လက်နက်ကြီးပစ်ခတ်မှုကြောင့် ၁၆ နှစ်အရွယ်ကလေးတစ်ဦးဒဏ်ရာရ၊ ပြည်သူ ၂၅၀၀ကျော် ထွက်ပြေးတိမ်းရှောင်ရ

လက်နက်ကြီးပစ်ခတ်မှုကြောင့် ၁၆ နှစ်အရွယ်ကလေးတစ်ဦးဒဏ်ရာရ၊ ပြည်သူ ၂၅၀၀ကျော် ထွက်ပြေးတိမ်းရှောင်ရ
********************************

ဇန်နဝါရီ ၁၉၊ ၂၀၂၃။

ကျောက်ကြီးမြို့နယ်တွင် စစ်ကောင်စီတပ်များ လက်နက်ကြီးပစ်ခတ်မှုကြောင့် သေဂေါ်ဒဲကျေးရွာရှိ ဆယ်ကျော်သက်အရွယ်ကလေးတစ်ဦး ဒဏ်ရာရပြီး ဒေသခံပြည်သူ ၂၅၀၀ ဦးကျော် ထွက်ပြေးတိမ်းရှောင်ရသည်ဟု ကေအဲန်ယူဗဟိုက ယနေ့တွင် သတင်းထုတ်ပြန်သည်။

ကေအဲန်ယူ-ကရင်အမျိုးသားအစည်းအရုံး ကော်သူးလေအုပ်ချုပ်နယ်မြေ၊ ညောင်လေးပင်ခရိုင် တပ်မဟာ (၃)၊ ကျောက်ကြီးမြို့နယ်တွင် ယခုနှစ် ဇန်နဝါရီလ ၃ရက်မှ ၁၇ရက်အထိ ၁၅ ရက်အတွင်း စစ်ကောင်စီတပ်များမှ အရပ်သားပြည်သူနေထိုင်ရာ ကျေးရွာများတွင်းသို့ လက်နက်ကြီးများ ပစ်ခတ်ခဲ့သည်။

လက်နက်ကြီးပစ်ခတ်သည့် စစ်ကောင်စီတပ်များမှာ ကေအဲန်ယူ-ညောင်လေးပင်ခရိုင်တွင် တပ်စွဲထားသော ခလရ-၁၂၄၊ ခလရ-၆၀၊ ခမရ-၃၅၁နှင့် ခမရ-၄၃၉ တို့ဖြစ်ပြီး ရွာပေါင်း ၈ ရွာကို လက်နက်ကြီး ၃၁ လုံးခန့် ပစ်ခတ်ခဲ့သည်။

ထိုပစ်ခတ်မှုကြောင့် ဒေသခံနေအိမ် ၂ လုံးပျက်စီးခဲ့သည်ဟု ကေအဲန်ယူ- ကရင်အမျိုးသားအစည်းအရုံးကထုတ်ပြန်ထားသည်။

ထို့ပြင် စစ်ကောင်စီတပ်၏ ပစ်ခတ်မှုကြောင့် သေဂေါ်ဒဲကျေးရွာရှိ အသက် ၁၆ နှစ်အရွယ် နော်စုမေဖောမှာ ထိခိုက်ဒဏ်ရာရရှိခဲ့ပြီး ဒေသခံပြည်သူ ၂၅၆၆ ဦးကျော် ထွက်ပြေးတိမ်းရှောင်နေကြရသည်။

ပြီးခဲ့သာနှစ် နိုဝင်ဘာလကုန်ပိုင်း၌လည်း စစ်ကောင်စီတပ်၏ လက်နက်ကြီးပစ်ခတ်မှုကြောင့် ကျောက်ကြီးမြို့နယ်အတွင်းရှိကျေးရွာ ၃ ရွာမှ နေအိမ် ၈ လုံးပျက်စီးခဲ့ပြီး ဆေးခန်း ၃ လုံးပျက်စီးခဲ့သည်။ ထို့ပြင်၁၀ နှစ်အောက်ကလေး ၁ ဦးနှင့် အသက် ၆၀ အရွယ်လူကြီးတစ်ဦးတို့ ထိခိုက်ဒဏ်ရာရရှိခဲ့သည်။

စစ်ကောင်စီအာဏာသိမ်းကာလတွင် ကေအဲန်ယူထိန်းချုပ်နယ်မြေအတွင်းရှိ ဒေသခံပြည်သူ သုံးသိန်းကျော်အထိ စစ်ဘေးရှောင်နေကြရပြီး တစ်သိန်းကျော်မှာ အရေးပေါ်အကူအညီများ လိုအပ်နေသည်ဟု သိရသည်။

ယနေ့ ဇန်နဝါရီလ ၁၉ ရက် နံနက်ပိုင်းတွင်လည်း ကျောက်ကြီးမြို့နယ်၊ နောင်ကုန်းကျေးရွာအနီးတွင် ကရင်အမျိုးသားလွတ်မြောက်ရေးတပ်မတော် KNLA တပ်ဖွဲ့ဝင်များနှင့် စစ်ကောင်စီတပ်တို့အကြား စစ်ရေးပြင်းထန်နေသည်ဟု ဒေသခံများထံမှသိရသည်။

ပုံစာ – စစ်ကောင်စီတပ်လက်နက်ကြီးပစ်ခတ်မှုကြောင့် ပျက်စီးသွားသည့် နေအိမ်များ ။