စစ်ရေးထိုးစစ်အရှိန်မြှင့်ရန် KNDF စစ်ဗျူဟာအမှတ် ၆ ပြင်ဆင်

သံလွင်ခက်

သြဂုတ် ၂၄ ၊ ၂၀၂၃ ။

ကရင်နီအမျိုးသားများကာကွယ်ရေးတပ် KNDF စစ်ဗျူဟာအမှတ် ၆ လှုပ်ရှားနယ်မြေအတွင်း ယခုသြဂုတ်လအစပိုင်း နှစ်ပတ်တာတိုက်ပွဲများတွင် တပ်ရင်းမှူး၊ ဒုတပ်ရင်းမှူးများအပါအဝင် စစ်ကောင်စီတပ်ဖွဲ့ဝင် ၇၁ ဦးအထိသေဆုံးခဲ့သည်။

အင်အားအလုံးအရင်းဖြင့်ထိုးစစ်ဆင်လာသည့် စစ်ကောင်စီတပ်များကို ပိုမိုချေမှုန်းသွားနိုင်ရန် ခုခံစစ်မှ တန်ပြန်တိုက်စစ်ဆင်ရန်အတွက် ပြင်ဆင်နေသည်ဟု KNDF စစ်ဗျူဟာအမှတ် ၆ ဗျူဟာမှူး စစ်ရေးချုပ် ခူးရီးဒူ ကသံလွင်ခက် ကို ပြောသည် ။

စစ်ဗျူဟာအမှတ် ၆ နယ်မြေအတွင်းရှိ ဒီးမော့ဆို – ဖရူဆို ပြည်ထောင်စုလမ်းမကြီးတလျှောက်ကို ထိန်းချုပ်နိုင်ရန်ယခုသြဂုတ်လ ၂ ရက်ကစပြီး စစ်ကြောင်းထိုးဝင်လာခဲ့သည့် စစ်ကောင်စီ တပ်မ ၅၅ လက်အောက်ခံတပ်များနှင့်ကရင်နီပူးပေါင်းတပ်များ ပြင်းထန်တိုက်ပွဲများဆက်တိုက်ဖြစ်ပွားနေသည်။

ကရင်နီတပ်မတော်(KA)၊ ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး(ကလလတ)၊ အလယ်ပိုင်းတိုင်း–ကရင်နီ(ကယား)စစ်ဒေသခွဲတပ်ရင်းများပူးပေါင်းစစ်ကြောင်း၊ ဒီးမော့ဆိုပြည်သူ့ကာကွယ်ရေးတပ်(DMO Local PDF) ကရင်နီဝံပုလွေစစ်ကြောင်း နှင့် ကရင်နီအမျိုးသားများကာကွယ်ရေးတပ်(KNDF) တို့ပူးပေါင်းပြီး စစ်ကောင်စီတပ်များကို ခုခံတိုက်ခိုက်နေပါသည်။

ယခုလအစပိုင်းတွင်ဖြစ်ပွားခဲ့သော နှစ်ပတ်တာတိုက်ပွဲများအတွင်း တပ်မ ၅၅ လက်အောက်ခံတပ်များဖြစ်သည့်ခ.မ.ရ ၁၁၂ က တပ်ဖွဲ့ဝင် ၄၅ ဦးနီးပါးနှင့် ခ.လ.ရ ၃ က တပ်ရင်းမှူး နှင့် ဒုရင်းမှူးအပါအဝင် ၂၆ ဦးနီးပါး ထိခိုက်သေဆုံးခဲ့ပြီး လက်နက်ငယ်အစုံ ၁၅ လက်၊ လက်နက်ကြီး ၁ လက် အပါအဝင် ဆက်စပ် ခဲယမ်းမီးကျောက် များ၊ကျည်ဆံများနှင့် အသုံးအဆောင်ပစ္စည်းများ သိမ်းဆည်းရရှိခဲ့သည်ဟု ပူးပေါင်းတပ်အသီးသီးက သတင်း ထုတ်ပြန်ထားသည်။

