်လည်းကောင်း၊ နောင်ချိုမြို့နယ်ရှိ ကွန်ခါတပ်စခန်းကို ယနေ့ နံနက် ၄ နာရီတွင်လည်းကောင်း  တအာင်းတပ်မတော် PSLF/TNLA က သိမ်းပိုက်နိုင်ခဲ့သည်ဟု သိရသည်။

ထို့ပြင် ယမန်နေ့ညပိုင်းနှင့် ယနေ့နံနက်အစောပိုင်းမှာတော့ တိုက်ပွဲဖြစ်ပွားခြင်းမရှိသည့်  နောင်ချိုမြို့နယ်၊ ဟိုခို ကျေးရွာနှင့် နမ့်ခမ်းမြို့နယ်ရှိ လွယ်အင်ကျေးရွာတို့ကို စစ်ကောင်စီက လေကြောင်း၊ လက်နက်ကြီးတို့ဖြင့် ပစ်ခတ် ခဲ့သည့်အတွက် နေအိမ်တချို့ပျက်စီးခဲ့ပြီး ကလေးငယ် ၁ ဦး ထိခိုက်ဒဏ်ရာရရှိခဲ့သည်ဟု PSLF/TNLA က ထုတ်ပြန်ထားသည်။

ဓာတ်ပုံ – PSLF/TNLA

**************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2283

YouTube- > https://youtu.be/SpxIBpTYop8

Website -> https://thanlwinkhet.net/?p=6039