မြန်မာဘက်ခြမ်းတွင် တိုက်ပွဲပြင်းထန်နေပြီး ပစ်ခတ်လိုက်သော လက်နက်ကြီးကျည် ထိုင်းနိုင်ငံထဲ ကျရောက်ပေါက်ကွဲ၍ ထိုင်းဘက်ခြမ်းတွင် ရောက်ရှိနေရသော ရွှေ့ပြောင်းမြန်မာနှစ်ဦး ကျည်စ ထိမှန်ဒဏ်ရာရရှိခဲ့သည်ဟု ဒေသခံများထံမှ သိရသည်။
ယနေ့ နံနက် ၉ နာရီကျော်တွင် ထိုင်းနိုင်ငံ၊ မဲ့ကိုကင်းရွာနှင့် မျက်နှာချင်းဆိုင် မြန်မာဘက်ခြမ်း မင်းလက်ပံကျေးရွာတိုက်ပွဲမှ ၆၀ မမ ကျည် တစ်လုံးစီပါသည့် လက်နက်ကြီး ငါးလုံးသည် သောင်ရင်းမြစ်ကို ကျော်ကာ ထိုင်းဘက်ခြမ်းသို့ ကျရောက်ပေါက်ကွဲခဲ့ခြင်းဖြစ်သည်။
“ကမ်းနဖူးကနေ တစ်မိုင်အကွာ အိမ်ရှေ့တည့်တည့်ကို ကျတာ။ အဲဒီ အိမ်တွေမှာ နေတဲ့ အသက် ၆၀ အရွယ် လူကြီးတစ်ယောက်နဲ့ ကလေးတစ်ယောက် ကျည်စထိပြီး ဒဏ်ရာရသွားတာ။ အခုဆေးရုံပို့ထားတယ်” ဟု အနီးနား နေထိုင်သူ ဒေသခံတစ်ဦးက ပြောသည်။
ထို့သို့ လက်နက်ကြီးကျည်များ ထိုင်းပိုင်နက်သို့ ကျရောက်ပြီးနောက် ထိုင်းစစ်တပ်ဘက်မှ ၁၂၀ မမ လက်နက်ကြီးဖြင့် သတိပေး မီးခိုးဗုံးကျည် လေးလုံး ပြန်လည်ပစ်ခတ်သတိပေးခဲ့သည်ဟု သိရသည်။
ကရင်ပြည်နယ်ဘက်ခြမ်းတွင် အာဏာသိမ်းစစ်တပ်နှင့် ကရင်အမျိုသားလွတ်မြောက်ရေးတပ်မတော် (KNLA) တို့အကြား တိုက်ပွဲများကြေင့် ထိုင်းဘက်ခြမ်းသို့ လက်နက်ကြီးကျည် ကျရောက်သည်မှာ ယခုလအတွင်း သုံးကြိမ်မြောက်ဖြစ်ပြီး မြန်မာနှစ်ဦး ပထမဆုံး ထိခိုက်ဒဏ်ရာရခြင်းလည်း ဖြစ်သည်။
#မြန်မာဘက် #လက်နက်ကြီး #ထိုင်းဘက်ကျ #ThanLwinKhetNews