အထိနာနေသည့်စစ်ကောင်စီတပ်က ပြီးခဲ့သည့်ရက်ပိုင်းတွင်လည်း လေကြောင်းကအကြိမ်ကြိမ် လာရောက်တိုက်ခိုက်ခဲ့ပြီး လက်နက်ကြီးပစ်ကူများဖြင့်အင်အားထပ်တိုးကာ ထိုးစစ်ဆင်နေဆဲဖြစ်သောကြောင့် ယခုရက်သတ္တပတ်အတွင်းတွင်လည်း တိုက်ပွဲများဆက်လက်ဖြစ်ပွားနေဆဲဖြစ်သည်။

တိုက်ပွဲများဆက်တိုက်ဖြစ်ပွားနေသောကြောင့် အဓိကလိုအပ်နေသည့်ခဲယမ်းအတွက် ပြည်သူများကဝိုင်းဝန်းထောက်ပံ့ပေးကြရန် KNDF စစ်ဗျူဟာအမှတ် ၆ ဗျူဟာမှူး စစ်ရေးချုပ် ခူးရီးဒူ က မေတ္တာရပ်ခံထားသည်။

“ကျွန်တော်တို့အတွက် အကြီးမားဆုံးလိုအပ်ချက်က ခဲယမ်းဖြစ်တယ်။ ကျွန်တော်တို့ကို တတ်နိုင်သလောက် ကူ ညီပေးဖို့ ပံ့ပိုးပေးဖို့ဖြစ်တယ်။ ခဲယမ်းရှိရင်တော့ သေနတ်ကတော့ ကျွန်တော်တို့ လွယ်လွယ်လေးနဲ့ရပါတယ်။သေနတ်က ဝယ်စရာမလိုပါဘူး။ ကျွန်တော်တို့စစ်ကောင်စီဆီက အမြဲယူလေ့ရှိပါတယ်။ ကျွန်တော်တို့ကို ခဲယမ်း ဖြည့်ပေးပါ။ ပံ့ပိုးပေးပါ ။ ဒီပံ့ပိုးပေးတဲ့အရာတွေ ထောက်ပံပေးတဲ့ဟာတွေက အလဟဿမဖြစ်ဘူးပေါ့လေ။ကျွန်တော်တို့တောက်လျှောက် ဒီတိုက်ပွဲအတွင်း အသုံးပြုသွားမှာဖြစ်တယ်”

KNDF စစ်ဗျူဟာအမှတ် ၆ သည် စစ်ရေးအရှိန်မြှင့်နိုင်ရန် လိုအပ်နေသောခဲယမ်းများအတွက် ကျပ်သိန်း ၁၀၀၀၀တန်ဖိုးရှိ  “ကရင်နီပြည်ရောက် မအလ‘တပ်မ’ပျောက်” ဆိုသည့် ကမ်ပိန်းတစ်ခုကိုပြုလုပ်နေပြီး ပြည်တွင်း၊ ပြည်ပကပြည်သူများ ပါဝင်ကူညီပေးရန် ဖိတ်ခေါ်ထားသည်။

အဆိုပါ ကမ်ပိန်းကို ယခုသြဂုတ်လ ၂၃ ရက်ကစပြီး တစ်လတိတိပြုလုပ်သွားမည်ဖြစ်ကာ ကရင်နီပြည်နယ်ကို ခြေချလာသည့် စစ်ကောင်စီတပ်မတိုင်း အိမ်ပြန်လမ်းမရှိစေရ၊ ဖွဲ့စည်းပုံပျက်စေရမည်ဟုလည်း KNDF က ကတိ ပေးဖော်ပြထားသည် ။

