သံလွင်ခက်။
ဇွန် ၆ ၊ ၂၀၂၃။
စစ်ကိုင်းတိုင်း၊ ဆားလင်းကြီးမြို့နယ်ရှိ တရုတ်ပိုင် မြန်မာ၀မ်ပေါင်ကုမ္ပဏီအနီးနားကျေးရွာများမှ စစ်ရှောင်ပြည်သူ၄၀ ကျော်ကို စစ်ကောင်စီတပ်ဖွဲ့ဝင်များက လူသားဒိုင်းအဖြစ် ဖမ်းဆီးခေါ်ဆောင်သွားသည်ဟု ဒေသခံများထံကသိရသည်။
ဝမ်ပေါင်ကုမ္ပဏီမှ ထွက်လာသည့် အင်အား ၈၀ ဝန်းကျင်ပါ စစ်ကောင်စီတပ်ဖွဲ့ဝင်များသည် ဝမ်ပေါင်ကုမ္ပဏီအနောက်တောင်ဘက် ၂ မိုင်ခန့်အကွာတွင်ရှိသည့် မိုးကြိုးပြင်ကျေးရွာနှင့် ရာဇကျေးရွာမှ စစ်ရှောင် ပြည်သူများကို လူသားဒိုင်းအဖြစ် ဖမ်းဆီးခေါ်ဆောင်သွားခြင်းဖြစ်သည်ဟု ဆားလင်းကြီးမြို့နယ်၊ ပြည်သူ့ကာကွယ်ရေးအဖွဲ့ပ.က.ဖ တာဝန်ခံ ကိုမိုးကောင်းက ပြောသည်။
၎င်းက ” ပါသွားတဲ့ ဓားစားခံတွေက စစ်ရှောင်ရင်းနဲ့ စစ်ကြောင်းနဲ့ ထိပ်တိုက်တိုးပြီး ပါသွားတာလို့ သိရတယ် “ဟုဆိုသည်။
ဝမ်ပေါင်ကုမ္ပဏီမှ ထွက်လာသည့် စစ်ကြောင်းသည် ဇွန်လ ၅ ရက် ညနေ ၅ နာရီခွဲချိန်တွင် ဆားလင်းကြီးမြို့နယ်မိုးကြိုးပြင်အလယ်ရွာနှင့် တောင်ရွာတွင် ညအိပ်တပ်စွဲခဲ့သည်ဟု ဒေသခံများထံကသိရသည်။
ထို့နောက် ယနေ့ ဇွန်လ ၆ ရက်၊ မနက်ပိုင်းတွင် ဒေသခံပြည်သူများကို ဖမ်းဆီးခေါ်ဆောင်သွားခြင်းဖြစ်သည်ဟုဆားလင်းကြီးမြို့နယ် ပြည်သူ့အုပ်ချုပ်ရေးအဖွဲ့ ပ.အ.ဖအဖွဲ့မှ ဆက်သွယ်ရေးတာဝန်ခံ ကိုစစ်ငြိမ်းက ပြောသည်။
၎င်းက ” ဒီနေ့မနက် ၃နာရီလောက်မှာ ရွာရဲ့ အနောက်ကနေပြီးတော့ တောနင်းရှာပြီး တောထဲမှာ အိပ်နေတဲ့ ပြည်သူတွေကို ဓားစာခံအဖြစ် ၁၅ယောက်လောက်ခေါ်သွားတယ်။ မနက် ၉နာရီလောက်မှ ရာဇကျော်ကို ရောက်တယ် အဲ့ရွာက ပြည်သူတွေကိုလည်း ထပ်ဖမ်းခေါ်သွားတယ် ” ဟု ဆိုသည်။
အဆိုပါ စစ်ကြောင်းသည် လတ်တလောတွင် ယင်းမာပင်မြို့နယ်အစပ် အင်းကြင်းတောင်နှင့် နှောရိုး ကောင်းဆင့်ကျေးရွာကြား ရောက်ရှိနေသည်ဟု ဒေသခံများထံက သိရသည်။
စစ်ကြောင်းများ ထိုးနေသည့်အပြင် ပြီးခဲ့သည့် ဇွန်လ ၄ ရက်နေ့တွင် ကား ၅ စီးဖြင့်ရောက်ရှိလာသည့် အင်အား၁၅၀ ခန့်သည်လည်း မြန်မာ၀မ်ပေါင်ကုမ္ပဏီအတွင်း တပ်စွဲထားသည်ဟု ကာကွယ်ရေးတပ်ဖွဲ့ဝင်များထံက သိရသည်။
စစ်ရေးတင်းမာမှုများကြောင့် မြန်မာ၀မ်ပေါင်ကုမ္ပဏီအနီးနားရှိ ကျေးရွာ ၂၄ ရွာမှ ဒေသခံ တစ်ထောင်ကျော်သည်ဘေးလွတ်ရာသို့ ထွက်ပြေးတိမ်းရှောင်နေကြရသည်။
ပုံစာ – စစ်ကြောင်းများ ဝင်ရောက်လာသည့်အတွက် ထွက်ပြေးနေရသည့် ဆားလင်းကြီးမြို့နယ်အတွင်းရှိ ဒေသခံများ မြင်ကွင်း ။
Photo – Aung Khant Zaw
*********************************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1332
YouTube -> https://youtu.be/E95gr8vKREs
Website -> https://thanlwinkhet.net/?p=4953
Website ->https://eng.thanlwinkhet.net
