အွန်လိုင်းငွေလိမ်ဂိုဏ်းက တရုတ်နိုင်ငံသား ၁၂၀၀ ကျော် ကို “ဝ“တပ်မတော် ဖမ်းဆီး
********
ယမင်းဖူးပွင့်အောင်
စက်တင်ဘာ ၉၊ ၂၀၂၃။
တရုတ်–မြန်မာ နယ်စပ် ‘ဝ‘ ကိုယ်ပိုင်အုပ်ချုပ်ခွင့်ရဒေသ၊ မိုင်းပေါက်မြို့နယ်ရှိ အွန်လိုင်းငွေလိမ်ဂိုဏ်းများတွင်အလုပ်လုပ်ကိုင်နေသည့် တရုတ်နိုင်ငံသား ၁၂၀၀ ကျော် ကို “ဝ“တပ်မတော် က ဖမ်းဆီးထိန်းသိမ်းလိုက်သည်။
အဆိုပါ အွန်လိုင်းငွေလိမ်ဂိုဏ်းများတွင် အလုပ်လုပ်ကိုင်နေသည့် တရုတ်နိုင်ငံသားများအား ‘ဝ‘ ပြည်သွေးစည်းညီညွတ်ရေးတပ်မတော် (UWSA) က ပြီးခဲ့သည့် စက်တင်ဘာလ ၅ ရက်နှင့် ၆ ရက်တွင် စတင်ဖမ်းဆီးခဲ့ပြီးနယ်စပ်ကတစ်ဆင့် တရုတ်ရဲတပ်ဖွဲ့ထံ လွှဲပြောင်းဆောင်ရွက်ပေးခဲ့သည်ဟု လားရှိုးအခြေစိုက် ‘ဝ‘ တပ်ဖွဲ့ ဆက်ဆံရေးရုံးတာဝန်ခံ ဦးညီရမ်းက သံလွင်ခက် ကိုပြောသည်။
“၁၂၀၀ ကျော် ဖမ်းပြီးလွှဲပေးတာ မှန်ပါတယ်။ အသုတ်လိုက်ခွဲပြီး လွှဲပြောင်းပေးတာပါ။ အမျိုးသမီးတွေလည်း ပါတယ်။ အရေအတွက်နည်းတယ်” ဟု ပြောသည်။
ဖမ်းဆီးခံရသည့် တရုတ်နိုင်ငံသားများသည် ‘ဝ’ ပြည်တွင်းသို့ ခိုးဝင်သူများ ဖြစ်နိုင်သည်ဟု လုံခြုံရေးအရ အမည်မဖော်လိုသည့် ဒေသခံ ၁ ဦး က ပြောသည်။
“များသောအားဖြင့် ခိုးဝင်တွေကို ဖမ်းတာများတယ်။ ‘ဝ’ပြည်ဆိုတာက သူတို့ပြည်ထဲဝင်ပြီဆိုတာနဲ့ စာရင်းသွင်းရတယ်။ ကျားဖြန့်လုပ်လို့ ဖမ်းတာတော့ မဖြစ်နိုင်ဘူး။ သူတို့ရဲ့ အဓိက စီးပွားရေးတွေထဲက တစ်ခုပဲကို။ တကယ်ထိထိရောက်ရောက်လုပ်နေတာဆိုရင်တော့ ကောင်းတာပေါ့” ဟု ပြောသည်။
ပြီးခဲ့သည့် စက်တင်ဘာလ ၃ ရက်ကလည်း မြန်မာနိုင်ငံ နယ်စပ်ဒေသအခြေစိုက် လုံခြုံရေးတပ်ဖွဲ့နှင့် တရုတ်နိုင်ငံယူနန်ပြည်နယ် ရဲတပ်ဖွဲ့တို့ပူးပေါင်း၍ မြန်မာနိုင်ငံမြောက်ပိုင်းရှိ အွန်လိုင်းရာဇဝတ်ဂိုဏ်း ၁၁ ခုကို ဝင်ရောက်ဖမ်းဆီးခဲ့သည်ဟု တရုတ်နိုင်ငံ ပြည်သူ့လုံခြုံရေးဝန်ကြီးဌာနက စက်တင်ဘာလ ၅ ရက်တွင် သတင်းထုတ်ပြန်ထားသည်။
တရုတ် – မြန်မာ နှစ်နိုင်ငံနယ်စပ်ဒေသတည်ငြိမ်အေးချမ်းရေး၊ လုံခြုံရေး၊ တရားဥပဒေစိုးမိုးရေး ဆိုင်ရာများတွင်ပူးပေါင်းဆောင်ရွက်မှုများ တိုးမြှင့်ဆောင်ရွက်နိုင်ရန် စစ်ကောင်စီခန့် ညှိနှိုင်းကွပ်ကဲရေးမှူး ဗိုလ်ချုပ်ကြီး မောင်မောင်အေးနှင့် တရုတ်ပြည်သူ့လွတ်မြောက်ရေးတပ်မတော်၊ တောင်ပိုင်းစစ်နယ်ဝန်းကွပ်ကဲမှုဌာနချုပ် ဒုတိယဌာနချုပ်မှူး Vice Admiral Liu Zizhu ဦးဆောင်သည့် ကိုယ်စားလှယ်အဖွဲ့တို့ ပြီးခဲ့သည့် စက်တင်ဘာလ ၄ ရက်ကနေပြည်တော်တွင် တွေ့ဆုံဆွေးနွေးခဲ့သည်။
ပုံစာ– ဖမ်းဆီးရမိသည့် တရုတ်နိုင်ငံသားများအား တရုတ်ရဲတပ်ဖွဲ့ထံ လွှဲပြောင်းပေးသည့်မှတ်တမ်းမြင်ကွင်း။
Photo- WSTV
**************************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1939
YouTube- > https://youtu.be/sCgktZzn2lw
Website -> https://thanlwinkhet.net/?p=5556