“လက်ရှိက သူတို့စစ်ကြောင်းထိုးလာတယ်။ ကျွန်တော်တို့က ခုခံစစ်သေချာခံပြီးတော့မှ တိုက်နေရတယ်။ ဒါပေ မယ့် ဒီကမ်ပိန်းပြည့်မြောက်အောင် ကူညီဆောင်ရွက်ပေးနိုင်မယ်ဆိုရင် ခုခံစစ်ကနေတဆင့်တက်ပြီး တန်ပြန်တိုက်စစ်ဆင်နွှဲလို့ရတယ် “ဟု လက်ရှိပြုလုပ်ထားသည့် ကမ်ပိန်းအောင်မြင်ရန်အရေးကြီးကြောင်း ဗျူဟာမှူး စစ်ရေးချုပ် ခူးရီးဒူ ကပြောသည် ။

ကရင်နီပြည် ဒီးမော့ဆို၊ ဖရူဆို၊ လွိုင်ကော်၊ ရှားတောစသည့်မြို့နယ်များနှင့်စပ်ဆက်နေသည့် စစ်ဗျူဟာ အမှတ် ၆နယ်မြေအတွင်း စစ်ကောင်စီတပ်က ယခုနှစ် မတ်လကနေ မေလအထိ ထိုးစစ်ဆင်ခဲ့သေးသည်။

စစ်ကောင်စီကအင်အားအလုံးအရင်းဖြင့် ပထမအကြိမ်ထိုးစစ်ဆင်လာမှုကို ကရင်နီပူးပေါင်းတပ်များကအကောင်း ဆုံးခုခံတိုက်ခိုက်ခဲ့ရာ စစ်ကောင်စီတပ်ဖွဲ့ဝင်ရာနှင့်ချီသေဆုံးခဲ့ပြီး တပ်ဖွဲ့စည်းမှုပျက်ပြားကာ တပ်များနောက်ပြန် ဆုတ်သွားခဲ့ရသည်။

ထိုသို့အထိနာခဲ့သော်လည်း စစ်ကောင်စီတပ်က ဒုတိယအကြိမ်ပြန်လည်ထိုးစစ်ဆင်လာနေခြင်းဖြစ်ပြီး ယခုအကြိမ် စစ်ဗျူဟာ အမှတ် ၆ နယ်မြေအတွင်းထိုးစစ်ဆင်နေမှုသည် ယခင်ကထက်အင်အားပိုများပြီး လက်နက်ကြီးပစ်ကူများ ပိုမိုများပြားလာသည်ဟု ဗျူဟာမှူး  စစ်ရေးချုပ် ခူးရီးဒူ က ပြောသည် ။

သို့သော်လည်း လက်ရှိခုခံစစ်အနေအထားတွင်ပင် ကရင်နီပူးပေါင်းတပ်များက စစ်ကောင်စီတပ်များ ထိခိုက်သေဆုံးမှုများပြားအောင် တိုက်ခိုက်ထားနိုင်ဆဲပင်ဖြစ်သည်။ ထို့ကြောင့် စစ်ကောင်စီတပ်များကို အပြီးသတ်ချေမှုန်းနိုင်ရန် ခုခံစစ်ကနေ တန်ပြန်တိုက်စစ်ဆင်ရန် အဓိကလိုအပ်သည့်ခဲယမ်းများအတွက် KNDF စစ်ဗျူဟာအမှတ် ၆ က အကူအညီတောင်းခံထားခြင်းလည်း ဖြစ်သည်။

ထိုသို့အကူအညီတောင်းခံထားမှုနှင့်အတူ ” တပ်မ ၅၅ လား၊ ၆၆ လား   ဘယ် တပ်မ ပဲလာလာ ပျောက်ကို ပျောက်ရမယ် ” ဟု KNDF စစ်ဗျူဟာအမှတ် ၆ က ပြည်သူများထံ ကတိပေးပြောဆိုလိုက်ပါသည်။

****************************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/1850

YouTube- > https://youtu.be/EQxNHj_FY94

Website -> https://thanlwinkhet.net/?p=5387

Website ->https://eng.thanlwinkhet.net