တိုင်းရင်းသားဒေသများတွင် အမျိုးသမီး အကြမ်းဖက်ခံရမှု မြင့်တက်လာ
***************
ဇန်နဝါရီ ၁၇၊၂၀၂၃။
အာဏာသိမ်းပြီးနောက် တိုင်းရင်းသားဒေသများတွင် အမျိုးသမီး အကြမ်းဖက်ခံရမှု ဖြစ်စဉ်များ မြင့်တက်လာသည်ဟု ကူညီသူများက ပြောသည်။
ကျူးလွန်သူများတွင် ရင်းနှီးကျွမ်းဝင်ပြီးသားဖြစ်သည့် ဖခင်၊ အိမ်ထောင်ဘက်၊ ချစ်သူရည်းစား၊ ဆွေမျိုးနီးစပ်သူများနှင့်လက်နက်ကိုင်ထားသူများပါဝင်သည်ဟု ရှမ်းပြည်နယ်တောင်ပိုင်းမှ အမျိုးသမီးအရေး လှုပ်ရှားသူတစ်ဦးက ပြောသည်။
” အာဏာသိမ်းပြီးတဲ့နောက်ပိုင်းမှာ အမျိုးသမီးတွေ ပိုပြီးအကြမ်းဖက်ခံရတယ်။ဘာလို့ဆို ကျူးလွန်တဲ့သူကို အပြစ်ပေးတဲ့ ယန္တရားက ကောင်းကောင်းအလုပ်မလုပ်တော့တဲ့အတွက်ပေါ့နော်၊ အထူးသဖြင့် ကျူးလွန်သူတွေကို အပြစ်ပေးအရေးယူရမယ့်သူတွေကိုယ်တိုင်က လူ့အခွင့်အရေးချိုးဖောက်မှုကို ကျူးလွန်နေတဲ့သူဖြစ်နေတဲ့အခါမှာ ပိုဆိုးသွားတယ် ” ဟု ၎င်းက ပြောသည်။
စစ်ကောင်စီ စစ်ဆေးရေးဂိတ်များတွင်လည်း အမျိုးသမီးများ လိင်ပိုင်းဆိုင်ရာ ထိပါးနှောင့်ယှက်မှုများ အများဆုံးကြုံရသည်ဟု ကယားပြည်နယ် စစ်ဘေးရှောင် အမျိုးသမီးများ ကူညီသူတစ်ဦးက ပြောသည်။
” လက်ရှိကတော့ အမျိုးသမီးအပေါ်အကြမ်းဖက်ခံရတဲ့ ကိစ္စတွေမှာဆိုရင် လုပ်နိုင်သလောက် ကာကွယ်နိုင်သလောက် အရပ်ဘက်အဖွဲ့အစည်းတွေ အကျိုးအမြတ်မယူဘဲ လုပ်ပေးနေတဲ့အဖွဲ့တွေကနေပဲ လုံခြုံရေး တင်းကြပ်မှုတွေကြားထဲကနေ လုပ်နေကြရတာပေါ့ ” ဟု ၎င်းက ပြောသည်။
စစ်အာဏာသိမ်းပြီးနောက် ကလေးငယ်များမှ စတင်ကာ အသက် ၆၀ ကျော် အဘွားများအထိ ကျူးလွန်ခြင်းကို ခံနေရသည်ဟု မြန်မာအမျိုးသမီးအကြမ်းဖက်မှု ပပျောက်ရေး လှုပ်ရှားသူတစ်ဦးက ဆိုသည်။
” အသက်အရွယ် အစုံဘဲကြုံတွေ့ကြရတယ်။ အသက် (၆၀) အရွယ်အဘွားလည်း တိုင်လာတာဘဲ၊ ပြီးတော့ အသက် ၅ နှစ်ကလေးဆိုရင်လည်း ပထွေးကနေ မုဒိမ်းကျင့်တာမျိုး၊ အသက် ၂၀ ကျော် အိမ်ထောင်သည် အမျိုးသမီးတွေ ဆိုရင် လည်း အိမ်တွင်းအကြမ်းဖက်မှုခံရတယ်၊ အသက်အရွယ်ထက် အမျိုးသမီးတော်တော်များ ဒီပြဿနာတွေကြုံနေကြရတယ် ” ဟု ၎င်းက ပြောသည်။
လတ်တလောကာလတွင် အမျိုးသမီးအနေဖြင့် တရားဥပဒေ၏ အကူညီ ရယူနိုင်ခြင်း မရှိဟု ကူညီသူများက ပြောသည်။
“ အာဏာသိမ်းထားတော့ ဘယ်သူ့ကို တိုင်ရမယ်ဆိုတာမျိုး သူတို့လက်လှမ်းမှီဖို့ အရမ်းခက်ခဲပါတယ်။ အခုက အထူးသဖြင့် လက်နက်ကိုင်တွေကနေ ကျူးလွန်တဲ့ အကြမ်းဖက်မှုဆိုရင် ဖြေရှင်းလို့ တရားမျှတမှုက အရမ်းလှမ်းဝေးသွားပြီ ” ဟု ကချင်ပြည်နယ်မှ အမျိုးသမီးအရေး လှုပ်ရှားသူတစ်ဦးက ပြောသည်။
အမျိုးသမီး အကြမ်းဖက်ခံရမှုများကို အရေးယူနိုင်ရန် အမျိုးသားများကိုယ်တိုင် ပူးပေါင်းပါဝင် ဆောင်ရွက်သင့်သည်ဟု လူ့အခွင့်အရေးနည်းပြ အမျိုးသားတစ်ဦးက ပြောသည်။
” မဖြစ်အောင်ဆိုရင် အရေးကြီးဆုံးက ကိုယ်တိုင်က အကြမ်းဖက်မှုကို အားပေးတဲ့သူမဖြစ်ဖို့လိုသလို ကိုယ်တိုင် အကြမ်းဖက်မှုကို ကျူးလွန်တဲ့သူမဖြစ်ဖို့လိုပါတယ်။ တစ်ဦးတစ်ယောက်ချင်းစီကနေ စပြောင်းလဲနိုင်ရင် အကောင်းဆုံးပါ ” ဟု ၎င်းက ပြောသည်။
အာဏာသိမ်းပြီးနောက် မြန်မာစစ်တပ်၏ အမျိုးသမီးများနှင့် မိန်းကလေးငယ်များအပေါ် လိင်ပိုင်းဆိုင်ရာ အကြမ်းဖက်မှုများကို လက်နက်အဖြစ် အသုံးပြုမှုများ တိုးလာပြီး ကျူးလွန်သူများကို အရေးယူ အပြစ်ပေးမှု မရှိသည့်အတွက် ကုလသမဂ္ဂဆုံးဖြတ်ချက်များနှင့် အညီ နိုင်ငံတကာက အရေးယူ ဆောင်ရွက်ပေးရန် မြန်မာအမျိုးသမီးရေးလှုပ်ရှားသူများက ကုလသမဂ္ဂထံ တင်ပြ တောင်းဆိုထားသည်။
ပုံစာ – အမျိုးသမီး အကြမ်းဖက်မှုများရပ်တန့်ရန် ဆန္ဒထုတ်ဖော်နေသည့်မြင်ကွင်း။
Photo – MWYC
