သံလွင်ခက်
ဇွန် ၇၊ ၂၀၂၃။
ကရင်နီပြည်ရဲ့ တိုက်ပွဲတွေ အများဆုံးဖြစ်နေတဲ့ ဒီးမော့ဆိုမြို့နယ်မှာ အခြေစိုက်တဲ့ KNDF B 01 တပ်ရင်းဟာ ပုံမှန်ထောက်ပံ့မှုတွေ မရလို့ ရဲဘော်တွေအတွက် ရိက္ခာပြတ်လပ်မှုတွေနဲ့ ကြုံနေကြရတယ်လို့ သိရပါတယ်။
ဒီးမော့ဆိုအရှေ့ခြမ်းကို စစ်ကောင်စီက ပြီးခဲ့တဲ့ ဖေဖော်ဝါရီလကတည်းက အင်အားအလုံးအရင်းနဲ့ ထိုးစစ်ဆင်နေလို့ တိုက်ပွဲတွေ ဆက်တိုက်ဖြစ်ပွားခဲ့ပြီး လက်ရှိအချိန်အထိလည်း နှစ်ဖက် စစ်ရေးတင်းမာနေဆဲပါ။
ဒီးမော့ဆိုမြို့နယ်အတွင်းမှာ စစ်ရေးလှုပ်ရှားမှုတွေ ဖော်ဆောင်နေတဲ့ KNDF B01 တပ်ရင်းကတော့ နှစ်နှစ်တာကာလအတွင်းမှာ ရဲဘော် ၁၀ ဦးထက်မနည်း ကျဆုံးထားခဲ့ရပါတယ်။
ကရင်နီအမျိုးသားများကာကွယ်ရေးတပ် KNDF တပ်ရင်း ၁ က ရဲဘော်တွေဟာ ဒီးမော့ဆိုအရှေ့ခြမ်းမှာ တိုက်ပွဲဝင်နေကြသလို ရှေ့တန်းရဲဘော်တွေကို အထောက်အပံ့ပေးနိုင်ဖို့နဲ့ တပ်ရင်းရဲ့ အခက်အခဲတွေကို ဖြေရှင်းနိုင်ဖို့ထောက်ပို့တပ်သားတွေကို KNDF တပ်ရင်း ၁ က ဖိတ်ခေါ်ထားပါတယ်။
ကရင်နီအမျိုးသားများကာကွယ်ရေးတပ် KNDF ကို ဖွဲ့စည်းထူထောင်ခဲ့တဲ့ နှစ်နှစ်ပြည့် အထိမ်းအမှတ်အနေနဲ့ရောနှစ်နှစ်တာအတွင်းမှာ အခက်အခဲများစွာ ကြုံတွေ့ခဲ့ရသလို ဆက်ပြီး အဲဒီအခက်အခဲတွေကို ဖြေရှင်းကူပေးနိုင်ဖို့ထောက်ပို့တပ်သားတွေကို ခေါ်ယူရတာဖြစ်တယ်လို့ ဆိုပါတယ်။
“ညီမတို့ တပ်ရင်းက ထောက်ပို့မန်ဘာ ခေါ်ထားတာ အယောက် ၂၀၀၀ မှန်းထားပေမယ့် အခုထိ ၁၀၀ လောက်ပဲ ရသေးတယ်” လို့ တပ်ရင်းထောက်ပို့ ဒုတာဝန်ခံ မိထော်က ပြောပါတယ်။
KNDF တပ်ရင်းက ဖိတ်ခေါ်ထားတဲ့ ထောက်ပို့တပ်သားတွေအနေနဲ့ ရာထူးအလိုက် လစဥ်ထောက်ပံ့မှုတွေ ကွာခြားသွားမှာဖြစ်ပြီး တပ်သားဆိုရင် လစဥ် ကျပ် ၂၀၀၀၀ ပါဝင်ပေးရမှာဖြစ်ပါတယ်။
ထောက်ပို့တပ်ကြပ်အတွက် ကျပ် ၃၀၀၀၀၊ တပ်ကြပ်ကြီးအတွက် ကျပ် ၄၀၀၀၀၀၊ ဗိုလ်လေးအတွက် ၅၀၀၀၀ မှ၉၉၀၀၀ ကျပ် ၊ ဗိုလ်ကြီးအတွက် ကျပ် ၁၀၀၀၀၀ မှ ၂၉၉၀၀၀ ကျပ်နဲ့ ထောက်ပို့ ဗိုလ်မှူးကြီးရာထူးအတွက် ကျပ်သုံးသိန်းနှင့်အထက် သတ်မှတ်ထားပါတယ်။
“အရေးပေါ်ကိစ္စတွေ ဖြစ်လာရင် ညီမတို့မှာ ဖြေရှင်းဖို့ အသင့် ဖြစ်မနေဘူး။ လက်နက်၊ ခဲယမ်းလိုတာဖြစ်ဖြစ်၊ဆေးဝါးလိုတာဖြစ်ဖြစ်၊ စားနပ်ရိက္ခာလိုတာဖြစ်ဖြစ် အခက်အခဲတွေနဲ့ ကြုံနေရတယ်။ တကယ်လို့ ညီမတို့ မျှော်မှန်းထားတဲ့ ရည်မှန်းချက်သာ ပြည့်မှီမယ်ဆိုရင် တပ်ရင်းအတွက် တစ်လတာ လိုအပ်နေတဲ့ စားနပ်ရိက္ခာတွေ၊ ဆေးဝါးတွေ၊ လက်နက်ခဲယမ်းတွေကို ဖြည့်ဆည်းနိုင်မှာ ဖြစ်ပါတယ်” လို့ တပ်ရင်းထောက်ပို့ ဒုတာဝန်ခံ မိထော်က ပြောပါတယ်။
