ရွှေကျင်တွင် KNUနှင့် စစ်ကောင်စီ တိုက်ပွဲဖြစ်
************
သံလွင်ခက်။
ဖေဖော်ဝါရီ ၁၈၊ ၂၀၂၃။
ကရင်အမျိုးသားအစည်းအရုံး (KNU) ၊ တပ်မဟာ (၃)နယ်မြေ ပဲခူးတိုင်း၊ ညောင်လေးပင်ခရိုင်၊ ရွှေကျင်မြို့နယ်အတွင်း စစ်ကောင်စီတပ်ဖွဲ့ဝင်များနှင့် ကရင်အမျိုးသား လွတ်မြောက်ရေးတပ်မတော် KNLAတပ်ဖွဲ့ဝင်များကြား ထိတွေ့ တိုက်ပွဲဖြစ်ပွားခဲ့သည်ဟု ဒေသခံများက သံလွင်ခက်သတင်းဌာနကို ပြောသည်။
ယမန်နေ့ ဖေဖော်ဝါရီ ၁၇ ရက် မနက်ပိုင်းတွင် ရွှေကျင်မြို့ အရှေ့တောင်ဘက်ခြမ်းရှိ စစ်ကောင်စီတပ် လက်ယက်စခန်းအနီးတွင် တိုက်ပွဲဖြစ်ပွားခဲ့ခြင်းဖြစ်သည်ဟု ဒေသခံသတင်းအရင်းမြစ်တစ်ဦးက ပြောသည်။
၎င်းက ” မနေ့ မနက်ပိုင်းမှာ ဖြစ်တာပါ။ စခန်းအနီးမှာ နှစ်ဘက်ထိတွေ့မှုဖြစ်တဲ့ ပုံစံမျိုးပါ။ စခန်းသိမ်းတိုက်ပွဲမျိုးတော့ မဟုတ်ဘူး “ ဟုဆိုသည်။
အဆိုပါ တိုက်ပွဲအတွင်း စစ်ကောင်စီတပ်ဖွဲ့ဝင် ၅ ဦးထက်မနည်း သေဆုံးခဲ့ပြီး ထိခိုက်ဒဏ်ရာရရှိခဲ့သူများလည်းရှိသည်ဟု ဒေသခံများထံမှ သိရှိရသော်လည်း အသေးစိတ် အခြေနေများကို ဆက်လက်အတည်ပြု စုံစမ်းနေဆဲ ဖြစ်သည်။
ထိခိုက်ဒဏ်ရာရရှိသည့် စစ်ကောင်စီတပ်ဖွဲ့ဝင်တချို့ကို ညောင်လေးပင်မြို့ရှိ ဆေးရုံသို့ သယ်ယူကုသနေသည်ဟု ဒေသခံများက ပြောသည်။
ဒေသခံတစ်ဦးက ” ဒဏ်ရာပြင်းထန်လို့လား၊ ဒါမှမဟုတ် ရာထူးကြီးလို့လားတော့ မသိဘူး။ ရွှေကျင်ဆေးရုံမတင်ဘဲ ညောင်လေးပင်ဆေးရုံကို လာတင်တာ။ အိမ်စီးကားနဲ့ပဲ ဒဏ်ရာရတဲ့သူ နှစ်ယောက်ကို ခေါ်လာတာ ” ဟု ဆိုသည်။
ပြီးခဲ့သည့် ဖေဖော်ဝါရီ ၁၅ ရက်နေ့တွင် ကေအဲန်ယူ – ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ခလယ်လွီထူခရိုင်( ညောင်လေးပင်ခရိုင်) တပ်မဟာ(၃)၊ လယ်ဒိုမြို့နယ်( ကျောက်ကြီးမြို့နယ် )အတွင်းသို့ စစ်ကောင်စီတပ်က လေယာဉ်နှစ်စင်းဖြင့် ဗုံး (၄) လုံးကျဲချသည့်အပြင် အော်လီဂန်းများဖြင့်လည်း ပစ်ခဲ့သည်ဟု ကရင်အမျိုးသားအစည်းအရုံးက ထုတ်ပြန်ထားသည်။
ပုံစာ – ရှေ့တန်းတစ်နေရာတွင် တိုက်ပွဲဝင်နေကြသည့် KNLAတပ်ဖွဲ့ဝင်များ မြင်ကွင်း။
Photo – KNU
