မွန်တော်လှန်ရေးအင်အားစုများဖြစ်ကြသော မွန်ပြည်သစ်ပါတီ (စစ်အာဏာရှင်တိုက်ဖျက်ရေး)/ရာမညမွန်တပ်တော် (NMSP-AD/RMA) နှင့် မွန်ပြည်တော်လှန်ရေးတပ်တော် (MLF) တို့သည် စစ်အာဏာရှင်စနစ်ကို ပိုမိုထိရောက်စွာ တော်လှန်တိုက်ဖျက်ရန်အတွက် စက်တင်ဘာလ ၁၈ ရက်တွင် တရားဝင် ပူးပေါင်းလိုက်သည်ဟု ပူးတွဲသတင်းထုတ်ပြန်ကြေညာခဲ့သည်။
နွေဦးတော်လှန်ရေးကာလအတွင်း စစ်အာဏာရှင်စနစ်ကို အမြစ်ပြတ်တိုက်ဖျက်နိုင်ရန် မွန်လက်နက်ကိုင်အဖွဲ့များကြား ညီညွတ်မှုတည်ဆောက်သည့်အနေဖြင့် ယခုကဲ့သို့ မဟာမိတ်ဖွဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
သဘောတူညီချက်အရ မွန်ပြည်တော်လှန်ရေးတပ်တော် (MLF) ၏ ဦးဆောင်ကော်မတီဝင်များနှင့် တပ်ဖွဲ့ဝင်အားလုံးသည် NMSP-AD/RMA ၏ နိုင်ငံရေးနှင့် စစ်ရေးလုပ်ငန်းများတွင် တာဝန်ယူလုပ်ဆောင်သွားမည်ဟု ဖော်ပြထားသည်။
မွန်ပြည်သစ်ပါတီ (စစ်အာဏာရှင်တိုက်ဖျက်ရေး)/ ရာမညမွန်တပ်တော် (NMSP-AD/ RMA) အနေဖြင့် တစ်ခုတည်းသော မွန်တပ်မတော်ပေါ်ထွန်းရေးအတွက် ဆက်လက်ကြိုးပမ်းသွားမည်ဟု ပါဝင်ဖော်ပြထားသည်။
အဖွဲ့နှစ်ဖွဲ့လုံးသည် အနာဂတ်တွင် မွန်ပြည်နယ်ပေါ်ထွန်းရေးအတွက် မွန်ပြည်သူလူထု၊ အခြားသော တိုင်းရင်းသားတော်လှန်ရေးအဖွဲ့အစည်းများ၊ ပြည်သူ့ကာကွယ်ရေးတပ်ဖွဲ့များနှင့်အတူ ပူးပေါင်းတိုက်ပွဲဝင်သွားမည်ဖြစ်ကြောင်းလည်း ထုတ်ပြန်ချက်တွင် ပါရှိသည်။
ဓါတ်ပုံ – NMSP-AD/Ramonnya Mon Army
#မွန်လက်နက်ကိုင်နှစ်ဖွဲ့ #မဟာမိတ်ဖွဲ့ #စစ်အာဏာရှင်စနစ်ကိုပူးပေါင်းတိုက်ထုတ် #ThanLwinKhetNews