KNDF တပ်ရင်း ၁ က ဖိတ်ခေါ်ထားတဲ့ ထောက်ပို့မန်ဘာအရေအတွက် ၂၀၀၀ ကို အနည်းဆုံးတပ်သားတွေအဖြစ်ပဲအပြည့် ပါဝင်ကြရင် တပ်ရင်းအတွက် တစ်လကို ကျပ်သိန်း ၄၀၀ ရရှိမှာဖြစ်ပါတယ်။ ဒီပမာဏဟာ တပ်ရင်းရဲ့ လစဥ်စားနပ်ရိက္ခာတွေနဲ့ ဆေးဝါးအခက်အခဲတွေကို ကူညီးဖြေရှင်းနိုင်မှာဖြစ်သလို လက်နက်၊ ခဲယမ်းအတွက်လည်းဖြည့်ဆည်းသွားနိုင်မယ်လို့ သိရပါတယ်။
ဒါပေမယ့်လည်း KNDF တပ်ရင်း ၁ ကတော့ လက်ရှိအချိန်မှာ လစဥ်ပုံမှန် ရန်ပုံငွေတွေ မရှိလို့ တစ်ခါတလေ ရိက္ခာပြတ်လပ်တာတွေနဲ့ ကြုံရတယ်လို့ တပ်ရင်းထောက်ပို့ ဒုတာဝန်ခံ မိထော်က ပြောပါတယ်။
“တချို့လတွေမှာ ညီမတို့ထင်ထားသလောက် Fund (ရန်ပုံငွေ) မဝင်ဘူး။ ရဲဘော်တွေအတွက် ဆန်ကိုတောင်မှရိက္ခာကို အကုန်လုံး မပေးနိုင်တဲ့ အနေအထားဖြစ်နေတယ်” လို့ သူက ဆိုပါတယ်။
ဒီလိုအခက်အခဲ လိုအပ်ချက်တွေ ရှိနေပေမယ့်လည်း KNDF တပ်ရင်း ၁ ရဲဘော်တွေဟာ ရှေ့တန်းစစ်မြေပြင်တွေမှာ တိုက်ပွဲဝင်နေရကြပါတယ်။
ပြီးခဲ့တဲ့ မေလ ၃၁ ရက်မှာ တပ်ဖွဲ့ထူထောင်တာ နှစ်နှစ်ပြည့်မြောက်သွားပြီဖြစ်တဲ့ KNDF တပ်ဖွဲ့ဟာ ရှမ်းတောင်ပိုင်းမြို့နယ်တချို့အပါအဝင် ကရင်နီပြည်မှာ တပ်ရင်းပေါင်း ၂၂ အထိ ဖွဲ့စည်းထားနိုင်ခဲ့ပြီ ဖြစ်ပါတယ်။
နှစ်နှစ်တာကာလအတွင်းမှာ တိုက်ပွဲပေါင်း ၁၀၀၀ ကျော် ဆင်နွှဲထားခဲ့ပြီး စစ်ကောင်စီတပ်ဖွဲ့ဝင် ၂၀၀၀ ကျော်ကိုရှင်လင်းနိုင်ခဲ့သလို KNDF ရဲဘော် ၁၅၃ ဦး ကျဆုံးခဲ့တယ်လို့ KNDF က ထုတ်ပြန်ထားပါတယ်။
အခက်အခဲမျိုးစုံကို နှစ်နှစ်တာကာလအတွင်းမှာ ရင်ဆိုင်ကျော်လွှားနေခဲ့တဲ့ KNDF တပ်ရင်းအသီးသီးဟာ တပ်ရင်း၁ လိုပဲ တပ်ဖွဲ့ ရေရှည် ရပ်တည်ရေးအတွက် နည်းမျိုးစုံနဲ့ ကြိုးပမ်းနေကြရပါတယ်။
ဒါပေမယ့်လည်း ဘယ်လိုပဲ အခက်အခဲတွေနဲ့ကြုံနေရပါစေ။ KNDF ကတော့ မကြာမီမှာ ကရင်နီအိပ်မက်ကိုအကောင်အထည် ဖော်သွားမယ်လို့ သူတို့ရဲ့ နှစ်နှစ်ပြည့်နေ့မှာ ကြုံးဝါးခဲ့ပါတယ်။
*********************************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1345
YouTube -> https://youtu.be/E95gr8vKREs
Website -> https://thanlwinkhet.net/?p=4987
Website ->https://eng.thanlwinkhet.net
