ကရင်အမျိုးသားအစည်းအရုံး (KNU) ထိန်းချုပ်နယ်မြေဖြစ်သော မြိတ်-ထားဝယ်ခရိုင်အတွင်း လက်လွှတ်ခဲ့ရသည့် စစ်စခန်းတစ်ခုကို ပြန်လည်သိမ်းပိုက်ရန် ကြိုးပမ်းသည့် စစ်ကော်မရှင်တပ်များနှင့် KNLA ဦးဆောင်သော ပူးပေါင်းတပ်ဖွဲ့တို့အကြား တိုက်ပွဲများဖြစ်ပွားခဲ့ပြီး စစ်တပ်ဘက်မှ ၁၅ ဦးထက်မနည်း သေဆုံးခဲ့ကာ နောက်ဆုတ်သွားခဲ့ရသည်ဟု KNU-ဗဟို၏ ထုတ်ပြန်ချက်အရ သိရသည်။
တနင်္သာရီတိုင်းဒေသကြီး၊ မြိတ်-ထားဝယ်ခရိုင် (ကော်သူးလေအုပ်ချုပ်နယ်မြေ)၊ လယ်မူလားမြို့နယ်ရှိ ထမင်းမစားရွာအခြေစိုက် စစ်ကော်မရှင်တပ်စခန်းကို ကရင်အမျိုးသားလွတ်မြောက်ရေးတပ်မတော် (KNLA)၊ ကရင်အမျိုးသားကာကွယ်ရေးတပ်မတော် (KNDO)၊ ပုလောပြည်သူ့ကာကွယ်ရေးတပ်ဖွဲ့နှင့် အခြားတော်လှန်ရေး ပူးပေါင်းတပ်ဖွဲ့များက စက်တင်ဘာလ ၈ ရက် နံနက်ပိုင်းတွင် တိုက်ခိုက်သိမ်းပိုက်နိုင်ခဲ့သည်။
ထိုသို့ တပ်စခန်းလက်လွှတ်ခဲ့ရပြီးနောက်တစ်နေ့ စက်တင်ဘာလ ၉ ရက်တွင် အဆိုပါစခန်းအား ပြန်လည်ထိန်းချုပ်နိုင်ရန်အတွက် စစ်ကော်မရှင်တပ်များက စစ်ကြောင်းထိုး ထိုးစစ်ဆင်ခဲ့သည်ဟု သိရသည်။ ထို့ကြောင့် KNLA တပ်မဟာ (၄) လက်အောက်ခံ KNDO တပ်ရင်း (၇) နှင့် KNLA အထူးတပ်ဖွဲ့များပါဝင်သော တော်လှန်ရေးပူးပေါင်းတပ်ဖွဲ့များနှင့် အပြင်းအထန် တိုက်ပွဲဖြစ်ပွားခဲ့သည်။
နှစ်ရက်ကြာ ဖြစ်ပွားခဲ့သော တိုက်ပွဲအတွင်း စစ်ကော်မရှင်တပ်ဖွဲ့ဝင်များနှင့် ၎င်းတို့လက်အောက်ခံ ပြည်သူ့စစ်များ အပါအဝင် အနည်းဆုံး ၁၅ ဦး ထိခိုက်သေဆုံးခဲ့ပြီး စက်တင်ဘာလ ၁၀ ရက်တွင် စစ်ကြောင်းမှာ နောက်ပြန်ဆုတ်ခွာသွားခဲ့သည်ဟု သတင်းထုတ်ပြန်ချက်တွင် ဖော်ပြထားသည်။
မြိတ်-ထားဝယ်ခရိုင်သည် KNU တပ်မဟာ (၄) ၏ လှုပ်ရှားရာနယ်မြေဖြစ်ပြီး အာဏာသိမ်းပြီးချိန်မှစ၍ စစ်တပ်နှင့် တော်လှန်ရေးတပ်ဖွဲ့များအကြား တိုက်ပွဲများ မကြာခဏဆိုသလို ပြင်းထန်စွာ ဖြစ်ပွားနေသည့် ဒေသတစ်ခုဖြစ်သည်။ တော်လှန်ရေးတပ်ဖွဲ့များအနေဖြင့် စစ်တပ် ထောက်ပို့လမ်းကြောင်းများနှင့် တပ်စခန်းများကို မကြာခဏ ပစ်မှတ်ထား တိုက်ခိုက်လျက်ရှိပြီး ယခု ထမင်းမစားရွာ တပ်စခန်းတိုက်ပွဲသည်လည်း နယ်မြေစိုးမိုးမှုအတွက် အရေးပါသော ဖြစ်စဉ်တစ်ခုဖြစ်သည်။
#ထမင်းမစားရွာတပ်စခန်း #စစ်တပ်အထိနာ #ThanLwinKhetNews
