မင်းတပ် CDF ထိန်းချုပ်နယ်မြေအတွင်းကို စစ်ကောင်စီယနေ့ထပ်မံ ဗုံးကြဲ ၊ ယခုလအတွင်း ၈ ကြိမ်အထိရှိလာ
***********************************
ဇန်နဝါရီ ၂၃ ၊ ၂၀၂၃ ။
ချင်းပြည်နယ်၊ မင်းတပ်မြို့နယ်အတွင်းကို စစ်ကောင်စီက ဖုန်းလိုင်းဖြတ်တောက်ထား၍ လေကြောင်းမှ တိုက်ခိုက်မှုများဆက်တိုက်ပြုလုပ်နေရာ ယနေ့တွင်လည်း တိုက်လေယာဥ်ဖြင့် ထပ်မံဗုံးကြဲခဲ့သည်ဟု ဒေသခံများထံမှ သိရသည်။
စစ်ကောင်စီတပ်က ယနေ့ နေ့လည် ၁၁ နာရီခန့်တွင် မင်းတပ်မြို့နယ် စွန်တောင်ကျေးရွာအတွင်းကို ဂျက်ဖိုက်တာ ၂ စီးဖြင့် ဗုံးကြဲ တိုက်ခိုက်ခဲ့သည်။ ဇန်နဝါရီလ ၂၁ ရက်၊ ညသန်းခေါင်ယံအချိန်တွင် အဆိုပါကျေးရွာကို စစ်ကောင်စီတပ်က ၂ ကြိမ် ဗုံးကြဲတိုက်ခိုက်ပြီးနောက် ယနေ့နေလည်ပိုင်း၌ ၃ ကြိမ် ထပ်မံ ဗုံးကြဲတိုက်ခိုက်ခဲ့ခြင်းဖြစ်သည်ဟု မင်းတပ် CDF က ထုတ်ပြန်ထားသည်။
စစ်ကောင်စီသည် ယခုလအစပိုင်း၌ ချင်းပြည်နယ်၊ မင်းတပ်မြို့နယ်အတွင်းကို ဖုန်းလိုင်းများဖြတ်တောက်၍ CDF-Mindat ထိန်းချုပ်နယ်မြေများအတွင်းရှိ အပြစ်မဲ့ပြည်သူများ၊ စစ်ဘေးရှောင်ပြည်သူများနှင့် CDF-Mindat ၏ တပ်စခန်းများကိုဦးတည်ကာ ဂျက်ဖိုက်တာလေယာဉ်များဖြင့် အကြိမ်ကြိမ် တိုက်ခိုက်ခဲ့သည်။
စစ်ကောင်စီတပ်က မင်းတပ်မြို့နယ်အတွင်းကို ယခုလဇန်နဝါရီ ၇ ရက်၊ ည ၁၁း၀၀ နာရီခန့်တွင် ဂျက်ဖိုက်တာဖြင့် ၂ ကြိမ်လာရောက် ဗုံးကြဲတိုက်ခိုက်ပြီးနောက် ဇန်နဝါရီ ၈ ရက် နံနက် ၀၈း၀၀ နာရီခန့်တွင် ၁ ကြိမ် ထပ်မံတိုက်ခိုက်ခဲ့သည်။
ထို့နောက် ဇန်နဝါရီ ၂၁ ရက်နှင့် ၂၃ ရက်တို့၌ လေကြောင်းမှ တိုက်ခိုက်မှုများ ပြုလုပ်လာရာ ယနေ့နေ့လည်ပိုင်းအထိ ဗုံးကြဲတိုက်ခိုက်မှု ၈ ကြိမ်အထိရှိလာနေပြီဟု သိရသည်။
ယနေ့ နေ့လည်ပိုင်းဗုံးကြဲတိုက်ခိုက်မှု၌ ထိခိုက်ပျက်စီးမှုအခြေအနေကို ဖုန်းလိုင်းအခက်အခဲများကြောင့် မသိရှိရသေးသော်လည်း ၂၁ ရက်နေ့ညပိုင်းဗုံးကြဲချမှု၌ နေအိမ်များပျက်စီးခဲ့ပြီး အမျိုးသား ၁ ဦးနှင့် အမျိုးသမီး ၁ ဦး ဒဏ်ရာများ ရခဲ့သည်။
ယမန်နေ့နံနက် ၁၁ နာရီ ဝန်းကျင်တွင်လည်း စစ်ကောင်စီတပ်က မင်းတပ်မြို့ပေါ်တွင် တပ်ဆင်ထားသော ဟောင်ဝစ်ဇာ (Howitzer) လက်နက်ကြီးများဖြင့် ၅ ချက်ဆက်တိုက် ဝမ္မသူးကျေးရွာကို ပစ်ခတ်ခဲ့သည်။
စစ်ကောင်စီတပ်သည် ယခုလအတွင်း၌ မင်းတပ်မြို့နယ်တွင် လက်နက်ကြီးများဖြင့်ပစ်ခတ်မှု၊ လေကြောင်းမှ ဗုံးကြဲမှုများအပါအဝင် မြေပြင်မှလည်း စစ်ကြောင်းထိုး၍ တိုက်ခိုက်နေရာ ဇန်နဝါရီလ ၁၀ ရက်တွင်လည်း စစ်ကောင်စီတပ်ပစ်ခတ်မှုကြောင့် လီလောင်းရွာအတွင်းရှိ ၁၇ နှစ်အရွယ် အမျိုးသမီးငယ်တစ်ဦး သေဆုံးခဲ့သည်။
ပုံစာ – ဇန်နဝါရီလ ၂၁ ရက်ညပိုင်းတွင် စွန်တောင်ကျေးရွာ လေကြောင်းတိုက်ခိုက်ခံရမှု၌ ပျက်စီးမှုများ။
