မြဝတီနှင့် ရွှေကုက္ကိုလ်ဒေသရှိ ကျားဖြန့်အွန်လိုင်းငွေလိမ်ဂိုဏ်းများကို ကရင်နယ်ခြားစောင့်တပ် (BGF) နှင့် မြန်မာစစ်တပ်တို့ ပူးပေါင်းဝင်ရောက်ရှင်းလင်းလျက်ရှိရာ နိုင်ငံခြားသားများ အထုပ်အပိုးများဖြင့် ထွက်ပြေးတိမ်းရှောင်နေကြသည့် ပုံရိပ်များ ထွက်ပေါ်လာပြီးနောက် ၎င်းတို့ ထိုင်းနိုင်ငံဖက်သို့ ဝင်ရောက်ခိုလှုံကာ အခြေစိုက်စခန်းသစ်များ ထူထောင်လာနိုင်သည့်အရေး ထိုင်းလုံခြုံရေးတပ်ဖွဲ့များက အထူးစောင့်ကြည့်ပြင်ဆင်လျက်ရှိသည်ဟု Thai PBS သတင်းက ဖော်ပြသည်။
ထိုင်းထောက်လှမ်းရေးအချက်အလက်များအရ ကျားဖြန့်ကွန်ရက်နှင့် ဆက်နွှယ်သူဟု သံသယရှိသူ ၂,၀၀၀ ဦးကို စောင့်ကြည့်စာရင်းသွင်းထားပြီး နိုင်ငံဖြတ်ကျော် ရာဇဝတ်မှုဂိုဏ်းများနှင့် ပတ်သက်၍ ဖမ်းဝရမ်းထုတ်ထားသူ ၂၀၀ ကျော် ရှိကြောင်း သိရသည်။ ၎င်းတို့ထဲတွင် အများစုမှာ တရုတ်နိုင်ငံသားများ ဖြစ်သည်ဟုလည်း သိရသည်။
ထိုင်းနိုင်ငံ၊ အွန်လိုင်းလိမ်လည်မှု တိုက်ဖျက်ရေး စစ်ဆင်ရေးစင်တာ (AOC) မှ ရဲမှူးကြီး Phadet Ngam-lamom က နယ်စပ်ဒေသများတွင် ကျားဖြန့်ဂိုဏ်းများကို နှိမ်နင်းနေသည့်အတွက် ရာဇဝတ်ဂိုဏ်းဝင်များ ထိုင်းနိုင်ငံထဲသို့ သဘာဝလမ်းကြောင်းများမှတစ်ဆင့် ခိုးဝင်လာနိုင်ခြေရှိသောကြောင့် နယ်စပ်လုံခြုံရေးကို တင်းကြပ်ထားပြီး ကဏ္ဍပေါင်းစုံမှ ပူးပေါင်းဆောင်ရွက်နေသည်ဟု ဆိုသည်။
အဆိုပါရဲမှူးကြီးကပဲ ထိုင်းနိုင်ငံအတွင်း ခိုးဝင်လာသူများကို ပျမ်းမျှ တစ်ပတ် တစ်ခါ စစ်ဆေးဖော်ထုတ်လေ့ရှိသဖြင့် ကျားဖြန့်ဂိုဏ်းများ အခြေစိုက်ရန် မလွယ်ကူသည့်အတွက် လက်ရှိတွင် လာအိုနိုင်ငံဘက်သို့ ပြောင်းရွှေ့ အခြေစိုက်ရန် ဦးလှည့်နေကြသည်ဟု ဆိုသည်။
စုံစမ်းစစ်ဆေးမှုများအရ မြန်မာ၊ လာအိုနှင့် ကမ္ဘောဒီးယား ၃ နိုင်ငံလုံးရှိ ကွန်ရက်များသည် သူဌေး တစ်ဖွဲ့တည်းအောက်တွင် ချိတ်ဆက်နေပြီး နေရာဒေသအလိုက် ပစ်မှတ်ထား လိမ်လည်ပုံ ကွာခြားသည်ဟု သိရသည်။ အဆိုပါ ကွာခြားချက်တွင် မြဝတီကျားဖြန့်များက နိုင်ငံခြားသားများကို အဓိက ပစ်မှတ်ထားပြီး တာချီလိတ်တွင်တော့ ထိုင်းလူမျိုးအချင်းချင်း ဦးတည်လိမ်လည်သည်ဟု သိရသည်။ ထို့ပြင် ကမ္ဘောဒီးယားကျားဖြန့်လုပ်ငန်းများမှာ ကမ္ဘာအနှံ့မှ သားကောင်များကို ပုံစံမျိုးစုံဖြင့် လိမ်လည်သည်ဟု သိရသည်။
မြေပြင်တွင် လုပ်သားရှာဖွေသူ ပွဲစားများနှင့် ငွေလွှဲစာရင်း (Mule accounts) ရှာဖွေသူများကို ဖမ်းဆီးရမိနေသော်လည်း၊ နောက်ကွယ်တွင် ထိုင်းအရာရှိကြီးများ ပါဝင်ပတ်သက်နေနိုင်သည်ဟုလည်း AOC အဖွဲ့က သုံးသပ်ထားသည်။ အဆိုပါ အရာရှိများသည် ငွေလိမ်ဂိုဏ်းခေါင်းဆောင်ကြီးများအတွက် ထိုင်းနိုင်ငံကို “ငွေကြေးခဝါချသည့် စခန်း” အဖြစ် အသုံးပြုနိုင်ရန် ကူညီပံ့ပိုးပေးနေသည်ဟု ယူဆရသည်။
ယင်းနှင့်ပတ်သက်၍ ဒီမိုကရက်ပါတီခေါင်းဆောင် မစ္စတာ အဖီဆစ် ဝေ့ချာချီဝက နိုဝင်ဘာ ၂၀ ရက်တွင် ငွေကြေးခဝါချမှု တိုက်ဖျက်ရေးရုံး (AMLO) သို့ သက်သေအထောက်အထားများ သွားရောက်အပ်နှံခဲ့သည်။ အမေရိကန်က Blacklist သွင်းထားသူများထံမှ ငွေကြေးများသည် ထိုင်းစွမ်းအင်ကုမ္ပဏီများနှင့် နိုင်ငံရေးအသိုင်းအဝိုင်းမှ ပုဂ္ဂိုလ်များထံ စီးဝင်နေကြောင်း၊ ယခင်နှင့် လက်ရှိ ဝန်ကြီး နှစ်ဦးအပါအဝင် လူ ၁၀ ဦးထက်မနည်း ပါဝင်ပတ်သက်နေနိုင်ကြောင်း မစ္စတာ အဖီဆစ်က ထုတ်ဖော်ပြောခဲ့သည်။
အွန်လိုင်းရာဇဝတ်မှုနှင့် လောင်းကစားလုပ်ငန်းများမှ ရရှိသော ငွေမည်းများသည် ကဏ္ဍပေါင်းစုံသို့ ဝင်ရောက်နေပြီး နိုင်ငံဖြတ်ကျော် ရာဇဝတ်မှုများနှင့် ဆက်နွှယ်နေသူများ နိုင်ငံရေးရာထူးရယူခြင်းမှ တားဆီးနိုင်ရန် အရေးယူဆောင်ရွက်သွားမည်ဟုလည်း သိရသည်။
Source: Thai PBS
Photo – Reporters
#Crime #Scammer #Myawaddy #ShweKokko #Thailand #ThanLwinKhetNews
