ခင်သရဖီဦး
တိုက်ပွဲ ပြင်းထန်နေသည့် ကျောက်ဖြူတွင် ဒေသခံများအား ကုန်လမ်း၊ရေလမ်းမှ ထွက်ခွာခွင့်ကို အာဏာသိမ်းစစ်တပ်က လုံးဝပိတ်ဆို့ထားသည်ဟု သိရသည်။
ကျောက်ဖြူမြို့ထဲမှ ထွက်ခွာခွင့်ကို ပိတ်ဆို့ထားခြင်းဖြစ်ပြီး ခိုးထွက်သူများကို ဖမ်းဆီးတရားစွဲဆိုမှုများ ပြုလုပ်နေသည်ဟု အသက် ၄၀ အရွယ် အမျိုးသားတစ်ဦးက ဆိုသည်။
“တချို့က ညအချိန် ခိုးထွက်ကြတာရှိတယ်။ အဲဒီလိုဆိုရင် ရေတပ်ကနေပြီး သေနတ်နဲ့ လှမ်းပစ်တယ်။ ဖမ်းဆီးတယ်။ တရားစွဲတယ်။ အဲဒါကြောင့် ပြည်သူတွေကလည်း ကြောက်ပြီး မထွက်ရဲကြတော့ဘူး” ဟု ၎င်းက ပြောသည်။
ထို့အပြင် ရန်ကုန်ဘက်မှ ဆင်းလာပြီး တခြား မြို့နယ်များသို့ သွားမည့် ဒေသခံများအနေဖြင့်လည်း ကျောက်ဖြူမြို့ထဲတွင် ပိတ်မိနေသည်ဟုသိရသည်။
ယခင်က ကျောက်ဖြူမှ တခြားမြို့များသို့ သွားလာခွင့်ကို စစ်ကော်မရှင်တပ်အနေဖြင့် ထောက်ခံစာပေးပြီး လူတစ်ဦးလျှင် ငွေကျပ် ၇ သိန်းမှ ၁၅ သိန်းယူ၍ ပေးထွက်ခဲ့သော်လည်း လက်ရှိတွင် လုံးဝပိတ်ဆို့ထားသည်ဟု ဒေသခံများထံမှ သိရသည်။
ကျောက်တော်မှ အသက် ၂၅ နှစ် အရွယ် အမျိုးသမီးတစ်ဦးကလည်း “ကျမ အမေတို့ ရန်ကုန်ကနေ ဆေးကုပြီး ကျောက်ဖြူဘက်က ပတ်ဆင်းသွားတာပါ။ လမ်းတွေလည်း ပိတ်ခံထားရတော့ အစက ငွေပေးပြီး ဆင်းရင်ရတယ်ဆိုလို သွားကြတာပါ။အခုက ပိတ်မိနေပါတယ်။ ရန်ကုန်ပြန်လာဖို့ကလည်း စရိတ်ကြီးတယ်။ ဒါပေမဲ့ အခုက ရန်ကုန်ကိုပဲ ပြန်ခေါ်ရမှာပါ” ဟု ဆိုသည်။
စစ်ကော်မရှင်အနေဖြင့် ဒေသခံများအား ကျောက်ဖြူမြို့မှ ရခိုင်ရှိ တခြားမြို့နယ်များသို့ ထွက်ခွာခွင့်ကို ပြီးခဲ့သည့် အောက်တိုဘာလ ဒုတိယပတ်လောက်မှ စတင်ကာ လုံးဝ ပိတ်ဆို့ထားခြင်းဖြစ်သည်။
ကျောက်ဖြူတွင် စစ်ကော်မရှင်တပ်နှင့် အာရက္ခတပ်တော် AA တို့အကြား ၂၀၂၅ ခုနှစ်၊ ဖေဖော်ဝါရီလမှ စတင်၍ ထိတွေ့တိုက်ပွဲများဖြစ်ပွားနေခြင်းဖြစ်ပြီး လက်ရှိအချိန်အထိလည်း နှစ်ဖက် ထိုးစစ်တိုက်ပွဲများ ပြင်းထန်လျက်ရှိသည်။
#ကျောက်ဖြူ #ဒေသခံထွက်ခွာခွင့် #စစ်တပ်ပိတ်ဆို့ #ThanLwinKhetNews
