DKBA အကြီးအကဲနေအိမ်ကို စစ်ကောင်စီလေယာဥ်ဖြင့်ဗုံးကြဲ၊ သတင်းကြိုရ၍ မိသားစုဝင်များ အထိအခိုက်မရှိ ရှောင်နိုင်ခဲ့
**********************************
ဇန်နဝါရီ ၂၁ ၊ ၂၀၂၃ ။
တစ်နိုင်ငံလုံး အပစ်အခတ်ရပ်စဲရေးသဘောတူစာချုပ် (NCA) လက်မှတ်ရေးထားသည့် ဒီမိုကရေစီအကျိုးပြုကရင့်တပ်မတော် DKBA တပ်ဖွဲ့၏ အကြီးအကဲတစ်ဦးနေအိမ်ကို စစ်ကောင်စီက ယနေ့နံနက်အစောပိုင်းတွင် တိုက်လေယာဥ်များဖြင့်ဗုံးကြဲ တိုက်ခိုက်ခဲ့သည်ဟု သိရသည်။
ကရင်ပြည်နယ်၊ ဘုရားသုံးဆူ၊ ကြိမ်ချောင်းကျေးရွာရှိ DKBA (ဒေါနအနောက်ခြမ်း) အမှတ်(၂)စစ်ကွပ်ကဲရေးနည်းဗျူဟာမှူး ဗိုလ်မှူးကြီးစောအေဝမ်း၏ နေအိမ်ကို ယမန်နေ့ည သန်းခေါင်ကျော်ချိန်( ယနေ့ နံနက် ၁နာရီခန့်)တွင် စစ်ကောင်စီတပ်က တိုက်လေယာဥ် ၃ စီးထက်မနည်းဖြင့် ဗုံးကြဲတိုက်ခိုက်ခဲ့သည်ဟု သိရသည်။
” စစ်ကောင်စီက လေယာဥ်နဲ့ လာတိုက်ခိုက်သွားတာဟုတ်ပါတယ်။ ဘာကြောင့်ဆိုတာတော့ အတိအကျမသိရသေးပါဘူး
” ဟု DKBA အခြေချစစ်ဗျူဟာမှူး ဗိုလ်မှူးကြီးစောဆန်းအောင်က သံလွင်ခက်ကို ပြောသည်။
စစ်ကောင်စီတပ်က ဗိုလ်မှူးကြီးစောအေဝမ်း၏နေအိမ်ခြံဝန်းကို တိုက်လေယာဥ်များဖြင့် ဗုံးကြဲခဲ့သည့်အပြင် စက်သေနတ်ဖြင့် ပစ်ခတ်တိုက်ခိုက်ခဲ့သောကြောင့် နေအိမ်နှင့် ခြံအတွင်းရှိ အဆောက်အဦးတချို့ ထိခိုက်ပျက်စီးခဲ့သည်ဟု သိရသည်။
“ သူ့နဲ့သူမိသားစုတွေတော့ လက်မတင်အချိန်လေး သတင်းရလာလို့ ကြိုရှောင်နိုင်ခဲ့ပြီး ဘာမှမဖြစ်ခဲ့ဘူး။ အနော်တို့လည်း စိတ်ပူလို့ သူ့မိသားစုဝင်တွေပဲမေး လိုက်မိတော့ အခြားထိခိုက်မှုတွေတော့ အတိကျမသိရသေးဘူး ” ဟု ဗိုလ်မှူးကြီးစောအေဝမ်းမိသားစုနှင့် နီးစပ်သည့် ဒေသခံအမျိုးသမီးတစ်ဦးက ပြောသည်။
စစ်ကောင်စီ၏ လေကြောင်းတိုက်ခိုက်မှုကြောင့် အခြားထိခိုက်ဒဏ်ရရရှိသူများနှင့် DKBA တပ်ဖွဲ့ဝင်တချို့ကျဆုံးခဲ့ရသည်ဟု သတင်းထွက်ပေါ်နေသော်လည်း သံလွင်ခက်အနေဖြင့်သီးခြား အတည်မပြုနိုင်သေးပေ။
DKBA အဖွဲ့သည် ဦးသိန်းစိန်အစိုးရလက်ထပ်တွင် တစ်နိုင်ငံအပစ်ခတ်ရပ်ဆဲရေး သဘောတူစာချုပ် NCA ၌ ပါဝင်လက်မှတ်ရေးထားသည့် တိုင်းရင်းသားလက်နက်ကိုင်အဖွဲ့ဖြစ်သည်။
ထို့ပြင်လက်ရှိအာဏာသိမ်းကာလအတွင်း၌လည်း စစ်ကောင်စီတပ်များနှင့်ထိတွေ့တိုက်ပွဲများမဖြစ်ပွားသော်လည်း စစ်ကောင်စီဘက်က DKBA အကြီးအကဲနေအိမ်များကို မကြာခဏတိုက်ခိုက်နေရာ ပြီးခဲ့သောစက်တင်ဘာလ၆ရက်တွင်လည်း DKBA စစ်ဦးစီးချုပ် ဗိုလ်ချုပ်ကြီးစောစတီး၏ နေအိမ်ကိုစစ်ကောင်စီက ဒရုန်းဖြင့် ဗုံးကြဲတိုက်ခိုက်ခဲ့သေးသည်။
